Tɔná 26

Pɔ́dì pṵ́ṵ́kú o cɔ̰́ɔ̰̀di Àkìdìpáà yìhìka

¹ Kà Àkìdìpáà é caka Pɔ́dì è yɔ̀: A kó nɛɛ́-ma é wɛdá a káá-ma é pṵ́tá a cɔ̰́ɔ̰̀di. Ye wɔ̀ni, kà Pɔ́dì é yoòda o nɔ̀ku, é cetá o cɔ̰́ɔ̰̀di pṵ́tápu è yɔ̀: ² Wódo Àkìdìpáà, yè n naá-ma dɛ́dɛ́í, nà n kó nɛɛ́-ma é pṵ́tá n cɔ̰́ɔ̰̀di yenì a yìhìka, Sùwífùpa n pṵ́ṵ́nì-sa wɛǹni kú hḭ́ǹka, ³ è yá̰á̰, a yá̰á̰-ma dɛ́dɛ́í pa bokupa̰á̰ma wɛǹni, nà pà nɔ̀hù-sa kú hḭ́ǹka. M'a cɔɔ̀hu è yɔ̀ á n besí nà mùyɔ̰.

⁴ Sùwífùpa wɛǹni yá̰á̰-ma n fòùmu de yòm̀pu nà n dapàǹku wɔ̀ni. Pà yá̰á̰-ma, nà cetáma n de fòù-ma kú bookú n nìku cɔhɔ̀ka, nà Sèdìsàdɛ́m̀ mɛhɛká. ⁵ Pà n yá̰á̰-ma k'yè dɛu, è yɔ̀ n de péé num̀múnní mɛ̀nì tṵ̀n-dí-dà dɛ́dɛ́í ti bokupa̰á̰ma, Fàdísìpa kpɛ́ɛdí. Pa mɔ́mpá kó nɛɛ́ é caka-á-ma è yɔ̀ bemú-dà, kà pà kpɛ̀i. ⁶ Sá̰mà-ní, pà n síí-nà, è yɔ̀pu kpɛ́mú-dà n ceí nùdi Weèdi de hḭ́nà-di ti yààpa. ⁷ Ti bookú nahàti píì-tìdɛ́ɛ́ pɔ̰n pa kpɛ́ɛtí è dùǹti Weèdi wèǹku nà yèǹka, è mɛ̀ɛ té ceí ni kú pa̰á̰ma-dà. Wódo Àkìdìpáà, ye kú daḿmà kpɛ́mú-dà tee Sùwífùpa n pṵ́ṵ́nì-ma! ⁸ Baà tee nɛ́na Sùwífùpa, kà nɛ maàhu è yɔ̀ yè pú cédí kà Weèdi é yá̰hìna kpíípa?

⁹ N mɔ́nń, n de maàhu è tonà n yònà é màa-á-ma nà n nɔɔ̀ti wɛǹni, kà Sèsíì Nàsàdɛ́tì kóoó yèdi dá pidá. ¹⁰ N mɛ̀ɛ de pa̰à̰-sa-dà Sèdìsàdɛ́m̀ mɛhɛká. N de yɛ̰̀ḭ-ḭ́-ma kódeedí mɛhɛká, weèdɔɔ̀pa dɔ́ɔ́di. Dɔ̀hàka yam̀ma kpɛ̰́m̀ma-dà mɛ̀ɛ de n kɔ̰́ɔ̰̀ ye kú nɔɔtì. Kà pà mɛ̀ɛ de kpɛ̀i é pà kɔ̀ù, n de hɔ̰́ teha-á-ma. ¹¹ N de centì-í-ma Weèdi wɛmá biɔhà-nàmɔ̀ni nà ni tɔɔ̀di, è yɔ̰́ǹ pa toòka, è pɛnti é pà pa̰á̰ nà nɔɔ̀ti kà pá nɔ̀hì pà dań-sa. N fɔ̰́di-dà de hḭtà-ní pa hḭ́ǹka, háá kà n pà tṵ̀nì-nà boocí tɔcí yɔtí mɛhɛká, é pà fá̰kápú.

