Tɔná 27

Pà tanà Pɔ́dì Hɔ̀dɔ́m̀

¹ Pà ta̰kadà tḭ́ń wɔ̀ni è yɔ̀ tí dúú nɛ́ɛmá dawɛ́ɛ̀ku mɛhɛká, é ka̰há Ìtàdíì, kà pá kɔ̰́ɔ̰́ Pɔ́dì nà kpenáti tɔɔ̀ti tìcɔ̰́, sósìpa kpɛ̰́ǹn òcɔ̰́ǹ kà p'òò toò Sùdìúsì. Ò de yòǹ sósìpa mɛ̀m̀pà dehú-pa Hɔ̀dɔ́m̀ wóosào nahàku mɛhɛká, pa kpɛ̰́ǹn òcɔ̰́-dà. ² Kà tí dìsi Àtìdàmítì nɛ́ɛmá dawɛ́ɛ̀ku, é ka̰há. Ye nɛ́ɛmá dawɛ́ɛ̀ku de kɔ́dí Àsíì tempáàku yɔtí-dà, nɛ́ɛmá dawɛ́ɛ̀ti de nɛhù-sa. Kà Àdìsìtákì ti nɔɔ̀-nà, è yòǹ Màsèdónì tempáàku kóoó, è péé Tɛ̀sàdòníkì yɔtí mɛhɛká. ³ K'yé weka, kà tí ta̰ntá Sìdónì yɔtí. Kà Sùdìúsì mɛ̀ǹǹ de pa̰kú-ko Pɔ́dì nììma, óò pa̰a̰ nùdi è yɔ̀ ó taá dɛ́há o dóòpa, kà p'óò tempanà. ⁴ Kà tí yídá ye pesá, é n'dídí Sípúdì teǹka kónnùdi, mìì tee-sá yakú-dà de heu è ti coó-nà. ⁵ Kà tí deèta Sìdìsíì nà Pà̰ǹfìdíì dàmɛ́dì, é ta̰ntá yɔtí pà toò-ti Mìdáà, Dìsíì tempáàku mɛhɛká. ⁶ Ye pesá-dà, ye Hɔ̀dɔ́m̀ sósìpa kpɛ̰́ǹn dɛ́hà-ma Àdɛ̀kìsà̰tìdíì yɔtí nɛ́ɛmá dàwɛ́ɛ̀ku, kà kù kɔ́dí Ìtàdíì, k'ó ti dikàna.

⁷ Kà tí pa̰á̰ daàka dɔ́ɔ́di, è cèǹtì yɔkàma. Nà wɛ̰́ɛ̰́ma-dà tí de ta̰ntà-ma bɛ̀m̀bɛ̀ni nìcɔ̰́nì, è beé-nà Kìnídì yɔtí. Yakú há̰ de yeéè-ma tí kó sɔ̰kadá-ma ka bɛ́ka tá, kà tí dídí Kɛ́dɛ́tì teǹka, é coá Sàdìmɔ̀nɛ́ɛ̀ bɛ́ka. ⁸ Kà tí n'dídí ye kónnùdi nà wɛ̰́ɛ̰́ma, é ta̰ntá bɛ̀m̀bɛ̀ni nìcɔ̰́nì kà pà nì toò Nɛɛ̀hisuudí, kà nì hɛ́dí-nà yɔtí pà toò-ti Dàséè.

⁹ Kà ti cèmu é dɔ̀hà é dɔnka, kà tí féná wɔ̀ni sàma, háá kà num̀boóma daadí é tɛ̀ni ka̰há. Mɛmá-dà tee, Pɔ́dì de pà cakú-ma è yɔ̀: ¹⁰ N dóòpa-nà, n mádí é n'hɔ̰́tà cà̰ǹkù mɛnkù kó n'dɔǹ-ń-ma. Nɛ́ɛmá dawɛ́ɛ̀ku nà nɛǹti kù toó-ti kó cɔ̰ha-á-ma, tṵ́màkaà, kà ti pú yá̰á̰ ti kó féná-ma ti wɔ̰ɔ̰̀ka.

