Kɔ̀dɛ́ńtìpa Pɔkàcecetá 14

Weèdi Sèdi pa̰ká yònà tempanà weèdɔɔ̀pa wɛǹni-dà.

¹ Ye kú kpɛ́mú, pɛha-nà é n'káá dɔ́kàma é nɛɛ́ pɛha tɔɔ̀sa wɛǹni. Ní m'pɛnti-nà mɛ̀ɛtékà Weèdi Sèdi pa̰ká, é n'ta̰à̰ni ni wɛmá è mà tɛ̰́nì kú pa̰dí kú dàkà. ² Kà nìi wɛì boocí è pú cì yá̰á̰, ye yaǹn pú hɔ̰́ n'wɛì-nà nìpa, àmá ò hɔ̰́ n'wɛì-nà Weèdi-dà, è yá̰á̰ òcɔ̰́ǹ pú hɔ̰́ n'you ò tonàpù. Weèdi Sèdi-dà mɛ̀ɛ hɔ̰́ hédá k'ó n'wɛì Weèdi wɛbeèka mɛ̀ǹkà sɔ̀ɔ-ká. ³ Mɛ̀ǹǹ mɛ̀ɛ ta̰à̰ni-kó Weèdi wɛmá è mà tɛ̰́nì, ye yaǹn hɔ̰́ n'wɛì-n'ɔ̀ɔ nìpa tɔɔ̀pa-dà, è pà teǹ, è yahikanì pa wɔ̰̀ǹti, è kpekanì pa dandaká. ⁴ Mɛ̀ǹǹ wɛì-ko boocí ò pú yá̰á̰-ci, ò hɔ̰́ n'kpekànì o cɔ̰́ɔ̰̀di kú dandaní-dà. Mɛ̀ǹǹ mɛ̀ɛ ta̰à̰ni-kó Weèdi wɛmá è mà tɛ̰́nì, mɛnn hɔ̰́ n'kpekanì weèdɔɔ̀pa hòǹhòni wɛǹni dandaní-dà.

⁵ N kpɛ̀i-í-ma kà nɛ wɛnnì ní n'wɛì boocí nɛ pú yá̰á̰-ci, àmá n há̰ kpɛ̀i-sá sàma-dà héé nɛ́ n'ta̰à̰ni Weèdi wɛmá è mà tɛ̰́nì. Mɛ̀ǹǹ tà̰ni-kó Weèdi wɛmá è mà tɛ̰́nì, ò ha̰tà-á-ma mɛ̀ǹǹ wɛì-ko boocí è pú cì yá̰á̰, òcɔ̰́ǹ aa m'péé-ma bààsí é n'cakú ò wɛì-sa tonàpu k'yé tempanà weèdɔɔ̀-hòǹhòni wɛǹni.

⁶ N kúcàpa nà n potɔ̰ɔ̰̀pa-nà, k'yè yònà n tɛ̀ni è nɛ wɛì-nà boocí nɛ pú yá̰á̰-ci, m̀mɔ́ńya̰-dà n nɛ tempúnà-ma? Kà n há̰ tɛ̀ni è nɛ toó-ní wɛmá Weèdi n fohìnà-ma-dà, yoo yá̰á̰ma màcɔ̰́mà, yoo wɛmá nì hḭ́n ń nɛ tɛ̰́ná-ma, yoo n nɛ toó-ní biɔhànamá màcɔ̰́mà, ntoò mií-dà kó nɛ tempanà-ma?

