Kɔ̀dɛ́ńtìpa Pɔkàcecetá 15

Kídísì yá̰ńtáma

¹ N kúcàpa nà n potɔ̰ɔ̰̀pa-nà, n kpɛ̀i é nɛ dehèna Kídísì wɛnaamá n de nɛ cakáà-ma-dà, kà nɛ́ mà tà̰ǹta, è tṵ̀n mà hḭ́mpú tenten. ² Nà mɛmá-dà Weèdi kó nɛ fḭ́hìna-má kà nɛ mà púsí tenten é n'yònà n mà nɛ cakáà-ma. Kà mɛma dɔ, nɛ dadaní yòǹ hécí-dà.

³ N nɛ kɔ̰́ɔ̰̀-mà biɔhànamà-ní mɛmá-dà héé yudí, n mɔ́-mɔ́nń pà mà nà n biɔhànà-á-ma. Ye mɛmá-dà héé, Kídísì kpíi ti sḭ̀ḭ̀ma kpɛ́mú-dà é n'yònà pà wà̰kaàma Weèdi pɔ̀kàhi mɛhɛká. ⁴ Ò kpíi kà p'óò dáná, o data̰á̰di daadí k'ó yá̰ńtá-ma kpíípa mɛhɛká é n'yònà Weèdi wɛmá pɔ̀kàhi de hḭ́mpú. ⁵ Ye kú dàhàka k'ó fodá Píyɛ́ɛ̀, é fodá o dapàm̀ma píì-pàdɛ́ɛ́. ⁶ É yídá, k'ó fodá weèdɔɔ̀pa, kà pa dɔ́ɔ́di ha̰tà kɔ̀ɔnà nùm̀, kà pá pɛ́ɛ́ óò dɛ́há wɔ̀ni nìcɔ̰́. Pa sààpa káà fòù-ú-ma, kà pa pàcɔ̰́ kpíi. ⁷ Ye kú dàhàka, k'ó fodá Sàákì, é yídá fodá o tɔntɔndipá wɛǹni.

⁸ Pa wɛnnì kú dàhàka, k'ó n fodá dèǹdèma, mmí mɛ̀ǹǹ de yònà-ko bíibɛ́ǹta. ⁹ O tɔntɔndipá mɛhɛká, mmí-dà yòǹ pa sḭ̀m̀mɔ́ǹn. N múńtà de pú sànà pá n yíí o tɔntɔndikó, mìì tee-sá n fá̰kápáà weèdɔɔ̀-hòǹhòni. ¹⁰ Àmá, Weèdi pa̰á̰suumá-dà tee kà n yòǹ-nà n yòǹ-kò yenì-ní. Ye pa̰á̰suumá pú yɛɛ̀ hécí n fòùmu mɛhɛká. Múńdìkaà, n deháà-á-ma é ha̰tá tɔntɔndipá tɔɔ̀pa wɛǹni. Yè mɛ̀ɛ pú yòǹ mmí-dà deháà, àmá Weèdi pa̰á̰suumá mɛ̀mà péé-ma n mɛhɛká-dà deháà. ¹¹ Kà mɛmá-dà, kà mmí-dà yoo mɛmpá-dà cakú Weèdi wɛnaamá, kpákpàsà, ti wɛǹni cakú màcɔ̰́-dà, mɛmá kú hḭ́ǹka-dà mɛ̀ɛ dɛɛ̀ nɛ taà-ma nɛ dandaní.