¹¹ Àmá, ye Hɔ̀dɔ́m̀ sósìpa kpɛ̰́ǹn, mɛnn de dań ye nɛ́ɛmá dawɛ́ɛ̀ku mɛ́ńtáko hḭ́ǹka-dà, nà ku yaǹn é ha̰tá-nà Pɔ́dì wɛmá. ¹² Tṵ́màkaà, ye nɛ́ɛmá dawɛ́ɛ̀ti nɛhù-sa de pú cédí nìdo é nɛɛ̀hi ye pesá sémú wɔ̀ni. Mɛmá-dà tee, pa sààpa ta̰kadà-ma è yɔ̀ pá ka̰há. Pà de kpɛ̀i k'yè kó teha, kà pá ta̰ntá nɛ́ɛmá dawɛ́ɛ̀ti nɛ̀hìdi pà toò-di-dà Fèníkísì, kà nì péé Kɛ́dɛ́tì yɔtí. Ye bɛ̀m̀bɛ̀ni de coó-nà pɛ̰̀pɛ̰̀cúɛ́cúɛ̀di nà ni yúńyúùni bɛ́ka-dà. Pà de kpɛ̀i é tɛ̀i é nɛɛ̀hi-sá-dà sémú wɔ̀ni.

Yakpekú heu dàmɛ́dì hḭ́ǹka

¹³ Kà yamú é yɛɛ̀ni hḭ́ńkà bɛ́ka è heu, kà pá mahà è yɔ̀ pa yam̀màhàdi kó dii-í-ma. Kà pá yohòna pa nɛ́ɛmá dawɛ́ɛ̀ku yɔ̰̀dìka, é ka̰há è dídí-nà Kɛ́dɛ́tì kóńnùdi. ¹⁴ Àmá k'yé tɔhìna-ní, kà yakpekú pà yún-kú pɛ̰̀pɛ̰̀cúɛ́cúɛ̀di yakú, é kpetá-ní dɛ́dɛ́í ye teǹka nɛ́ɛmá yéńtà-ka hḭ́ǹka. ¹⁵ Kà kú tɛ̀ni é tódá ye nɛ́ɛmá dawɛ́ɛ̀ku. Kù de pú kó nɛɛ́ é ta̰dí-nà ye yakú. Kà tí ceḿ hédá kà kú ti ka̰há-nà kù kpɛ̀i-ká bɛ́ka. ¹⁶ Ti ha̰a̰kú tḭ́ń wɔ̀ni teǹka nɛ́ɛmá de yéńtà-ka kà kà sá̰à̰ cɛ̰́ma, kà pà kà toò Kòdáà, kà ká ti kṵncí ye yakú. Ye wɔ̀ni-dà, ti nɛdà-ma nà wɛ̰́ɛ̰́ma sàma, é teeka nɛ́ɛmá dawɛ́ɛ-fḭ́hìnasá, ¹⁷ é tón éè dúùwa ye nɛɛ́má dawɛ́ɛ̀ku mɛhɛká. Ye wɔ̀ni, k'yèe dawɛ́ɛmɛ́ńtápa, é bowá wɛ̰̀ci é kù yéńtá. Pà há̰ de wani-má kù kó pà dɔdi-nà-ma Dìbíì kóńnùka tá̰mú hḭ́ǹka tá, kà pá wɛ́í yɔ̰̀dìdi mɛ̀nì pòsi-dí hḭ́ǹka, é hédá kà yakú ti n'toó kù kpɛ̀i-ká bɛ́ka. ¹⁸ K'yé weka, k'yèe yakpekú baà é n'sɔ̰ncí è ti sa̰m̀pu kpeéma, kà pá cetá é ká̰mu totoòka dàmɛ́dì mɛhɛká. ¹⁹ Data̰á̰di daadí, k'yèe nɛ́ɛmá dawɛ́ɛ̀ku yam̀ma é ká̰mu dàmɛ́dì mɛhɛká nà pa mɔ́mpá nɔ̀hi, dabíidí mɛ̀nì hɔ̰́ n'nɛɛ̀hi-dí kú dàhàka, nà kùdáasàti mɛ̀ǹtì hɔ̰́ n'ca̰ncí-ti ye dabíidí hḭ́ǹka. ²⁰ Kà tí pa̰á̰ daàka dɔ́ɔ́di, ti pú dɛ́hà wèǹku yoo hà̰à̰hi. K'yèe yakpekú baà sɔ̰ncí è heu kpeéma. Ye wɔ̀ni-dà ti cetà-ma è koò pú n'dań è yɔ̀ ti kó fḭ́tá.

