Hɔ̀dɔ́m̀pa i

Pɔ̀kàta Pɔ́dì wà̰haà-ta Hɔ̀dɔ́m̀pa

Cetá Kam̀má

Pɔ́dì-dà de wa̰à̰haà ye pɔ̀kàtà mɛntà-ní Hɔ̀dɔ́m̀ weèdɔɔ-nàmɔ̀ni. Tà há̰ de pú yòǹ ni cɔ̰́ɔ̰̀di kpɛ́ɛtá, àmá tà de yònà nà mɛmpá é ta̰ntá-ma weèdɔɔ̀-nàmɔ̀ka tɔɔ̀ka. Pɔ́dì de yòǹ tɔntɔndikó Sèsíì ta̰kadà-ko-dà è yɔ̀ ó caka o wɛmá mɛ̀m̀pà pú yòǹ-pa Sùwífùpa pesá. Tɔɔ̀pa pàcɔ̰́pà-dà há̰ de cakáà Sèsíì wɛnaamá Hɔ̀dɔ́m̀ yam̀ma kà pá mà tà̰ǹta é taàa pa dandaní ma hḭ́ǹka. Ò de kpɛ̀i é tɛ̀i-ho pa hɔ̰́ɔ̰́hí niì miì kú kpɛ́mú-dà:

- É tɛ̀i-ho é yahikàna pa wɔ̰̀ǹti, é nɛɛ́ sɔ̰kadá o cà̰ǹku.

- É tɛ̀i-ho é pà wekàna biɔhɔ̀namá ò kɔ̰́nì-ma Sèsíì hḭ́ǹka.

- É dɔ̀hà wɛkú mɛ̀ǹkù de péé-ku ye weèdɔɔ̀-nàmɔ̀ni mɛhɛká.

Ǹtɛ mɛ̀ɛkà ye pɔ̀kàta mɛhɛká ò de pà wekànà-sa o biɔhànamá hḭ́ǹka:

* Ò yɔ̀, niìfòùo wɛǹni-dà pa̰à̰ sḭ̀ḭ̀ma è mɛ̀ɛ mɔ́ńka Weèdi wɛhimú, é cetá-nà Sùwífùpa kà mɛ̀m̀pà pú yòǹ-pa Sùwífùpa é nɛɛ́ tṵṵ̀na-ní. Weèdi há̰ pà dɔ́sí-ma pa wɛǹni. Nì kpɛ̀i pá peǹta fòùmu-dà, é wɛ́í sḭ̀ḭ̀ma, é taàa pa dandaní Sèsíì hḭ́ǹka. Weèdi pú kó diìda nìdo è yɔ̀ ò coó è yɔ̀pu kpɛ́mú ò pa̰à̰ wɛ̰́ɛ̰́ma o cɔ̰́ɔ̰̀di yoo ò tṵ̀nà kpɛ̰́ńtìnùka hḭ́mpú. àmá Weèdi diìhu nìpa niìcoópa, pà tàà tḭ́ń wɔ̀ni-dà pa dandaní ni hḭ́ǹka. Miya̰ mɛ̀ɛ péé-nà-ní Weèdi pa̰á̰suumá pesá-dà. Mɛ̀ǹǹ kú wɛnnì kó taàa-kó dandaní Sèsíì hḭ́ǹka kó dɛ́tá-ma fḭ́hìnamá, é yɛ̀dì sḭ̀ḭ̀ma nà kṵ́mú nɔ̀hi mɛhɛká. Ye yaǹn-dà mɛ̀ɛ kó n'fòù kà Weèdi Sèdi ò tempúnà. Ye kú pa̰á̰mà-dà de tookú Hɔ̀dɔ́m̀ weèdɔɔ̀pa, è yá̰á̰ pa sààpa de pú yòǹ Sùwífùpa kà Sùwífùpa mɛ̀m̀pà de kɔ̰́ɔ̰̀-pa pa cɔ̰́ɔ̰̀di Kídísì ye pesá há̰ n'kpɛ̀i pá pa̰ná pa bookú kákámú wɛǹni.

* Ò yídà é wekàna o pɔ̀kàta mɛhɛká, cɛ̰̀ǹku mɛ̀ǹkù péé-ku-dà Sùwífùpa bookú nà boocí tɔcí cɔhɔ̀ka. Ò yɔ̀ é n'yònà tepú cɛ̰̀ǹci tṵḿ-ma teǹka, weèdɔɔ̀pa dandaní yɛɛ̀ni Sùwífùpa pesá-dà. Nà mɛma, Sùwífùpa wɛǹni pú teháà Sèsíì. Àmá Weèdi sɔ̰ncí-ma è pà dɔ́sí, è pà yún ni kpɛ́mú. Daadí kó pɛdá-ma kà pá teha ni pa̰á̰suumá nì bɛkáà-ma Sèsí-Kídísì hḭ́ǹka.

* O wɛyuudí tɔɔ̀di o pɔ̀kàta mɛhɛká, ò wɛdà weèdɔɔ̀pa yònà é n'fòùkaàma-dà pa cɔhɔ̀ka. Ò de pà cakáà pà yònà é n'duǹti-má kú bookú-dà Weèdi, nà pà yònà é n'naanà-ma kú bookú pa tɔɔ̀pa. Ò de tṵ́mà pà cakáà è yɔ̀, mɛ̀m̀pà kú dandaní kpenì-pa yònà é toó-ma mɛ̀m̀pà kú kpɛ́ɛdí mun pú kpenì-pa.

* O pɔ̀kàta kɔ̀ùdi, Pɔ́dì yɔ̀ ò kpɛ̀i é taá Hɔ̀dɔ́m̀ é tɛ̀i kà weèdɔɔ̀pa-dà óò tempanà k'ó sɔ̰kadá Ɛ̀sìpáńyì teǹka, é tɛ̀i caka Weèdi wɛmá. Ò yídà é deǹta-nà dɔɔ̀mu-dà, é kɛɛ̀da nìpa dɔ́ɔ́di yèka, poòpa nà daapá.

Ǹtɛ ye pɔ̀kàta wɛmá tṵǹ-tṵ̀ǹkaàma ma tɔɔ̀ma:

Hd 1.1-17 : Weèdi wɛnaamá yòǹ Sùwífùpa nà mɛ̀m̀pà pú yòǹ-pa Sùwífùpa kpɛ́ɛmá-dà.

Hd 1.18-3.20 : Niìfòùpa wɛǹni-dà pa̰à̰ sḭ̀ḭ̀ma.

Hd 3.21 háá 4.25 : Weèdi tóńkú-ma kú bookú nìpa è yɔ̀ pà yòǹ niìcoópa ni yìhìka.

Hd 5-8 : Weèdi diìda-pa niìcoópa káá-pu fòùmu.

Hd 9-11 : Weèdi wɛ́i-í-ma Ìsìdàyɛ́dìpa, àmá nì pú pà wɛ́i k'yé n'kɔ́ɔ́ yɔ̀ɔmá.

Hd 12.1-15.13 : Weèdɔɔ̀pa yònà é n'fòù-pu fòùmu pàmu Weèdi pa̰á̰suumá mɛhɛká.

Hd 15.14-16.27 : Pɔ́dì ta̰kadáma nà dɔɔ̀mu.