Hɔ̀dɔ́m̀pa 1

Pɔ̀kàta Pɔ́dì wà̰haà-ta Hɔ̀dɔ́m̀pa

Dɔɔ̀mu

¹ Mmí Pɔ́dì, mmí-dà nɛ wa̰à̰hu ye pɔ̀kàtà mɛntà-ní. N yòǹ Sèsí-Kídísì deho-dà. Weèdi-dà mɛ̀ɛ n yíí è yɔ̀ n ní n'yòǹ Sèsíì tɔntɔndikó. Nì n bàtà è yɔ̀ ń caka ni wɛnaamá-dà. ² Ye kú wɛnaamá kpɛ́mú-dà Weèdi de hḭ́nà-ma nùdi k'yè dɛu è yɔ̀ nì kó mà ti kɔ̰́ɔ̰́-ní, kà ni wɛtɛ̰́nápa é mà wà̰hà ni pɔ̀kàhi mɛhɛká. ³ Mà wɛì ni bíidatá hḭ́ǹka-dà, ti Teó Sèsí-Kídísì. Kà ti tódà o niìfòùma bɛ́ka, p'òò pɛdà Dàfítì nahàku mɛhɛká, k'yèe Dàfítì yòǹ o yàdo. ⁴ Kà ti mɛ̀ɛ tódà ò yòǹ-ma Weèdi bíitá, nà ni Sèdi kpeèti-dà nì de bɛkáà-ma è yɔ̀ mɛnń-dà yòǹ ni bíitá n'ɔ̀ɔ̀ yá̰hìnà tḭ́ń wɔ̀ni kpíípa mɛhɛká. ⁵ Nà mɛnn kú kpɛ́mú-dà, Weèdi n bɛkáà-ma ni pa̰á̰suumá é n yíí kà n yòǹ o tɔntɔndikó. Nì hḭn mɛma è kpɛ̀i, n'ɔ̀ɔ yèdi, ń caka boocí wɛǹni-dà o wɛmá kà cí taàa ci dandaní o hḭ́ǹka, é n'tṵ̀n ò hḭ́mpú. ⁶ Nɛ́na mɛ̀ɛtékà, nɛ péé-ma ye kú nìpà mɛhɛká, nɛ́na mɛ̀m̀pà teháà-pa Weèdi yííma, é hḭn Sèsí-Kídísì kpɛ́ɛpá. ⁷ Nɛ́na mɛ̀m̀pà kú wɛnnì péé-pa Hɔ̀dɔ́m̀ mɛhɛká, nɛ́na Weèdi naanà-pa, è nɛ yíí è yɔ̀ nɛ́ n'fòù ni kpɛ́mú, n wa̰à̰hu nɛ́na-dà. Ti Báàa Weèdi, nà Teó Sèsí-Kídísì é nɛ pa̰a̰ wɛ̀ɛ̀di nà pa̰á̰suumá.

Pɔ́dì kpɛ̀i é taá dɛ́há Hɔ̀dɔ́m̀ weèdɔɔ̀pa.

⁸ N kpɛ̀i cedí é sɛda n Weèdi-dà nà Sèsí-Kídísì yèdi nà nɛ wɛǹni kpɛ́mú, mìì tee-sá pà wɛì nɛ dandaní kpɛ́mú teǹka nà ka nùdi. ⁹ Weèdi n dehú-di kú kpɛ́mú nà yàma màcɔ̰́, è cakú ni Bíitá wɛnaamá, nì yá̰á̰-ma è yɔ̀ n cakú-sà miì yòǹ bemú-dà. Nì yá̰á̰-ma è yɔ̀ n pú dúì nɛ kpɛ́mú wɔ̀ka wɛǹni n weèdɔɔ̀pu mɛhɛká. ¹⁰ N nì cɔ̀hu-ú-ma wɔ̀ka wɛǹni è yɔ̀ kà ni kpɛ̀imá-dà, kà ní n pa̰a̰ bòdi, ká n tɛ̀i-ho nɛ hɔ̰́ɔ̰́hí, ¹¹ è yá̰á̰ yè n dodì-í-ma kà n kpɛ̀i é nɛ dɛ́há, kà tí totá Weèdi Sèdi pa̰ká, k'yé teha kà nɛ́ dɔ̀hà é tṵḿ Weèdi cɔ̀ku mɛhɛká. ¹² Tṵ́màkaà, n kpɛ̀i é tɛ̀i-ho nɛ hɔ̰́ɔ̰́hí, kà tí yahikàna ti tɔɔ̀pa wɔ̰̀ǹti-dà nɛ́na nà mmí nà dandaní nìcɔ̰́ ti káá-di Kídísì hḭ́ǹka.