²¹ Yè de yókáà-á-ma nà ti pú dii-má. Ye wɔ̀ni, kà Pɔ́dì é yídá é nɛɛ̀hi nìpa cɔhàka é pà caka è yɔ̀: N dóòpa-nà, kà nɛ de n besí-ní, è yenì ti pú yíì-ní Kɛ́dɛ́tì yɔtí. Ti de pú kó féná ti nɛǹti, é tṵ́má é m'péé sèm̀ma mɛhɛká. ²² Àmá sá̰mà-ní, n nɛ cɔɔ̀hu è yɔ̀ nɛ́ pa̰á̰ mùyɔ̰, mìì tee-sá n'ɔɔ̀cɔ̰́ǹ pú kó kpíí. Nɛ́ɛmá dawɛ́ɛ̀ku cɔ̰́ɔ̰̀di-dà kó sèǹ. ²³ Yèǹkà mɛnkà, Weèdi mɛ̀nì n tee-dí, kà n dehú ni kpɛ́mú, ni tɔntɔndikó n fodà-á-ma, ²⁴ é n caka è yɔ̀: Dá n'wani Pɔ́dì, yè békú p'áa sída-á-ma wóosào yìhìka. Nà fɔ̰́ń kú kpɛ́mú, Weèdi kó fḭ́hìna-á-ma a nɔɔ́tɔɔ̀pa wɛǹni. ²⁵ N dóòpa-nà, nɛ wɔ̰̀ǹti é wédá nɛ yàma dá wédá. N dań-ma Weèdi hḭ́ǹka, è yá̰á̰ è yɔ̀ nì cakáà-sa kó pa̰á̰-ma. ²⁶ Àmá, kù kó ti dɔdi-nà teǹka kàcɔ̰́kà kú kónnùdi-dà kà nɛ́ɛmá kà yéńtà.

²⁷ Yè de hḭn ti yèǹka píta nà kà nàhi-dà mɛma, nà yakpekú ti toó-ma è ti fá̰kápú Mɛ̀dìtɛ̀dànɛ́ɛ̀ dàmɛ́dì mɛhɛká. K'yé m'patì yèǹka totáma, k'yèe nɛ́ɛmá dawɛ́ɛ̀ku yam̀ma é bantá è yɔ̀, ti hɛ́ɛ́kú-nà-ní teǹka kàcɔ̰́kà. ²⁸ Kà pá ká̰ńtá máayṵhùdi nìcɔ̰́nì è nì cádí-nà wɛ̰̀ku, é dɛ́há é n'hɔ̰́tà nɛ́ɛmá cṵmpumú yòǹ mɛ́tídìpa púta̰a̰ nà pàyehì. Kà pá tṵ́má tuùta-ho dɛùma, é ká̰ńtá é n'hɔ̰́tà ye cṵmpumú yòǹ mɛ́tídìpa púdɛ́ɛ́ nà pànìì. ²⁹ Pà há̰ de wani-má è yɔ̀ ti nɛ́ɛmá dawɛ́ɛ̀ku dá yetá é yó boòda-má-ní tá̰à̰ka tá, kà pá ká̰ńtá yɔ̰̀dìka kànàhì dàkà-bɛ́ka é kù nɛ̀hìna. Ye kú dàhàka, è há̰ n'kaàdi è sùkù è yɔ̀ yèǹka é weka fem̀ma. ³⁰ Àmá, k'yèe nɛ́ɛmá dawɛ́ɛ̀ku yam̀ma é m'pɛnti pà kó hḭmpú é yɛ̀dì ku mɛhɛká é fḭ́tá. Ye wɔ̀ni, kà pá cúhìna nɛ́ɛmá mɛhɛká, dawɛ́ɛ̀sa mìì fḭ́hìnì-sa nìpa, é báńta è yɔ̀ pà kpɛ̀i é kpɛ̰́ḭ́ yɔ̰̀dìka-dà ye nɛ́ɛmá dawɛ́ɛ̀ku yìhìka. ³¹ Kà Pɔ́dì é caka ye Hɔ̀dɔ́m̀ sósìpa kpɛ̰́ǹn, nà sósìpa è yɔ̀: Pa̰á̰-nà yɔkàma fá! K'yèe nìpà pú kaàdi ye nɛ́ɛmà dawɛ́ɛ́kù mɛhɛkà, nɛ koò pú kó fḭ́tá.

³² Ye wɔ̀ni, kà sósìpa é cédá wɛ̰̀ci mɛ̀ǹcì de cɛ̰ɛ̰́-ci ye nɛ́ɛmá dawɛ́ɛ̀sa, k'yé dɔdi-ho nɛ́ɛmá mɛhɛká.

