Tɔná 25

Pɔ́dì kpɛ̀i Hɔ̀dɔ́m̀ Wóosào óò sída

¹ Fɛ̀sìtúsì tɛ̀ni-má-ní é pa̰á̰ daàa kàta̰a̰ ye tempáàku mɛhɛká, ka kú dàhàka, k'ó yídá Sèsàdéè é póńtá Sèdìsàdɛ́m̀. ² Kà dɔ̀hàka yam̀ma nà Sùwífùpa kpɛ̰́m̀ma é tɛ̀ni o pesá, é caka Pɔ́dì pa̰à̰-sa é yɛ̰̀ḭ ye hḭ́ǹka dɛ́dɛ́í. ³ Kà p'óò cɔ̀hà, è yɔ̀ ó pà pa̰á̰ nììma, é tɛ̰́ná-ní Pɔ́dì Sèdìsàdɛ́m̀ mɛhɛká. Pà de kpɛ̀i é woòka nìpa-dà cɔ̀ku óò kɔ̀ù. ⁴ Àmá, kà Fɛ̀sìtúsì é pà tɛ̰́ná è yɔ̀: Pɔ́dì péé kódeedí mɛhɛká, Sèsàdéè yɔtí. N mɔ́nń mɛ̀ɛ pú kó yóka é tón ti mɛhɛká. ⁵ K'ó tuɛ̀ha è yɔ̀: Nɛ kpɛ̰́m̀ma é n bɛ́hìna Sèsàdéè. K'yè yònà ye dɔɔò pa̰à̰ yècḭ́ḭ̀ k'yè pú coó, kà p'óò yíí sídàpu.

⁶ Kà Fɛ̀sìtúsì é pa̰á̰ daàa kànìì yoo píta kpɛ́ɛmá sá̰à̰di pa yɔtí mɛhɛká, é nɛɛ́ tón Sèsàdéè. K'yé weka, k'ó taá kaàdi sídàma nahàku mɛhɛká, é kɔ̰́ɔ̰́ nùdi è yɔ̀ pá ya̰à̰-ní Pɔ́dì. ⁷ Ò tɛ̀ni-má-ní, kà Sùwífùpa mɛ̀m̀pà de yɛɛ̀ni-pá-ní nà Sèdìsàdɛ́m̀, é tɛ̀ni óò yéńtá-ho, óò pṵ́á niìi dɔ́ɔ́di hḭ́ǹka k'yè pú coó. Há̰kà, p'oòcɔ̰́ǹ de pú kó nɛɛ́ é bɛka ye mìì yòǹ-sa bemú. ⁸ Kà Pɔ́dì mɛnn pṵ́ṵ́kú o cɔ̰́ɔ̰̀di è tonà: N pú yetà-nà Sùwífùpa kpɛ̰́ńtìnùka, n pú yetà-nà Weèdi hɔ̰́ɔ̰̀ta, n mɛ̀ɛ pú yetà-nà Hɔ̀dɔ́m̀ Wóosào.

⁹ Fɛ̀sìtúsì mɛnn há̰ de kpɛ̀i-má Sùwífùpa óò n'naanà tá, k'ó béka Pɔ́dì è yɔ̀: A kpɛ̀i é taá Sèdìsàdɛ́m̀ é tɛ̀i kà p'áa síi-nà n yìhìka ye wɛkù hḭ́ǹka?

¹⁰ Kà Pɔ́dì é tɛ̰́ná è yɔ̀: N nɛɛ̀hi Hɔ̀dɔ́m̀ Wóosào sídàma nahàku mɛhɛká-dà, ye pesà-dà mɛ̀ɛ dɛɛ̀ pà yònà n síi-nà-ma. A mɔ́nń yá̰á̰-ma sukú, è yɔ̀ n pú pa̰à̰ Sùwífùpa yècḭ́ḭ̀ k'yè sḭ̀ǹ. ¹¹ Kà n káá yetádi-dà yoo n pa̰à̰ yècḭ́ḭ̀-dà k'yè sànà pá n kɔ̀ù, n pú kó yeda kṵ́mú. Àmá, k'yècḭ́ḭ̀ kɔ́ɔ́ è yòǹ mɔ́masí ye nìpà n pṵ́nì-sà wɛnnì hḭ́ńkà, òcɔ̰́ǹ pú yònà é n taàa pa nɔ̀hi mɛhɛká. N kpɛ̀i Hɔ̀dɔ́m̀ Wóosào-dà é n sída.

¹² Ye wɔ̀ni, kà Fɛ̀sìtúsì é wɛɛ́-nà mɛ̀m̀pà d'oò teǹ-pa ye sídàma mɛhɛká, kà pá nɛɛ̀hi nùdi nìcɔ̰́ kú hḭ́ǹka. Ye kú dàhàka, k'ó caka Pɔ́dì è yɔ̀: A yɔ̀ a kpɛ̀i kà Hɔ̀dɔ́m̀ Wóosào-dà áa síde-è, a kɔ́dí o pesá-dà k'ò k'áa sída.

