Kɔ̀dɛ́ńtìpa Pɔkàcecetá 16

Dící tɔ́hɔ́kàma è kó tempanà Sèdìsàdɛ́m̀ weèdɔɔ̀-nàmɔ̀ni

¹ Mìì héé-sa dící nɛ kó tɔ́hɔka-cí é naǹci Sèdìsàdɛ́m̀ weèdɔɔ̀pa, n cakáà-á-ma Kàdàsíì tempáàku weèdɔɔ̀-hòǹhòka kà yònà é hḭmpú é cì dúùwa. Nɛ mɛ̀ɛ té tṵṵ̀na pà kó hḭmpú. ² Yà̰ka wɛǹni, bá nɛ mɛ̀ǹǹ dɛ̀ɛ̀-ko té deèda dífa ò dɛ́tà-fa mɛhɛká ò kó nɛɛ́ deèda-fá, é fà hḭ́ná bɛ́ɛ́kú o hɔ̰́ɔ̰̀ta mɛhɛká. Mɛma, nɛ pú kó n'ceí n tɛ̀mmá-ní, é nɛɛ́ cetá ci tɔ́hɔ́kàma. ³ Kà n tɛ̀ni tḭ́ń daadí, n kó tɔn-ń-ma nìpa nɛ kó ta̰kadá-pa kà pá tanà nɛ pa̰ká Sèdìsàdɛ́m̀. N kó pà tɔn é pà kɔ̰́ɔ̰́-nà pɔ̀kàhi-dà mɛ̀ǹhì cakú-hi è yɔ̀ tḭ́ńti-dà pà tɔn-hɔ̰. ⁴ K'yè mɛ̀ɛ békú ń tadí n mɔ́nń, ti kó nɔdá-ma é tadí.

Cà̰ǹci Pɔ́dì kpɛ̀i é taá-ci

⁵ N kó yɛ̀ɛ̀-nà Màsèdɔ́nì tempáàku-dà é nɛɛ́ tɛ̀i-ho nɛ hɔ̰́ɔ̰́hí, è yá̰á̰ n kó kù dèta-á-ma. ⁶ K'yè púdí n kó tɛ̀ni é pa̰á̰ daàka kàcɔ̰́kà-dà nɛ hɔ̰́ɔ̰́hí , k'yè púdí ká n tɛ̀ni pa̰á̰ sémú wɔ̀ni wɛǹni nɛ pesá, ye wɔ̀ni kà nɛ́ n tempanà ká n sɔ̰kadá n cɔ̀ku n kɔ́dí-ka. ⁷ N pú kpɛ̀i ye kú tɛ̀mmà mɛmà-ní, é nɛ dɛ́há sá̰à̰di é n'kɛ̰hɛdi. N kpɛ̀i é tɛ̀ni é nɛ pa̰á̰-nà daàka cɛ̰́ma-dà, kà Teó kpɛ̀i. ⁸ Há̰kà, n baà kó m'péé Èfɛ́sì yɔtí-dà háá kà Pà̰ǹtèkótì kúúdi daadí tɛ̀ni, ⁹ è yá̰á̰, bòdi sàdi-dà n dɛ́tà-ma è kó pa̰á̰ tɔmú, nà n kà̰à̰tɔɔ̀pa há̰ baà sṵ́n-sà.

¹⁰ Kà Tìmɔ̀téè tɛ̀ɛ-ho, kà n'ɔ́ɔ̀ codá sukú nɛ cɔhɔ̀ka k'yé teha k'òo yàma é n'nadi, è yá̰á̰ ò púsí Teó dehèmu-dà é n'yònà mmí. ¹¹ Ye kú kpɛ́mú, òcɔ̰́ǹ dá yetá óò yɔ̰́sa. Àmá n'ɔ́ɔ̀ tempanà óò kɔ̰́ɔ̰́ yè k'óò béka-sá k'ó tóní n pesá nà wɛ̀ɛ̀di, è yá̰á̰ n ò ceí-ma nà weèdɔɔ̀pa tɔɔ̀pa mɛ̀m̀pà ò nɔɔ̀nà-pa-ní.

