Tɔná 28

Pɔ́dì Mádítì teǹka mɛhɛká

¹ Ti fḭ́tà-ma, kà pá caka è yɔ̀ ye teǹka nɛ́ɛmá yéńtà-ka, pà kà yún è tonà Mádítì-dà. ² K'yèe teǹka yam̀ma é ti pa̰á̰ nììma dɛ́dɛ́í, é cɔ́hìna ha̰mú, é ti codá ti wɛǹni mu fɔ̰̀di, mìì tee-sá tafá-dà de dɔdì kà sémú péé. ³ Kà Pɔ́dì é n'kou dayoǹti cócóodí nìcɔ̰́nì, é ká̰mù ye ha̰mú mɛhɛká. Kà wḭ̀hìmu é yee-nà waàbíidɔtá, kà tá yɛɛ̀ni ye dɛcí mɛhɛká, è yɔ̀ Pɔ́dì nɔ̀ku kàpà é daàdi-ho. ⁴ Ye teǹka yam̀ma dɛ́hà-ma ye wàfa kà fà cádí o nɔ̀ku, kà pá caka pa tɔɔ̀pa è yɔ̀: Ye dɔɔò mɛnǹ yòǹ niìkɔ̀ùdo-dà-ma. Ò fḭ́tà-ní dàmɛ́dì k'óò dii-má, àmá Weèdi coóma pú teháà è yɔ̀ ó n'fòù.

⁵ Kà Pɔ́dì é mɛ́há ye wàfa ha̰mú mɛhɛká, ò pú yeèkaà dɔnkú kùcɔ̰́kù. ⁶ Kà pá n'ceí è tonà ò kó múdí-ma yoo ò dɔdi é kpíí màcɔ̰́. Kà pá ceí é yóka, é n'hɔ̰́tà yècɛ̰́ɛ̰̀ p'óò pa̰nà. Kà pá cehèna pa yam̀màhàdi, ye wɔ̀ni è yɔ̀: Ò yòǹ wàfa-dà.

⁷ Ye pesá, è hɔ̰́tà bɛ̀m̀bɛ̀ni nìcɔ̰́nì yè péé è pú yè nátà-nà, k'yèe teǹka kpɛ̰́ǹn nì tee. Pà de ò toò Pìbìdìyúsì-dà. K'ó ti tódá o hɔ̰́ɔ̰̀ta mɛhɛká, é ti codá dɛ́dɛ́í háá daàa kàta̰a̰. ⁸ È hɔ̰́tà ye Pìbìdìyúsì báàa dɔɔ́ dɔdí hḭ́ǹka, è mɔn mɛ́ti nà bàḿbànasá. Kà Pɔ́dì é taá ò dɛ́há, é cɔ̰ná o nɔ̀hi o hḭ́ǹka, é dɔa weèdi, óò kpekàna. ⁹ Ye kú dàhàka, k'yèe teǹka mɔkàpa tɔɔ̀pa wɛǹni mɛ̀ɛ té tɛ̀ni, k'ó pà kpekàna. ¹⁰ K'yèe nìpa é ti cuùwa sàma. Kà tí n'kɛ̰hidi, kà pá ti kɔ̰́ɔ̰́ ye békú-sa wɛǹni ti cà̰ǹku mɛhɛká.

