Hɔ̀dɔ́m̀pa 2

Weèdi sídàpu.

¹ Fɔ̰́ń mɛ̀ǹǹ dɛ́hù-ko yetádi tɔɔ̀pa pa̰á̰ma mɛhɛká, bá k'à dɔ́sí k'á n'yòǹ-ko, a kɔ́ɔ́ a kó caka-sá Weèdi yìhìka é yɛ̀dì, è yá̰á̰ a sídí tḭ́ń wɔ̀ni tɔɔ̀pa, è há̰ tṵ́mà pa̰kú pà pa̰kú-sa, a kɔ̰́nì ye wɔ̀ni a cɔ̰́ɔ̰̀di yetádi-dà ye pesà-ní. ² Ti mɛ̀ɛ yá̰á̰-ma è yɔ̀, wɛbeèdi hḭ́ǹka-dà Weèdi sídí-ma mɛ̀m̀pà pa̰kàta-pá ye kú niì-ní. ³ A maàhu è yɔ̀ a kó fḭ́tá-dà kà Weèdi pú n'àà n'sídáà, fɔ̰́ń mɛ̀ǹǹ sídí-ko tɔɔ̀pa pa pa̰á̰ma hḭ́ǹka, è há̰ pa̰kú pà pa̰kú-sá? ⁴ Nkɛ́ɛ̀ a yɔ̰́sí Weèdi pa̰á̰suumá, nà ni nììma, nà ni mùyɔ̰? A pú yá̰á̰ è yɔ̀ Weèdi pa̰á̰suumá-d'àà yɛ̰̀ṵ̀ è yɔ̀ á peǹta fòùmu? ⁵ A pa̰kú tokpeèka-dà, è yení a kó cehèna-má. N'ɛ̀ɛ kú pa̰á̰mà-ní, a yún a hḭ́ǹka Weèdi toyɔ̰́ńti sàti-dà, Weèdi kó bɛka tḭ́ń daadí ni fɔ̰́di nà ni sídàma mɛ̀mà cɔ́dí-ma. ⁶ Ye kú daadí, bá mɛ̀ǹǹ dɛ̀ɛ̀-ko kó dɛ́tá-ma o pa̰á̰ma boutí. ⁷ Mɛ̀m̀pà pa̰kú-pa suumá, è pɛnti wɛhimú Weèdi pesá, nà cuùumá, nà fòùmu mɛ̀mù bá yɔ̀ɔ-pú, ye kú yam̀ma-dà nì kó wáńtá pa̰a̰-má fòùmu mɛ̀mù bá yɔ̀ɔ-pú. ⁸ Àmá, mɛ̀m̀pà pú you-nà-pa Weèdi toòka, è yení wɛbeèdi, è naanà kpákpààma pa̰á̰ma, Weèdi fɔ̰́ɔ̰sàdi-dà kó dɔdi pa hḭ́ǹka. ⁹ Mɛ̀m̀pà kú wɛnnì pa̰kú-pa kpákpààma, náńkú nà bɔɔ̀pùukú-dà kó wáńtá dɔdi pa hḭ́ǹka, é cetá-nà Sùwífùpa, kà mɛ̀m̀pà pú yòǹ-pa Sùwífùpa é nɛɛ́ tṵṵ̀na-ní. ¹⁰ Há̰kà, mɛ̀m̀pà kú wɛnnì pa̰kú-pa suumá, Weèdi kó wáńtá pà pa̰a̰-á̰-ma wɛhimú, nà cuùmá, nà wɛ̀ɛ̀di, é cetá-nà Sùwífùpa, kà mɛ̀m̀pà pú yòǹ-pa Sùwífùpa é nɛɛ́ tṵṵ̀na-ní, ¹¹ è yá̰á̰ Weèdi pú bahù nìpa.

¹² Mɛ̀m̀pà kú wɛnnì pa̰à̰-pa sḭ̀ḭ̀ma è pú yá̰á̰ Mɔ̀yísì kpɛ̰́ńtìnùka, Weèdi pú kó wáńtá pà sída nà mɛnka kà pá sèǹ. Há̰kà, mɛ̀m̀pà kú wɛnnì kà yá̰á̰-pa, è há̰ pa̰kú sḭ̀ḭ̀ma, nà mɛnká-dà Weèdi kó wáńtá pà sída-nà-ma. ¹³ Yè pú yòǹ mɛ̀m̀pà bekù-pa kpɛ̰́ńtìnùka sá̰à̰di-dà Weèdi kó diìda-ma è yɔ̀ pà coó ni yìhìka, àmá mɛ̀m̀pà tṵ̀n-pá-dà kà hḭ́mpú. ¹⁴ Mɛ̀m̀pà pú yòǹ-pa Sùwífùpa pú yá̰á̰ Mɔ̀yísì kpɛ̰́ńtìnùka. Nà mɛma baàkaà, pà pa̰kú-ma kà hḭ́mpú è pú yá̰á̰. Kà pà hɔ̰n mɛma, pà bɛkú è yɔ̀ kà péé-ma pa yàma mɛhɛká nà pà pú kà káá-sà. ¹⁵ Pà bɛkú nà pa pa̰á̰ma mɛhɛká, è yɔ̀ kpɛ̰́ńtìnùka békú-ma pa̰á̰ma, Weèdi mà tàà-á-ma pa yàma mɛhɛká. Pa yàma pà cakú-ma è yɔ̀ mà péé pa mɛhɛká, é yídá kà mìì tee-sá wɔ̀ni nìcɔ̰́ kà pà té bantá pa yetáka, wɔ̀ni tɔɔ̀di é pɛha pà kó hḭmpú é pṵ́tá pa cɔ̰́ɔ̰̀di, mɛ̀ɛ t'éè pà cakú. ¹⁶ Mii kú wɛnnì-dà kó fodá sídàma daadí. Wɛnaamá n cakú-ma cakú è yɔ̀, ye kú daadí Weèdi kó héé-ma kà Sèsí-Kídísì é sída mìì kú wɛnnì sɔ̀ɔ-sá nìpa mɛhɛká.