³³ Kà pá n'kaàdi è ceí yé weka, kà Pɔ́dì é pà teń pa wɛǹni è yɔ̀ pá dii dipú. K'ó pà caka è yɔ̀: Ǹtɛ yenì dapíì-nàhidí-dà mɛmà, kà nɛ ceí ti tɛ̀imá, nɛ pú dii yècḭ́ḭ̀. ³⁴ N nɛ cɔɔ̀hu è yɔ̀ nɛ́ dii-í-ma, k'yé teha kà nɛ́ fḭ́tá. N'ɔɔ̀cɔ̰́ǹ pú kó féná o yudí yùku bá kùcɔ̰́.

³⁵ Pɔ́dì wɛdà-ma mɛma é yɔ̀ɔ, é tódá pɛ̰́ɛ̰̀ é sɛda Weèdi pa wɛǹni yìhìka, é yɔ̀ɔ óò wɛ́ha, é cetá è yon. ³⁶ Ye wɔ̀ni-dà, pa wɛǹni yàma há̰ kaàdi-má, kà pà mɛ̀ɛ té dii. ³⁷ Ti wɛǹni de yòǹ ye nɛ́ɛmá dawɛ́ɛ̀ku mɛhɛká, nìpa kɔ̀ɔnà dɛ́ɛ́ nà púyehì nà pàkɔ̀dì-dà. ³⁸ Pà dii tḭ́ń wɔ̀ni é dɛn, kà pá ká̰ńtá pɛ̰́ɛ̰̀ yòmu dàmɛ́dì mɛhɛká, è kpɛ̀i é yɔ́kàna ye nɛ́ɛmá dawɛ́ɛ̀ku.

³⁹ Yè wekáà-ma, ye nɛ́ɛmá dawɛ́ɛ̀ku yam̀ma pú bantà teǹka, àmá kà pá dɛ́há boòma màcɔ̰́mà kú mɛhɛká, bɛ̀m̀bɛ̀ni kà tá̰mú ye cópú-ho sàma. Ye wɔ̀ni, kà pá tódá ta̰kadáma è yɔ̀ pá taá é kù dɔɔ-nà ye pesá, k'yè kó teha. ⁴⁰ Kà pá pḭntá ye yɔ̰̀dìka, é kà héé-ho ye dàmɛ́dì mɛhɛká. Ye wɔ̀ni, é ceḿ botá wɛ̰̀ci mɛ̀ǹcì de púsí-ci ku mɛ́ńtádi, é yídá é diìka kùdáàku ku yìhìka, è há̰ hédá kà yakú é kù n'túdí, kà pà coó ye tá̰mú bɛ̀m̀bɛ̀ni bɛ́ka. ⁴¹ Àmá, kà pá taá tuùdi tá̰mú hḭ́ǹka, nɛ́ɛhéncí cìdɛ́ɛ́ cɔhɔ̀ka. Kà ku yìkà-bɛ́ka é níḿ-hɔ̰, kù koò pú kó nɛɛ́ tuùta. Kà nɛ́ɛsa̰nhí podì kpeéma ku dàhàka, kà ká cetá è pɔ́u.

⁴² Kà sósìpa é n'kpɛ̀i é kɔ̀ù ye kpenáti, k'yé teha kà kùcɔ̰́kù dá fa̰á̰ é foi. ⁴³ Àmá Hɔ̀dɔ́m̀ sósìpa kpɛ̰́ǹn há̰ de kpɛ̀i é fḭ́hìna-á-ma Pɔ́dì. Mɛmá-dà k'ó yeda pà kó pa̰á̰-ma miya̰. K'ó kɔ̰́ɔ̰́ nùdi mɛ̀m̀pà de nɔn-pá è fɔ̰ṵ̀, è yɔ̀ pá cedí dɔdi nɛ́ɛmá mɛhɛká, é deèta kpeèdi. ⁴⁴ Tɔɔ̀pa mɛmpa, é pà tṵ̀na é n'cɛ̰ɛ̰́-nà dawɛhí yoo mìì sɔ̰́ńtà-sa ye nɛ́ɛmá dawɛ́ɛ̀ku hḭ́ǹka. Ma kú bookú-dà pà de hḭn-má, é ta̰ntá pa wɛǹni kónnùdi nà naakú.