¹³ N kúcàpa nà n potɔ̰ɔ̰̀pa-nà, n kpɛ̀i kà nɛ́ n'yá̰á̰-ma è yɔ̀ n datà cɛ̰má dɔ́ɔ́di-dà è kpɛ̀i tɛ̀i-ho nɛ pesá, àmá háá nà sá̰mà kà n dɛ́ɛ́kú kpanáma. N kpɛ̀i é tɛ̀i-ho é púsí tɔmú n púsí-pu-dà boocí tɔcí mɛhɛká, kà mù ní n'káá cɔ́ǹti. ¹⁴ N yònà é wisí nìpa wɛǹni-dà, mɛ̀m̀pà dìdà-pa nà mɛ̀m̀pà pú didà-pa, mɛ̀m̀pà taá-pa dàkɔɔ̀di é biɔha nà mɛ̀m̀pà pú taá-pa. ¹⁵ Ye kú kpɛ́mú-dà tee n mɛ̀ɛ té kpɛ̀i-má dɛ́dɛ́í é tɛ̀ni é nɛ caka Weèdi wɛnaamá nɛ́na mɛ̀m̀pà péé-pa Hɔ̀dɔ́m̀.

Weèdi wɛnaamá káá-ti kpeèti.

¹⁶ Fɛ̀ci pú n káá nà n kó caka-má Weèdi wɛnaamá. Mà yòǹ Weèdi kpeèti-dà nì dehú-nà-ti è fḭ́hìnì mɛ̀m̀pà kú wɛnnì tàànì-pa pa dandaní Kídísì hḭ́ǹka, é cetá-nà Sùwífùpa, kà mɛ̀m̀pà pú yòǹ-pa Sùwífùpa é nɛɛ́ tṵṵ̀na-ní. ¹⁷ Ye kú wɛnaamà bɛkú mìì tee-sá-dà kà Weèdi té diìda nìdo è yɔ̀ ò coó ni yìhìka. Ye niìya̰-dà héé dandaní ò tàà-di Weèdi hḭ́ǹka, ni cɔ̰́ɔ̰̀di mɛ̀ɛ sà-á-ma, é n'yònà pà wà̰tà-ma Weèdi pɔ̀kàhi mɛhɛká è yɔ̀: Mɛ̀ǹǹ káá-ko dandaní, mɛnń-dà coó, mɛnń-dà mɛ̀ɛ kó n'fòù.

Nìi wɛǹni-dà yeekú-nà Weèdi.

¹⁸ Weèdi wantafɔ̰̀kɔ́ɔ̀ti nà kpákpààma nìpa pa̰kú-ma kpɛ́mú-dà tee kà Weèdi fɔ̰́di dɔɔ̀-ní pa hḭ́ǹka. Nà pa paá̰kpákpààma, pà yɛ̰̀ṵ̀ wɛbeèdi-dà è yɔ̀ nì dá fodá. ¹⁹ Há̰kà, ti kó nɛɛ́ yá̰dá-sa Weèdi hḭ́ǹka yè pà weni-í-ma dɛ́dɛ́í, mìì tee-sá Weèdi mɔ́nní yè pà wekànà-á-ma. ²⁰ É tódá nà wɔ̀ni Weèdi pa̰à̰-di fòùku, niìya̰ nì pa̰à̰-sa wɛǹni bɛkú-ma pópóí nìpa nì yòm̀pu bá kà pà pú nì dɛ́hà nà nɔ̀ǹfa. Nì bɛkáà-á-ma pópóí è yɔ̀ nì káá kpeèti kà tì kɔ́ɔ́ yɔ̀ɔmá. Nì tṵ́mà bɛkáà-á-ma pópóí è yɔ̀ mɛní cɔ̰́ɔ̰̀di-dà héé Weèdi. Ye kú kpɛ́mú-dà tee, nìpa kɔ́ɔ́-ma pà kó pṵ́á̰-sa Weèdi yìhìka è yɔ̀ mií-ì tee kà pà nì yeekú-nà. ²¹ Pà yá̰á̰-dà Weèdi, àmá pà yedáà pà kó nì n'sɛdí-ma-dà é nì n'cùùnì yè békú-ma kú bookú. Múńdìkaà, pà cakàta-sá koò pú tṵ̀n cɔ̀u, kà pa yam̀màhàkpákpààka é dúú binìku mɛhɛká. ²² Pà wá̰kánì nà pà káá-ma-dà yaǹfòùma, è há̰ pú yá̰á̰ è yɔ̀ pà fikadà-á-ma. ²³ K'yé m'békú pá n'dɔń Weèdi mɛ̀nì wɛhi-dí è kɔ́ɔ́ yɔ̀ɔmá, kà pà taà dɔnti niìya̰ pà pa̰à̰-sa è yɔ̀ weèdi-dà, k'yè yòhènì nìdo mɛ̀ǹǹ kó kpíí-ko, yoo k'yè yòhènì nɛ̀hi, yoo nɔtí tàka kànàhì kpɛ́ɛtí, yoo mìì fudì-sa ye pɛutí hḭ́ǹka.