Kpíípa yá̰ńtáma

¹² Ti cakú-mà è yɔ̀ Kídísì yá̰ńtà kpíípa mɛhɛká, ntɛ́ yè kó hḭmà kà nɛ pàcɔ̰́ há̰ tṵ́má n'toò kpíípa yá̰ńtáma kɔ́ɔ́? ¹³ Kà kpíípa yá̰ńtáma kɔ́ɔ́, yè sá̰kà Kídísì mɔ́nń pú yá̰ńtà-á-dà mɛmɛ-ɛ̀. ¹⁴ Kà Kídísì há̰ pú yá̰ńtà, ti cakú-sa yòǹ hécí-dà, nɛ dandaní mɛ̀ɛ té yòǹ hécí-dà. ¹⁵ Kà mɔ́masí-dà kpíípa yá̰ńtáma kɔ́ɔ́-ma, yè sá̰kà ti cakú nuǹhetí-dà Weèdi yèdi hḭ́ǹka è yɔ̀ nì yá̰hìnà Kídísì, kà nì p'óò yá̰hìnà. ¹⁶ Kà kpíípa pú kó yá̰ńtá, yè sá̰kà Kídísì mɛ̀ɛ té pú yá̰ńtà. ¹⁷ Kà Kídísì há̰ pú yá̰ńtà, nɛ dandaní yòǹ hécí-dà, nɛ mɛ̀ɛ káà péé nɛ sḭ̀ḭ̀ma mɛhɛká-dà. ¹⁸ Yè mɛ̀ɛ tṵ́mà cakú è yɔ̀ mɛ̀m̀pà kpíi-pá è dań Kídísì hḭ́ǹka, pà fée-é-ma. ¹⁹ Kà ti daḿma péé Kídísì hḭ́ǹka fòùkù mɛnkù kú cɔ̰́ɔ̰̀di mɛhɛká-dà, ti yòǹ náńkú yam̀ma-dà é há̰tá-nà tɔɔ̀pa wɛǹni.

²⁰ Mɔ́masí hḭ́ǹka há̰kà, Kídísì yá̰ńtà-á-ma kpíípa mɛhɛká. Mɛnń-dà yòǹ cecedó é yá̰ńtá kpíípa mɛhɛká, é bɛka è yɔ̀ kpíípa tɔɔ̀pa mɛ̀ɛ té kó wáńtá yá̰ńtá-ma. ²¹ É n'yònà nìi òcɔ̰́ tee-má kà kṵ́mú dúú-ní fòùku mɛhɛká, ma kú bookú-dà mɛ̀ɛ té dɛɛ̀ nìi òcɔ̰́ tee-má kà kpíípa yá̰ńtáma é tɛ̀ni. ²² Nìpa wɛǹni múń nà Àdám̀ pɛdáma hḭ́ǹka-dà, ye kú kpɛ́mú-dà tee kà pà kɔ̰́n, ma kú bookú mɛ̀ɛ té dɛɛ̀, mɛ̀m̀pà kú wɛǹni múń-nà-pa Kídísì kó wáńtá yá̰ńtá-ma. ²³ Àmá bá pa mɛ̀ǹǹ dɛ̀ɛ̀-ko kó n'káá o wɔ̀ni-dà. Kídísì-dà yòǹ cecedó é yá̰ńtá. É yídá, mɛ̀m̀pà yòǹ-pa o kpɛ́ɛpá, kà mɛmpa kó tṵṵ̀na é yá̰ńtá ò kó tóní tḭ́ń daadí. ²⁴ Ye kú dàhàka-dà niìi wɛǹni kó tódá-ma nùdi. Kídísì kó fíɔ́wá-ma seèkpákpààka wɛǹni mɛ̀ǹkà káá-ka nɔɔ̀ti, nà kpeèti, nà wóòti nìpa hḭ́ǹka. Ye wɔ̀ni é tódá wóòti, é tì kɔ̰́ɔ̰́ Báàa Weèdi. ²⁵ Yè békáà Kídísì é wóó-ma háá é n'sànà wɔ̀ni Weèdi kó nɛɛ́-di o kà̰à̰tɔɔ̀pa, k'ó nɔɔ̀nà pa hḭ́ǹka. ²⁶ Kà̰à̰tɔɔ̀o dèǹdèǹn Weèdi kó fíɔ́wá-ko-dà héé kṵ́mú. ²⁷ Pà wà̰tà Weèdi pɔ̀kàhi mɛhɛká è yɔ̀: Weèdi héè-é-ma k'ó nɛɛ́ niìi wɛǹni. Weèdi héè kà Kídísì é nɛɛ́ niìi wɛǹni, miya̰ pú cakú è yɔ̀ ni mɔ́nní péé-ma ye niìi mɛhɛká, è yá̰á̰ mɛní-dà hédà k'ó yè nɛdá. ²⁸ Weèdi kó taàa tḭ́ń daadí niìi wɛǹni ni Bíitá nɔ̀hi mɛhɛká, ni Bíitá mɛ̀ɛ té kó taàa-á-ma ta cɔ̰́ɔ̰̀di ni nɔ̀hi mɛhɛká, ye wɔ̀ni kà ní wódí tenten niìi wɛǹni hḭ́ǹka.