¹² Ti kúcàa Àpòdósì mɛnn, n ò kpákádáà-á-ma cɔ̀kumá dɔ́ɔ́di è yɔ̀ ó nɛǹta ti kúcàpa tɔɔ̀pa é taá nɛ pesá, àmá k'ó yeda è yɔ̀ ò pú kà péé-ho sá̰mà. K'ò dɛ́tà bòdi, ò kó kà tɛ̀i-í-ma-hɔ̰.

Tencí dèǹdèǹci nà cɔɔ̀ma

¹³ Nɛ́ n'you, kà nɛ dandaní ní n'kpenì. Nɛ́ n'káá kṵnɔ̀ǹci, é n'kpenì Weèdi cɔ̀ku mɛhɛká. ¹⁴ Nɛ́ m'pa̰kú niìi wɛǹni nà dɔ́kàma.

¹⁵ N kúcàpa nà n potɔ̰ɔ̰̀pa-nà, nɛ yá̰á̰-ma Sìtèfànásì n'ɔ̀ɔ hɔ̰́ɔ̰́tà kpɛ́ɛpá. Nɛ káà dèn-ń-ma è yɔ̀ Àkàyíì tempáàku wɛǹni mɛhɛká, mɛmpá-dà de héé cecepá é kɔ̰́ɔ̰́ pa cɔ̰́ɔ̰̀di Weèdi. Nɛ mɛ̀ɛ yá̰á̰-dà pà de kɔ̰́káàma pa cɔ̰́ɔ̰̀di Weèdi dehèmu hḭ́ǹka, è tempú-nà weèdɔɔ̀pa tɔɔ̀pa. N nɛ cɔɔ̀hu è yɔ̀ ¹⁶ nɛ́ m'bekù ye kú yammà kú bookù-ní, nà mɛ̀m̀pà kú wɛnnì kɔ̰́nì-pa pa cɔ̰́ɔ̰̀di tenten kà pà pɛ́ɛ̀ è dehú.

¹⁷ Yè n naa-á-ma nà Sìtèfànásì, nà Fɔ̀tùnàtúsì, nà Àkàìkúsì tɛ̀ni-má-ní. Pà tɛ̀ni é n pa̰á̰ nɛ de k'éè m'péé é n pa̰á̰-sa-dà. ¹⁸ Pà tɛ̀ni é kaàna n yàma-dà é n'yònà pà hḭmpú nɛ kpɛ́ɛmá. Nɛ́ n'nɔn è sɛdí ye kú yamà kú bookù-ní.

¹⁹ Àsíì tempáàku weèdɔɔ̀-hòǹhòka nɛ dɔń. Àkìdásì nà Pììsídì, é pɛ́ɛ́-nà weèdɔɔ̀pa mɛ̀m̀pà pèèku-pá pa hɔ̰́ɔ̰̀ta mɛhɛká, nɛ dɔń sukú nà Teó yèdi. ²⁰ Nɛ weèdɔɔ̀tɔ̀pa mɛ̀m̀pà péé-pa miì mɛ̀ɛ té nɛ dɔń. Nɛ́ dɔa nɛ tɔɔ̀pa sukú nà yàma màcɔ̰́.

²¹ Mmí, Pɔ́dì-dà wà̰haà ye dɔɔmù mɛmù nà n nɔ̀ku.

²² Kà nìi pú dɔ́sí Teó, kà nɔdàma óò m'péé-nà. Màdànàtáà, ti Teó pení.

²³ Ti Teó Sèsíì pa̰á̰suumá é nɛ m'péé-nà! ²⁴ N nɛ dɔ́sí-ma nɛ wɛnnì, nà ti múń-ma kpɛ́mú Sèsí-Kídísì mɛhɛká.