²⁴ Ye kú kpɛ́mú-dà tee, Weèdi pà héè-ma kà pà pa̰kú pa̰á̰kpákpààma pa yàma kpɛ̀i-má, ye wɔ̀ni è yɔ́kànì pa cɔ̰́ɔ̰̀di. ²⁵ Pà hɛ̀dà Weèdi wɛbeèdi-dà é nì cèda nà nuǹhetí. Pà dɔń Weèdi pa̰à̰-sa-dà è dehú ye kpɛ́mú, è há̰ hédá mɛní mɛ̀nì yè pa̰à̰-di. Nì há̰ sànà duntàma-dà k'yé n'kɔ́ɔ́ yɔ̀ɔmá. K'yé mà n'yòǹ!

²⁶ Ye kú kpɛ́mú-dà tee, kà Weèdi é pà hédá kà pà pa̰kàta yɔ́humú pa̰á̰ma pà bɔ̀hàta-má. Kà pa poòpa é hédá daapá, é taá è dɔɔ̀-nà pa potɔɔ̀pa, mìì pú yònà é pa̰á̰-sa. ²⁷ Ma cɔ̰́ɔ̰̀di-dà mɛ̀ɛ té dɛɛ̀ nà daapá. Pà koò pú dɔɔ̀-nà poòpa, pà naanà pa datɔɔ̀pa dɔɔ́-nà-ma-dà tenten, è pa̰kàta nà pa tɔɔ̀pa yɔ́humú pa̰á̰ma. Mɛmá-dà kà pà dɛ́hù-nà toyɔ̰́ńti pa pa̰á̰kpákpààma sànà-ti.

²⁸ Pà yedáà-ma kpɛ́mú è yɔ̀ pà pú kpɛ̀i é yá̰dá Weèdi, ye kú kpɛ́mú-dà tee nì pà héè-ma kà pà tṵ̀n pa yam̀màhàkpákpààka, è pa̰kàta mìì de pú yònà é pa̰á̰-sa. ²⁹ Pà sṵ́nà pa̰á̰ma mɛ̀mà pú coó-ma-dà, è káá mɛkatohiká, è kpɛ̀i é teeka tɔɔ̀pa kpɛ́ɛsá, è káá pa̰á̰héhécíma. Pà sṵ́nà yandimú-dà nà pa tɔɔ̀pa, è kɔ̰̀m̀ta, è kɔ̀ùdì pa tɔɔ̀pa, è báńti pa tɔɔ̀pa, è káá sḭ́ńdípa̰á̰ma. Pà naanà é caka mɛ̀ǹtì kɔ́ɔ́-ti-dà tɔɔ̀pa hḭ́ǹka, ³⁰ è naanà tɔɔ̀pa yèka cɔ̰hàma. Pà yòǹ Weèdi kà̰à̰tɔɔ̀pa-dà, è naanà tɔɔ̀pa tèemá, è káá fóńfóǹti nà wá̰kánáma, è yá̰á̰ sḭ̀ḭ̀ma pa̰á̰ma cɔ̀ci. Pà pú you-nà pa báàpa toòka. ³¹ Pà koò pú cɔ́dí pa pa̰á̰ma hḭ́ǹka, kà pà hḭ́mpú pà pú hɔ̰́ mà tṵ̀na. Pà dɔǹ-ń-ma dɛ́dɛ́í, è pú káá tɔɔ̀pa séèma. ³² Há̰kà, pà yá̰á̰-ma dɛ́dɛ́í è yɔ̀ Weèdi wɛdà è yɔ̀ mɛ̀m̀pà kú wɛnnì pa̰kú-pa ye kú niì-ní, pà sànà kṵ́mú-dà. Nà mɛma, kà pà baà sɔ̰ncí é pa̰kú ye kú pa̰á̰mà-ní, é m'bààsí miya̰, è múńtà sɛdí mɛ̀m̀pà mà pa̰kú-pa.