²⁹ Cɔ́ɔ́-nà mɛ̀m̀pà héù-pa kà pà pà cómù nà pa kpɛ́ɛpá mɛ̀m̀pà kpíi-pá kpɛ́mú. Yè pà tɔ̀hìnì badà? Kà kpíípa yá̰ńtáma kɔ́ɔ́-dà nà mɔ́ma, baà tee kà pà héù kà pà pà cómù nà pa kpɛ́mú? ³⁰ Tḭ́ńti mɛ̀ɛtékà tá, k'yè yòǹ mɛmá-dà, baà tee kà ti kó n'yɛdí ti wɔ̰ɔ̰̀ka wɔ̀ka wɛǹni? ³¹ N kúcàpa nà n potɔ̰ɔ̰̀pa-nà, kṵ́mú-dà hɔ̰́ nà n yéńti daàka wɛǹni. N mà nɛ cakú, mìì tee-sá yè n naa-á-ma nà nɛ kpɛ́mú, nà ti múń-ma Teó Sèsí-Kídísì mɛhɛká. ³² N màa-á-ma Èfɛ́sì yɔtí mɛhɛká nà niìkpákpààpa mɛ̀m̀pà de yònà-pa yɛ̀di nɔsḭ̀ǹti. K'yè yònà nìpa kú yam̀màhàka cɔ̰́ɔ̰̀di-dà de n túdí, yè de kó n tɔhìna ba? Kà kpíípa yá̰ńtáma kɔ́ɔ́-dà, kà tí dii é yà̰à̰-nà, mìì tee-sá ti kó wáńtá kpíí-dà.

³³ Nɛ dá m'báńtí nɛ cɔ̰́ɔ̰̀di. K'à nɔhɔ̀ta-nà niìkpákpàdo, ò hɔ̰́ a toòna o kpákpààma-dà. ³⁴ Tɛ̰́ná-nà-ní nɛ yàma é m'pa̰kú k'yè sudi, nɛ dá m'pa̰kàta sḭ̀ḭ̀ma. Nɛ pàcɔ̰́ pú yá̰á̰ Weèdi báà cɛ̰́ma. N mà wɛì mìì tee-sá yè yòǹ nɛ fɛ̀ci-dà.

Mɛ̀m̀pà kó yá̰ńtá-pa wɔ̰̀ǹku kó m'yòm̀pu.

³⁵ Òcɔ̰́ǹ kó nɛɛ́-ma é béka è yɔ̀: Ntɛ́ kpíípa kó yá̰ńtá-mà kú bookù? Ntɛ́ pa wɔ̰̀ǹku kó n'yòmù? ³⁶ Fɔ̰́ń mɛ̀ǹǹ békú-ko mɛma a yíńtà-á-ma. A hɔ̰́ bɔɔ́-sa, ntoò yè hɔ̰́ kpíí-dà-ma é nɛɛ́ yɛ̀dì? ³⁷ A mɛ̀ɛ hɔ̰́ bɔɔ́-sa, a pú hɔ̰́ bɔɔ́ ye yaǹya̰ mɔ́nyá̰ n'ɛ̀ɛ fa̰à̰ti, àmá a hɔ̰́ bɔɔ́ ye bíimá-dà, k'yé n'yònà yoòbíimà yòmà yoo tɔɔ̀sa yècḭ́ḭ̀ kú bíimá. ³⁸ Ye kú dàhàka, kà Weèdi té hédá k'yé yɛɛ̀ni é kpɛ̰́ń é n'toó tɔ̀ɔkú nà fa̰à̰ti nì yè kpɛ̀i-nà-ti. Bíimá bá mɛ̀mà dɛ̀ɛ̀-ma hɔ̰́ yɛ̀ɛ̀ é kɔ̰́ɔ̰́-ku tɔ̀ɔkú nà fa̰à̰ti hɔ̰́ n'ceń-ma.