Pɔ́dì ta̰ntà Hɔ̀dɔ́m̀

¹¹ Weèe kàta̰a̰ kú dàhàka-dà, ti dìsi-má Àdɛ̀kìsà̰tídíì yam̀ma nɛ́ɛmá dawɛ́ɛ̀ku é ka̰há. Ye dawɛ́ɛ̀ku, pà de kù toò Dèdáà kpɛ́kahí-dà. Kù de péé ye teǹka mɛhɛká-dà háá kà sémú wɔ̀ni é ka̰há. ¹² Kà tí ta̰ntá yɔtí pà toò-ti Sìdàkúsì é pa̰á̰ ye pesá daàa kàta̰a̰. ¹³ N'ɛ̀ɛ pesá, kà tí dídí kóńnùdi, é ta̰ntá yɔtí pà toò-ti Dèsìyóò. K'yé weka, kà pɛ̰̀pɛ̰̀cúɛ́cúɛ́di yakú é cetá è heu, kà tí pa̰á̰ daàka kàdɛ́ɛ́, é ta̰ntá yɔtí pà toò-ti Pùsɔ́dì. ¹⁴ Ye yɔtí mɛhɛká, kà tí dɛ́há weèdɔɔ̀pa, kà pá ti cɔhà è yɔ̀ tí pa̰á̰ daàa kàyehì pa hɔ̰́ɔ̰́hí. Yè de hḭmpú-dà kà tí taá-nà Hɔ̀dɔ́m̀ yɔtí. ¹⁵ Hɔ̀dɔ́m̀ Weèdɔɔ̀pa de yeèkaà-ma è yɔ̀ ti pení, kà pá tɛ̀ni ti peètanàpu háá Àpìyúsì kààdi, é tṵ́má ti peèta-nà bɛ̀m̀bɛ̀ni pà toò-di ca̰ǹcodáka kàta̰a̰. Pɔ́dì pà dɛ́hà-ma, k'ó sɛda Weèdi, k'òo wɔ̰̀ǹti é tón é naaka. ¹⁶ Ti ta̰ntà-ma Hɔ̀dɔ́m̀, kà pá hédá Pɔ́dì k'ó m'péé o cɔ̰́ɔ̰̀di, kà sóso òcɔ̰́ ò ceí.

Pɔ́dì cakú Weèdi wɛmá Hɔ̀dɔ́m̀ yɔtí

¹⁷ Kà daàka kàta̰a̰ é ka̰há, kà Pɔ́dì é yíí o hɔ̰́ɔ̰̀ta Sùwífùpa yìkàǹyìkàpa mɛ̀m̀pà de péé-pa Hɔ̀dɔ́m̀ yɔtí. Pà tíkà-ma, k'ó pà caka è yɔ̀: N kúcàpa-nà, n pú pa̰à̰ ti nìku yècḭ́ḭ̀, n mɛ̀ɛ pú yetà-nà ti yààpa bookú pa̰á̰ma màcɔ̰́mà. Nà mɛma, kà pá n cɛ̰ɛ̰́ Sèdìsàdɛ́m̀ mɛhɛká, é n taàa Hɔ̀dɔ́m̀ yam̀ma nɔ̀hi mɛhɛká. ¹⁸ Kà pá n sída, é yɔ̀ɔ é n'kpɛ̀i é n wɛ́í, mìì tee-sá pà pú dɛ́hà n yetádi nìcɔ̰́nì mɛ̀nì sànà-di pá n kɔ̀ù. ¹⁹ Àmá, kà Sùwífùpa yìkàǹyìkàpa é yeda. N hɔ̰́tà-ma n pú kó nɛɛ́ é pa̰á̰ yècḭ́ḭ̀, kà n mɛ̀ɛ yɔ̀ n kpɛ̀i kà Hɔ̀dɔ́m̀ wóosào-dà é n sída. Mɛ̀ɛkà, n pú hḭn mɛma, è kpɛ̀i pṵ́á̰ n bookú kpɛ́ɛpá yècḭ́ḭ̀. ²⁰ Ǹtɛ mìì tee-sá ká n nɛ yíí, è kó nɛ dɛ́há kà tí wɛdá. Nìdo Ìsìdàyɛ́dìpa ceí-ko kú tɛ̀mmá-ní kpɛ́mú-dà tee kà n dásí ye dákátì mɛntì.