Pɔ́dì cakú ò cèhènà-ma kú bookú

¹² Mɛmá-dà ká n de n'kɔ́dí Dàmásì yɔtí, kà dɔ̀hàka yam̀ma kpɛ̰́m̀ma n kɔ̰́ɔ̰̀ nɔɔ̀ti è yɔ̀ ń taá cɛ̰ha-ní weèdɔɔ̀pa. ¹³ Wódo Àkìdìpáà, kà n de n'sá̰á̰ cɔ̀ku, kà wèǹku patì yuùka hḭ́ǹka, ká n dɛ́há kà wenkú é yɛɛ̀ni nà hḭ́ǹka. Ye wenkú de paìdi-í-ma è ha̰tà-nà wèǹku kpɛ́kú. Kà kú tɛ̀ni é n cḭḭ̀na-hɔ̰ é pɛ́ɛ́-nà n nɔɔ́tɔɔ̀pa. ¹⁴ Kà tí dɔdi teǹka ti wɛǹni, ká n yekà boòku kà kù n wɛì-nà hèbùdéèdi è tonà: Sɔ́dì, Sɔ́dì, badà tee k'à n fá̰kápú? A wéní kpeèsa-dà. Nɔtá pú kó nɛɛ́ é yeda dɔ̀ɔ̀di ta yaǹn tà naà-nà-di. ¹⁵ Ká n béka è yɔ̀: Fɔ̰́ń wodà n Teù? Kà Teó é n tɛ̰́ná è yɔ̀: Mmí Sèsíì-dà, a fá̰kápú-ko. ¹⁶ Yídá é nɛɛ̀hi sá̰mà. Ǹtɛ mìì tee-sá kà m'áa fodá: N kpɛ̀i á n'yòǹ n deho-dà, é n'cakú nìpa a n dɛ́káàma kú bookú yenì, nà n kó tṵ́má a bɛka-sá. ¹⁷ M'a tɔnti Sùwífùpa pesá-dà, nà boocí tɔcí pesá. N k'áa fḭ́hìna-á-ma pa nɔ̀hi mɛhɛká. ¹⁸ A yònà é taá pà dìhìna-á-ma, é pà dèna-ní yḭ́ḭ̀pu mɛhɛká é pà tɛɛ̀ní wenkú mɛhɛká, é pà fèda-ní Wɛɛ̀kupá wódo nɔɔ̀ti mɛhɛká é pà tɛɛ̀ní Weèdi pesá. Kà pà tàà dandaní n hḭ́ǹka, Weèdi kó pà dèda-á-ma pa sḭ̀ḭ̀ma, kà pá pɛ́ɛ́ é dɛ́tá kpàtìdi nà mɛ̀m̀pà yòǹ-pa Weèdi kpɛ́ɛpá.

