Kòdɔ́sìpa 3

¹ Weèdi nɛ yá̰hìnà-á-ma nà Kídísì. Ye kú kpɛ́mú, nɛ́ pɛha niìya̰ mìì péé-sa hḭ́ǹka, Kídísì péé-sa è kàdi Weèdi nɔ̀kàǹheùma. ² Nɛ yam̀màhàdi wɛǹni ní m'péé hḭ́ńkà kpɛ́ɛsá hḭ́ǹka, nɛ dá m'maàhu tenkà kpɛ́ɛsá kú hḭ́ǹka. ³ Nɛ kpíi-í-ma nà Kídísì, nɛ fòùmu Weèdi mù sɔ̀di Kídísì mɛhɛká-dà, è mù cɛ̰̀ɛ̰. ⁴ Nɛ fòùmu mɔ́mmú héé Kídísì-dà. Ò kó fodá tḭ́ń daadí, nɛ kó pɛ́ɛ́ óò fodá-nà-á-ma, óò m'péé-nà o wɛhimú mɛhɛká.

Fòùmu kpɛ̰́mmú nà Pàm̀mu

⁵ Ye kú kpɛ́mú-dà tee, nɛ yònà é wɛ́í-ma pépédi pa̰á̰ma mɛ̀mà péé-ma nɛ mɛhɛká è pú sudi, è yòǹ tenkà mɛnkà kú kpɛ́ɛmá k'yé n'yònà: Dɔ́ɔ́ma, nà yɔ́humú pa̰á̰ma, nà bìnɔ, nà niìi dɔ́kàma héhécíma, nà é m'bɔhɔ̀ta é n'káá niìya̰ wɛǹni a cɔ̰́ɔ̰̀di kpɛ́mú, mìì yòǹ-sa wàci dɔɔ̀ma. ⁶ Ye kú pa̰á̰mà-dà yɔ̰́ǹ-ní Weèdi fɔ̰́di nìpa mɛ̀m̀pà pú nì you-nà-pa toòka hḭ́ǹka. ⁷ Nà wɔ̀nì-hɔ̰, nɛ mɛ̀ɛ té de tṵ̀n ye kú pa̰á̰mà cɔ̀ku-dà, è fòù ye sḭ̀ḭ̀mà mɛhɛká.

⁸ Àmá sá̰mà-ní, nɛ́ wɛ́í mii kú wɛnnì. Nɛ́ wɛ́í fɔ̰́ɔ̰́di, nà kpeèti pa̰á̰ma, nà mɛkatohiká. Nɛ koò dá hédá kà cɔ̀di nìcɔ̰́nì yoo wakàwɛhi é yɛɛ̀ni nɛ nùka mɛhɛká. ⁹ Nɛ dá m'báńtí nɛ tɔɔ̀pa mìì tee-sá nɛ wɛ́i-í-ma nɛ dàa kpɛ̰́ǹn n'ɔ̀ɔ pa̰á̰ma, ¹⁰ ye wɔ̀ni é tódá pa̰á̰pààma. Weèdi mɛ̀nì ti pa̰à̰-di-dà mɛ̀ɛ nɛ kɔ̰́ɔ̰̀ ye pa̰á̰pààmà-ní, è mà dɔ̀hu wɔ̀ka wɛǹni è kpɛ̀i má n'yònà ni kpɛ́ɛmá, k'yé teha kà nɛ́ nì yá̰dá dɛ́dɛ́í. ¹¹ Ye wɔ̀ni, òcɔ̰́ǹ koò kɔ́ɔ́ è ceń n'ɔ̀ɔ tɔɔ̀o, a yòǹ Sùwífù yoo a yòǹ bookú tɔkú, a ca̰ntà yoo a pú ca̰ntà, a pú didà, a yòǹ míti yaǹn, a yòǹ núǹn yoo a pú yòǹ núǹn, pa wɛnnì sá̰á̰-ma Weèdi yìhìka. Mɛ̀ǹǹ yòǹ-ko niìi wɛǹni kpɛ̰́ǹn-dà héé Kídísì, mɛnń-dà mɛ̀ɛ péé pa wɛǹni mɛhɛká.