³⁹ Wɔ̰̀ǹti pú pɛ́ɛ́ pɛ́ɛ́ nà ti tɔɔtí. Nìpa wɔ̰̀ǹku ceń-ma, kà nɔtí kpɛ́ɛ́kú ceń, kà nɛ̀hi kpɛ́ɛ́kú ceń, é yídá kà num̀bííhí kpɛ́ɛ́kú ceń.

⁴⁰ Mìì péé-sa hḭ́ǹka yòm̀pu ceń-dà nà mìì péé-sa teǹka hḭ́ǹka. Hḭ́ńkà kpɛ́ɛsá yòm̀pu suukú ceń-dà, kà tenkà kpɛ́ɛsá yòm̀pu kú suukú mɛ̀ɛ té ceń. ⁴¹ Wèǹku suukú ceń-ma nà cḭ̀ma kpɛ́ɛ́kú, é yídá kà hà̰hi kpɛ́ɛ́kú yè ceń-nà. Báà hà̰tàda nà ta tɔɔ̀ta, hi suukú ceń-ma.

⁴² Ye cɔ̰́ɔ̰̀di-dà kó n'dɛɛ̀ kpíípa yá̰ńtáma daadí. Pà hɔ̰́ dáná nìi wɔ̰̀ǹku teǹka kà kú pɛ̰̀ḭ-ḭ́-ma, àmá ku yá̰hìnamá daadí, kù koò pú kó pɛ̰̀ḭ. ⁴³ Pà hɔ̰́ n'kó dáná wɔ̰̀ǹku kà kù kɔ́ɔ́ kpeèti, è pú tṵ́mà suu wáńtápu. Àmá pà kó kù yá̰hìna tḭ́ń daadí, kù kó n'suu-ú-ma é tṵ́má n'kpenì sàma. ⁴⁴ Wɔ̰̀ǹkù pà hɔ̰́ dáná-kù, kù yòǹ tenkà mɛnkà kú kpɛ́ɛsá-dà. Àmá Weèdi kó kù yá̰hìna tḭ́ń daadí, ni Sèdi-dà kó kù pa̰a̰ fòùmu. Kà mɛmá-dà, yè cakú è yɔ̀ tenkà mɛnkà kú wɔ̰̀ǹku péé-ma, kà hḭ́ǹka kpɛ́ɛ́kú péé. ⁴⁵ Ye kú kpɛ́mú-dà tee pà wà̰tà-ma Weèdi pɔ̀kàhi mɛhɛká è yɔ̀: Niì cecedó Àdám̀, Weèdi-d'òò pɛ̰ḭ fòùmu. Àmá Àdám̀ dèǹdèǹn mɛnn, Weèdi Sèdi-d'òò sṵ́nà k'ò pɔ̰n fòùmu. ⁴⁶ Mìì yòǹ-sa hḭ́ńkà kpɛ́ɛsá pú cedí tɛ̀ni, àmá teǹka kpɛ́ɛsá-dà cedí tɛ̀ni kà hḭ́ńkà kpɛ́ɛsá é nɛɛ́ tṵṵ̀na-ní. ⁴⁷ Weèdi pa̰à̰ Àdám̀ cecedó nà tá̰pùdùmu-dà, mɛnn yòǹ teǹka kóoó-dà. Àmá Àdám̀ dèǹdèǹn mɛnn, ò cútà-ní nà hḭ́ǹka-dà. ⁴⁸ Teǹka nìpa pà pa̰à̰-pa nà tá̰pùdùmu, pà yònà Weèdi pa̰à̰-ko-dà nà tá̰pùdùmu, há̰kà hḭ́ńkà kú nìpa mɛmpa yònà mɛ̀ǹǹ yɛ̀ni-kó-dà-ní nà hḭ́ǹka. ⁴⁹ É n'yònà ti yònà-mà nìdo pà pa̰à̰-ko nà tá̰pùdùmu, ma kú bookú-dà ti kó wáńtá é n'yònà-ma nìi mɛ̀ǹǹ yɛ̀ni-kó-ní nà hḭ́ǹka.