Pɔ́dì wɛì o tɔmú wɛmá

¹⁹ Wódo Àkìdìpáà, é cɛ̰ɛ̰́-nà ye kú wɔ̀ni, n pú nɔhì-nà ye bɛkàma mɛ̀mà yɛ̀ni-má-ní nà hḭ́ǹka. ²⁰ N múńtà cedí caka Weèdi wɛmá Dàmásì yam̀ma-dà, é yídá tṵṵ̀na Sèdìsàdɛ́m̀ kpɛ́ɛpá, nà Sùdéè kpɛ́ɛpá wɛǹni, nà boocí tɔcí nìpa. N pà kpákádáà è yɔ̀ pá peǹta pa̰á̰ma-dà, é tóní Weèdi pesá, é bɛka pa pa̰á̰ma mɛhɛká è yɔ̀ pà pèǹtà. ²¹ Ye kú kpɛ́mú-dà tee, kà Sùwífùpa é n cɛ̰ɛ̰́ Weèdi hɔ̰́ɔ̰̀ta mùǹku mɛhɛká, è kpɛ̀i é n kɔ̀ù. ²² Àmá, kà Weèdi n púsí, háá yenì kà n sɔ̰ncí è cakú n dɛ́hà-sa nà n yeèkaà-sa nìpa wɛǹni, kpɛ̰́m̀ma nà bííhí. N pú cakú yècɛ̰́ɛ̰̀ k'yè ceń-nà Weèdi wɛtɛ̰́nápa nà Mɔ̀yísì de cakáà è yɔ̀ mìì pení-sa-ní. ²³ Pà de yɔ̀ Weèdi ta̰kadáko kó dii náńkú-dà, é n'yòǹ cecedó é yá̰ńtá kpíípa mɛhɛká, é caka wenkú wɛmá ti nìku nà boocí tɔcí.

Pɔ́dì kpɛ̀i kà Àkìdìpáà é hḭn Kídísì kóoó

²⁴ Pɔ́dì de káà sá̰á̰-sa-dà è pṵ́ṵ́kú o cɔ̰́ɔ̰̀di, kà Fɛ̀sìtúsì é dedí kpeéma è yɔ̀: A fikadà-á-ma Pɔ́dì! A yá̰á̰sàma-dà tee k'àa yudí é yó fidí. ²⁵ Kà Pɔ́dì óò tɛ̰́ná è yɔ̀: N pú fikadà, dapàǹkpɛ́ǹn. Wɛmà n wɛì-mà yòǹ bemú-dà è káá cɔ̀ku. ²⁶ Wódo Àkìdìpáà yá̰á̰-ma miya̰, mií-ì tee n yè wɛì-ma o yìhìka è pú dàsi yècḭ́ḭ̀. N yá̰á̰-ma è yɔ̀ ye yècḭ́ḭ̀ p'óò bìnì-nà mìì tee-sá, sɔ̀sɔ̀ma mɛhɛká dɔ yè pa̰à̰-ma. ²⁷ Wódo Àkìdìpáà, a dań-dà Weèdi wɛtɛ̰́nápa wɛdà-sa? N yá̰á̰-ma è yɔ̀ a dań.

²⁸ Kà Àkìdìpáà é tɛ̰́ná Pɔ́dì è yɔ̀: Wɔ̀ni cɛ̰́masí tṵ́m̀kaà, a kó n kpáhìna Kídísì kóoó-dà^a. ²⁹ Kà Pɔ́dì é tɛ̰́ná è yɔ̀: K'yè kpɛ̀i k'yé n'yòǹ wɔ̀ni cɛ̰́masí yoo yè yókáà, n cɔɔ̀hu Weèdi è yɔ̀ yè dá n'yòǹ a cɔ̰́ɔ̰̀di, àmá nà nɛ́na mɛ̀m̀pà kú wɛnnì n besí-pà yenì kú daadí, è yɔ̀ nɛ́ kpáńtá n yòm̀pu, àmá nɛ dá dúú dákátì mɛntì kú mɛhɛká.

³⁰ Ma hḭ́ǹka, kà Wódo, nà yɔtí yìkàǹyìko, nà Bèdènísì, nà mɛ̀m̀pà kú wɛnnì de yè kàdi-pá, é yídá, ³¹ é n'yɛtì, è cakú-ho pa tɔɔ̀pa è toò: Dɔɔò mɛnǹ pú pa̰à̰ yècḭ́ḭ̀ k'yè sànà kódeedí yoo p'óò kɔ̀ù.

³² Kà Àkìdìpáà é caka Fɛ̀sìtúsì è yɔ̀: K'yèe dɔɔò de pú hḭ́n ò kpɛ̀i kà Hɔ̀dɔ́m̀ wóosào óò sída, a de kó nɛɛ́ ò wɛ́í-ma.