¹² Weèdi-dà nɛ batà mɛma è yɔ̀ nɛ́ n'yòǹ ni kpɛ́ɛpá, nì mɛ̀ɛ nɛ dɔ́sí-ma sàma. Mɛmá-dà tee nɛ yònà é n'káá-ma nánkɔḿma, nà nììma tɔɔ̀pa hḭ́ǹka, é n'káá cɔ̰́ɔ̰̀di yakàdamá, nà mɛkanaaká, nà mùyɔ̰. ¹³ Nɛ́ n'nɔn è weǹ nà nɛ tɔɔ̀pa. Nɛ́ m'búúkú nɛ tɔɔ̀pa sḭ̀ḭ̀ma dàhàka kà n'ɔɔ̀cɔ̰́ǹ yetà n'ɔ̀ɔ tɔɔ̀o, é n'yònà Teó nɛ dedà-ma kú bookú nɛ kpɛ́ɛmá. ¹⁴ Mìì há̰ yòǹ-sa yudí ye wɛnnì mɛhɛkà, mií-dà héé nɛ́ n'dɔ́sí nɛ tɔɔ̀pa. Dɔ́kàma-dà kó n'tee kà nɛ́ m'múń tenten. ¹⁵ Kídísì wɛ̀ɛ̀di ní nɛ n'túdí nɛ yàma mɛhɛká. Weèdi nɛ yíí ni kú kpɛ́mú-dà, è kpɛ̀i nɛ́ n'yòǹ wɔ̰̀ǹku kùcɔ̰́ kú kpɛ́ɛpá. Nɛ́ nì n'sɛdí wɔ̀ka wɛǹni. ¹⁶ Kídísì wɛmá nà ma kááma wɛǹni ní m'péé nɛ yàma mɛhɛká. Nɛ́ m'biɔhɔ̀nì nɛ tɔɔ̀pa, é n'teǹ nɛ tɔɔ̀pa nà yaǹfòùma wɛǹni. Nɛ́ n'deǹ nà nɛ yàma wɛǹni, è sɛdí Weèdi nà wɛkànamá nɛ́yɛ̰̀ǹci, nà fa̰ká kpɛ́ɛ́cí, nà tɔnáma nɛ́yɛ̰̀ǹci Weèdi Sèdi nɛ pɔ̰n-cí. ¹⁷ Nɛ pa̰kú-sa wɛǹni, nà nɛ wɛì-sa wɛǹni, n'ɛ́ɛ̀ m'pa̰kú nà Teó Sèsíì yèdi, é n'tɔnì ti Báàa Weèdi n'ɔ̀ɔ kpɛ́mú.

Weèdɔɔ̀pa yònà é n'fòùkaàma pa cɔ̰́ɔ̰̀di cɔhɔ̀ka.

¹⁸ Poòpa-nà, bá nɛ mɛ̀ǹǹ dɛ̀ɛ̀-ko ní n'you-nà o dɔɔ̀o toodí yè békúma kú bookú Teó cɔ̀ku mɛhɛká.

¹⁹ Daapá-nà, bá nɛ mɛ̀ǹǹ dɛ̀ɛ̀-ko é n'dɔ́sí o poòo, nɛ dá n'tohi pa hḭ́ǹka.

²⁰ Bííhí-nà, ní n'you-nà nɛ báàpa toòka niìi wɛǹni mɛhɛká, mií-dà Teó kpɛ̀i-má.

²¹ Nɛ́na tá bííhí báàpa-nà, nɛ dá m'mɔkanì nɛ bííhí fɔ̰́ɔ̰̀ka, k'yé teha kà hi yàma dá yɛ̀dì.

v 22 Núm̀ma-nà, ní n'you-nà toòka nɛ dakpɛ̰́m̀ma niìi wɛǹni mɛhɛká teǹka hḭ́ǹka. Nɛ dá m'pa̰kú tɔná pà nɛ púkà-na, p'èè péé tḭ́ń wɔ̀ni è nɛ cɔ́ti, è kpɛ̀i nakàna pa yàma. Àmá nɛ́ m'pa̰kú tɔná pà nɛ púkà-na nà yàma màcɔ̰́, mìì tee-sá nɛ wani Teó. ²³ Tɔná pà kó nɛ kɔ̰́ɔ̰́-nà wɛǹni, nɛ té nà pa̰ná nà yàma màcɔ̰́, k'yé n'yònà nɛ nà pa̰kú-ma Teó kpɛ́mú, yè dá n'yònà nɛ nà pa̰kú-ma nìpa kpɛ́mú. ²⁴ Nɛ́ n'yá̰á̰ è yɔ̀ Teó kó wáńtá nɛ bodá-ma ye boutí. Nɛ kó wáńtá dɛ́tá-ma kpààti ò hḭ́nà-ti o kpɛ́ɛpá kpɛ́mú. Nɛ dakpɛ̰́ǹn mɔ́nń nɛ dehú-ko kú kpɛ́mú, mɛnń-dà héé Kídísì. ²⁵ Mɛ̀ǹǹ há̰ pa̰kú-ko sḭ̀ḭ̀ma, Weèdi kó wáńtá óò bodá-ma o sḭ̀ḭ̀ma boutí è yá̰á̰ mɛni pú bahù nìpa.