Sùwífùpa nà Mɔ̀yísì kpɛ̰́ńtìnùka

¹⁷ Fɔ̰́ń mɛ̀ǹǹ yún-kó a cɔ̰́ɔ̰̀di Sùwífù, è tasí Mɔ̀yísì kpɛ̰́ńtìnùka hḭ́ǹka, è wá̰kánì n'àa yòǹ-ma Weèdi kóoó, ¹⁸ a yá̰á̰-ma nì kpɛ̀i-sá, kà kpɛ̰́ńtìnùka a biɔhànà a kó hḭmpú é baàta mìì suu-sá. ¹⁹ A maàhu è yɔ̀ fɔ̰́ń dìi-í-dà è kó nɛɛ́ é dɛɛ̀di yɔ̀m̀ma, è yòǹ wenikú mɛ̀m̀pà hààpu-pá yḭ́ḭ̀pu mɛhɛká. ²⁰ A maàhu è yɔ̀ a yòǹ mɛ̀m̀pà pú yá̰á̰-pa yìcḭ́ḭ̀ cɔ̀ku bɛko-dà, è yòǹ biɔhànakó mɛ̀m̀pà pú kpenì-pa Weèdi cɔ̀ku mɛhɛká, mìì tee-sá a yɔ̀ yá̰ma mɔ́mmá nà wɛbeèdi péé kpɛ̰́ńtìnùka mɛhɛká-dà. ²¹ Fɔ̰́ń mɛ̀ǹǹ biɔhànì-ko tɔɔ̀pa, baà tee k'à pú biɔhànì a cɔ̰́ɔ̰̀di? Fɔ̰́ń mɛ̀ǹǹ cakú-ko tɔɔ̀pa è yɔ̀ pà dá yódá, baà tee k'à yóu? ²² Fɔ̰́ń mɛ̀ǹǹ cakú-ko è yɔ̀ pà dá cɔ̰ha dɔɔdí, baà tee k'à nì cɔ̰hú? Fɔ̰́ń mɛ̀ǹǹ pú dɔ́sí-ko wàci nampàta, baà tee k'à yóu ci hɔ̰́ɔ̰́hí mɛhɛká pà cì pɔ̰n-sá? ²³ Fɔ̰́ń mɛ̀ǹǹ wá̰kánì-ko nà kpɛ̰́ńtìnùka kpɛ́mú, baà tee k'à pú tṵ̀n kà hḭ́mpú è cɔ̰hú Weèdi yèdi? ²⁴ Mɛmá-dà pà wà̰tà-ma Weèdi pɔ̀kàta mɛhɛká è yɔ̀: Nɛ́na Sùwífùpa, nɛ pa̰á̰ma-dà tee kà mɛ̀m̀pà pú yòǹ-pa Sùwífùpa teù Weèdi.

²⁵ K'à tṵ̀n kpɛ̰́ńtìnùka hḭ́mpú, ca̰ntápu yòǹ yècḭ́ḭ̀-dà a pesá. Àmá, k'à pú tṵ̀n kà hḭ́mpú, bá k'à ca̰ntà, yè yònà pà p'áa ca̰ntà-ma-dà. ²⁶ Kà mɛ̀ǹǹ pú ca̰ntà-ko tṵ̀n kpɛ̰́ńtìnùka hḭ́mpú, Weèdi pú k'óò dìda é n'yònà mɛ̀ǹǹ ca̰ntà-ko? ²⁷ Ye nìdò mɛ̀ǹǹ pú ca̰ntà-kò, è há̰ tṵ̀n kpɛ̰́ńtìnùka hḭ́mpú, mɛnń-dà kó wáńtá a sída fɔ̰́ń mɛ̀ǹǹ pú tṵ̀n-kó kpɛ̰́ńtìnùka, bá n'àa kà káá-sà kà kà wà̰tà pɔ̀kàta mɛhɛká, k'à tṵ́mà ca̰ntà. ²⁸ Mɔ́masí hḭ́ǹka, Sùwífù mɔ́nń pú bahiní nà nɔ̀ǹfa dɛ́háma. Ca̰ntáma mɔ́mmá mɛ̀ɛ pú héé nìi pa̰à̰-ma o wɔ̰̀ǹku hḭ́ǹka. ²⁹ Àmá mìì tee-sá kà nìdo yòǹ Sùwífù mɔ́nń, mìì péé-sa-dà o yàma mɛhɛká. Ca̰ntápu mɔ́mmú mɛ̀ɛ héé Weèdi Sèdi pa̰à̰-pu-dà nìi yàma mɛhɛká, yè pú yòǹ nìpa pa̰kú-pu è tṵ̀n pà wa̰à̰haà-sa kpɛ̰́ńtìnùka mɛhɛká. Sùwífù mɔ́nń duntàma pú yɛɛ̀hu-nà-ní nìpa pesá, àmá mà yɛ̀hu-nà-ní Weèdi pesá-dà.