⁵⁰ N kúcàpa nà n potɔ̰ɔ̰̀pa-nà, ǹtɛ n kpɛ̀i é nɛ caka-sá: Nìi n'ɔ̀ɔ wɔ̰̀ǹkù mɛnkù pú kó nɛɛ́ dúú Weèdi wóòti mɛhɛká. Mìì mɛ̀ɛ hɔ̰́ pɛ̰̀ḭ-sá pú kó nɛɛ́ é kádá fòùmu mɛ̀mù pú yɔɔ̀hu-pú.

⁵¹ Ǹtɛ-nà mìì de sɔ̀ɔ-sá kà n kpɛ̀i éè nɛ fohìna: Ti wɛǹni ti pú kó kpíí, àmá ti wɛǹni wɔ̰̀ǹti kó wáńtá peǹta-á-ma, ⁵² yè mɛ̀ɛ kó pa̰á̰ feǹ-fem̀ma-dà, é n'yònà nɔ̀ǹfa hɔ̰́ wṵ́ńdáma, tṵ́ńtṵ́di dawòni dèǹdèni-dà mɛ̀ɛ kó cedí kɔń. Ni dawòni kó kɔń-ma, kà kpíípa-dà é yá̰ńtá-ní è koò pú n'kó kpíí daadí yènì, ye wɔ̀ni tḭ́ńti mɛ̀m̀pà fòù-pa kà tí cehèna wɔ̰̀ǹku. ⁵³ Yè békú wɔ̰̀ǹku mɛ̀ǹkù hɔ̰́ pɛ̰̀ḭ-kú é báá mìì pú pɛ̰ṵ̀-sa-dà, é yídá mɛnkú mɛ̀ǹkù hɔ̰́ kpíí-ku, kà kú báá mìì pú kɔ̰́n-sá.

⁵⁴ Ye wɔ̰̀ǹkù mɛ̀ǹkù hɔ̰́ pɛ̰̀ḭ-kù kó báá tḭ́ń daadí mìì pú hɔ̰́ pɛ̰̀ḭ-sá, é yídá mɛnkú mɛ̀ǹkù hɔ̰́ kpíí-ku kó báá tḭ́ń daadí mìì pú hɔ̰́ kpíí-sa, ye kú daadí-dà pà wà̰tà-ma wɛmá Weèdi pɔ̀kàhi mɛhɛká kó pa̰á̰-ma. Pà wà̰tà è yɔ̀:

Weèdi nɛdà kṵ́mú,

é mù fíɔ́wá pápáí.

⁵⁵ Kṵ́mú fɔ̰́ń,

a nɛdáma péé ya?

Kṵ́mú fɔ̰́ń,

a de kɔudì-nà-sa péé ya?

⁵⁶ Kṵ́mú kɔudì-nà-sa-dà héé sḭ̀ḭ̀ma. Mìì mɛ̀ɛ tee-sá kà sḭ̀ḭ̀ma káá kpeèti-dà héé kpɛ̰́ńtìnùka. ⁵⁷ Àmá, tí tɔná-nà Weèdi mɛ̀nì ti kɔ̰́ɔ̰̀-di nɛdáma kṵ́mú nà sḭ̀ḭ̀ma hḭ́ǹka nà ti Teó Sèsí-Kídísì pa̰à̰-sa.

⁵⁸ Kà mɛmá-dà n kúcàpa nà n potɔ̰ɔ̰̀pa-nà, nɛ́na n dɔ́sí-pa dɛ́dɛ́í, nɛ́ n'tṵḿ k'yè kpenì dɛ́dɛ́í Weèdi cɔ̀ku mɛhɛká. Nɛ baà é dɔ̀hà é m'púsí sukú Teó tɔmú. Nɛ yá̰á̰-dà-ma è yɔ̀ nɛ pú tɔǹ o kpɛ́mú hécí.