Pà tanà Pɔ́dì Àkìdìpáà nà Bèdènísì pesá

¹³ K'yé hḭn daàka cɛ̰́ma, kà wódo Àkìdìpáà n'ɔ̀ɔ potɔ̰ɔ̰̀ɔ̰ Bèdènísì é tɛ̀ni Sèsàdéè è kó dɔa Fɛ̀sìtúsì. ¹⁴ Kà pá m'péé ye pesá é pa̰á̰ daàka dɔ́ɔ́di, kà Fɛ̀sìtúsì é caka ye wódo Pɔ́dì wɛmá, è yɔ̀: Dɔɔ̀o òcɔ̰́ǹ-dà péé miì, kà Fèdísì ò hédà kódeedí mɛhɛká. ¹⁵ N taá-ma Sèdìsàdɛ́m̀, kà dɔ̀hàka yam̀ma kpɛ̰́m̀ma nà Sùwífùpa kpɛ̰́m̀ma-dà é tɛ̀ni óò yíí sídàpu n pesá, é n cɔhà è yɔ̀ ń ò kɔ̀ù. ¹⁶ Ká n pà tɛ̰́ná è yɔ̀, Hɔ̀dɔ́m̀pa pú hɔ̰́ kɔ̀ù nìdo ma kú bookù, è mum pú hédà ye yaǹn k'ó pṵ́tá o cɔ̰́ɔ̰̀di, o kà̰à̰tɔɔ̀pa ò pṵ́ṵ́nì-sa kú hḭ́ǹka. ¹⁷ Ye wɔ̀ni, kà pá n nɛǹta-ní é tɛ̀ni miì. N mɛ̀ɛ pú ceí é yóka, k'yé weka, ká n dúú é kaàdi sídàma nahàku, é kɔ̰́ɔ̰́ nùdi è yɔ̀ p'óò ya̰à̰-ní. ¹⁸ K'òo kà̰à̰tɔɔ̀pa é tɛ̀ni, kà n màhu è toò pà k'óò pṵ́ṵ́-sa kó n'dɔǹ-ń-dà dɛ́dɛ́í, àmá mɛma há̰ de dɔ. ¹⁹ Pà de ò nɔ̀hù-nà pa bookú pa̰á̰ma hḭ́ǹka-dà, nà Sèsíì òcɔ̰́ǹ kú hḭ́ǹka k'ò tḭn kpíi, kà Pɔ́dì mɛnn toò ò fòù. ²⁰ N de pú yá̰á̰ n kó sída-má kú bookú ye wɛmà mɛmà-ní. Ye kú kpɛ́mú-dà tee, ká n de béka Pɔ́dì, k'ò kpɛ̀i é taá Sèdìsàdɛ́m̀, é tɛ̀i kà p'óò síi-nà ka bɛ́ka ye wɛmà hḭ́ńkà-ní. ²¹ Àmá k'ó yeda, è yɔ̀ ò kpɛ̀i kà Hɔ̀dɔ́m̀ wóosào-dà óò sída. Mɛmá-dà, ká n kɔ̰́ɔ̰́ nùdi è yɔ̀ pà mun óò n'hḭ́ḭ́ kódeedí mɛhɛká, háá ká n ò nàǹci-ho wóosào.

²² Kà Àkìdìpáà é caka Fɛ̀sìtúsì è yɔ̀: N de kpɛ̀i-í-ma é besí n mɔ́ńǹ, ye dɔɔò. Kà Fɛ̀sìtúsì óò tɛ̰́ná è yɔ̀: Kṵ́ńweǹni, a k'óò besí.

²³ K'yé weka, kà Àkìdìpáà nà Bèdènísì é tɛ̀ni, è fɔ̀di-nà-ní nìpa dɔ́ɔ́di. Kà pá tɛ̀ni é dúú sídàma nàmɔ̀ni mɛhɛká, è nɔɔ̀nà sósìpa kpɛ̰́m̀ma, nà yɔtí kpɛ̰́m̀ma. Kà Fɛ̀sìtúsì é kɔ̰́ɔ̰́ nùdi kà pá tɛɛ̀ní Pɔ́dì. ²⁴ Ye wɔ̀ni, kà Fɛ̀sìtúsì yɔ̀: Wódo Àkìdìpáà, nà nɛ́na mɛ̀m̀pà kú wɛnnì pɛ́ɛ̀ ti péé-nà-pa miì, wáńtá-nà ye dɔɔò mɛnǹ. Sùwífùpa wɛǹni-dà tɛ̀ni é n dɛ́há n'ɔ̀ɔ kpɛ́mú, Sèdìsàdɛ́m̀ mɛhɛká nà miì, è toó hoodí è yɔ̀ ò koò pú yònà é n'fòù. ²⁵ Mmí kú pesá, n cɔ́ɔ́ é n'hɔ̰́tà ò pú pa̰à̰ yècḭ́ḭ̀ k'yè sànà ó kpíí. Há̰kà, ò yɔ̀ ò kpɛ̀i wóosào-dà óò sída. N ta̰kadà è k'óò n'ɔ̀ɔ̀ nàǹci-í-ma-ho. ²⁶ N há̰ pú káá yècḭ́ḭ̀ è kó wa̰hà o hḭ́ǹka, é naǹci-ho wóosào. Ye kú kpɛ́mú-dà tee n ò tɛɛ̀-ma-ní, fɔ̰́ń wódo Àkìdìpáà yìhìka, nà tɔɔpà nɛ́na, è kpɛ̀i á ò béka, k'yé teha ye kú dàhàka ká n dɛ́tá n kó wa̰hà-sa. ²⁷ N pú sɛdáà k'yè sudi, n naǹci-ho mɛmà kpenáku, è pú wekànà mìì tee-sá kà pà kù pṵ́ṵ́nì.