²¹ Kà p'óò tɛ̰́ná è yɔ̀: Ti pú dɛ́hà pɔ̀kàta tàcɔ̰́tà kà tà yɛ̀ni-nà-ní Sùdéè tempáàku è wɛì a wɛmá. Ti kúcàa òcɔ̰́ǹ mɛ̀ɛ pú tɛ̀ni é ti dɔ́dí a pa̰à̰-sa, yoo é ti caka kpákpààma màcɔ̰́mà a hḭ́ǹka. ²² Àmá, ti kpɛ̀i é yekà n'àa mɔ́nń kú nùdi-dà, wɛmá a cakú-ma, è yá̰á̰ ti you-ú-ma páàti wɛǹni kà nìpa wɛì kpákpààma, cɔ̀ku a tṵ̀n-kú kú hḭ́ǹka.

²³ Kà pá hḭ́ná daadí pà kó tóní-di-ní o pesá. K'yèe daadí tɛ̀i, kà pá tóní o peètanàpu ò de péé-sa, kà pa dɔ́ɔ́di dɔɔ̀haà è wɛhi. Ká̰ńyɛ̰̀ǹfa háá nà yookú, kà Pɔ́dì é pà wekàna Weèdi wɛmá hḭ́ǹka. Ò de pà cakú Weèdi wóòti wɛmá-dà, è pɛnti ò kó hḭmpú kà pá teha Sèsíì wɛmá. Ye kú kpɛ́mú-dà tee, k'ò de yḭnkù Mɔ̀yísì kpɛ̰́ńtìnùka hḭ́mpú, nà Weèdi wɛtɛ̰́nápa pɔ̀kàhi cakú-sa Sèsíì hḭ́ǹka. ²⁴ Pa mɛhɛká, kà pàcɔ̰́ é teha ò de wɛì-sa, àmá kà tɔɔ̀pa é yeda. ²⁵ Kà pá n'yíti Pɔ́dì pesá, è nɔ̀hù-nà pa tɔɔ̀pa ye wɛmá hḭ́ǹka, k'ó pà caka è yɔ̀: Weèdi Sèdi de naá-ma dɛ́dɛ́í nì de cakáà tḭ́ń wɔ̀ni nɛ yààpa nà Weèdi wɛtɛ̰́náko Èsàyíì nùdi, è yɔ̀:

²⁶ Taá é dɛ́há ye nìkù é kù caka è yɔ̀:

Nɛ kó n'you-ú-ma sukú,

àmá nɛ bá yekà yècḭ́ḭ̀.

Nɛ kó n'wáń-ma sukú,

àmá nɛ bá dɛ́há yècḭ́ḭ̀,

²⁷ mìì tee-sá bookù mɛnkù kú nìpa

yàma koò pú nikìdi yècḭ́ḭ̀ kú hḭ́ǹka.

Pà hḭ̀nà pa toòka-dà,

é wṵ́ń pa nɔ̀ǹci,

è pú kpɛ̀i kà pa nɔ̀ǹci é dɛ́há,

kà pa toòka é yekà,

kà pá bantá é fidí-ní n bɛ́ka,

ká n pà kpekàna.

²⁸ Kà Pɔ́dì é tɔhìna è yɔ̀: Nɛ́ n'yá̰á̰ è yɔ̀ fḭ́hìnamá Wɛmá, Weèdi mà kɔ̰́ɔ̰̀-hɔ̰ sá̰mà mɛ̀m̀pà pú yòǹ-pa Sùwífùpa bɛ́ka-dà. Mɛmpa kó mà besí-ma!

[\v 29 Pɔ́dì wɛɛ̀-ma mɛma, k'yèe Sùwífùpa é ka̰há è nɔ̀hù-hɔ̰ dɛ́dɛ́í pa cɔ̰́ɔ̰̀di mɛhɛká.]

³⁰ Kà Pɔ́dì é pa̰á̰ beé-kàdɛ́ɛ́ hɔ̰́ɔ̰̀ta ò de péé-ta kú mɛhɛká, è bopù dící. Ò de coní-ma mɛ̀m̀pà kú wɛǹni de kɔ́dì-pa-ní o pesá. ³¹ Ò de cakú-ma Weèdi wóòti wɛnaamá, è biɔhànì Teó Sèsí-Kídísì wɛmá. Ò de pa̰kú miya̰ nà daḿma-dà, k'yècḭ́ḭ̀ p'óò kpanì.