⁷ Tí tódá-nà yohènamá heutá nà kódìku hḭ́ǹka. K'yè yònà ye dawòka de pú ceń, ntɛ́ ti de kó hḭmà é m'baàku bá ye mìì dɛ̀ɛ̀-sa dawòni? ⁸ Kà mɛ̀ǹǹ heu-kó tṵ́ńtṵ́di pú heé ta̰à̰pu dawòni pópóí, woò mɔ́ńn-dà kó dɔ̀hà ta̰à̰pu sɔ̀do? ⁹ Ma cɔ̰́ɔ̰̀di-dà mɛ̀ɛ té dɛɛ̀. Kà nɛ wɛì-nà nìpa boocí wɛmá pà pú yá̰á̰-ci, ntɛ́ pà kó hḭmà é yekà nɛ wɛì-sa? Yè sá̰kà nɛ wɛì kpeèsa-dà mɛmɛ-ɛ̀! ¹⁰ Boocí wɛmá sṵ́n dɔ́ɔ́di-dà teǹka hḭ́ǹka, ye kú màcɔ̰́mà mɛ̀ɛ kɔ́ɔ́ kà pà mà wɛì kà mà pú cakú yècḭ́ḭ̀. ¹¹ Há̰kà, kà nìi wɛì wɛmá kà n pú mà you, ye yaǹn kó n'yòǹ cà̰ǹn-dà n pesá, kà n mɛ̀ɛ té n'yòǹ cà̰ǹn o pesá. ¹² Ma cɔ̰́ɔ̰̀di-dà nà nɛ́na. Nɛ pɛnti-mà dɛ́dɛ́í Weèdi Sèdi pa̰ká, nɛ́ kà pɛha é kà n'káá sàma, àmá nɛ́ dɔ̀hà é pɛha mɛ̀ǹkà kó nɛɛ́ tempanà-ka weèdɔɔ̀-hòǹhòni kà ní kpɛ̰́ń.

¹³ Ye kú kpɛ́mú-dà tee, mɛ̀ǹǹ wɛì-ko boocí ò pú yá̰á̰-ci yònà é cɔhà-ma Weèdi, kà n'ɔ́ɔ̀ pa̰a̰ pa̰dí k'ó n'nɔn è tɛ̰́nì ò wɛì-sa tonàpu. ¹⁴ Kà n pa̰kú weèdɔɔ̀pu nà boocí n pú yá̰á̰-ci, n sèdi-dà hɔ̰́ n'dɔń, n yam̀màhàdi mɛni pú hɔ̰́ n'dehú. ¹⁵ N kó pa̰á̰ badà ye wɔ̀ni? N kó dɔwa-á-ma nà n sèdi, é tṵ́má nì dɔwa nà n yam̀màhàdi. N kó deèn-ń-ma nà n sèdi, é tṵ́má deèn nà n yam̀màhàdi. ¹⁶ Kà mɛma dɔ, k'à sɛɛ́ Weèdi a yàma mɛhɛká, ntɛ́ mɛ̀ǹǹ kàdi-kó è pú you a tonàpu, ò kó hḭmà é tɛ̰́ná é n'yɔ̀ k'yé mà n'yòǹ, a Weèdi sɛdàma mɛhɛká? ¹⁷ Bá k'àa Weèdi sɛdàma suukú sá̰á̰ma, mà pú tempúnà tɔɔ̀o o dandaní kpemú hḭ́ǹka.

¹⁸ N sɛɛ́ Weèdi, nà nì n pɛ̰ḭ-má kà n wɛì boocí n pú yá̰á̰-ci é nɛ ha̰tá nɛ wɛnnì. ¹⁹ Nà mɛma, weèdɔɔ̀-hòǹhòni tíkáma mɛhɛká, kà n kpɛ̀i é biɔhàna tɔɔ̀pa, n hɔ̰́ n'naanà ń wɛdá wɛmá cɛ̰́masí-dà nìi kó nɛɛ́ yekà-ma. N pú hɔ̰́ n'naanà é nɔ́káná wɛmá dɔ́ɔ́di dɔ́ɔ́di nìi pú kó nɛɛ́ yekà-ma.

²⁰ N kúcàpa nà n potɔ̰ɔ̰̀pa-nà, nɛ dá m'maàhu è wɛì è yònà bííhí, àmá nɛ́ m'maàhu è wɛì è yònà kpɛ̰́m̀ma. Há̰kà, kpákpààma pa̰á̰ma hḭ́ǹka, nɛ́ n'kɔ́ɔ́ màcɔ̰́mà é n'yònà bíipàǹhi. ²¹ Pà wà̰tà Weèdi pɔ̀kàhi mɛhɛká è yɔ̀ Bateó yɔ̀:

Nà nìpa mɛ̀m̀pà wɛì-pa boocà̰ǹci-dà,

n kó yɛ̀ɛ̀-ma é wɛɛ́-nà ye nìkù mɛnkù-ní.

Nà cà̰m̀ma nùka-dà n kó pà wɛɛ́-nà-ma.

Nà mɛma baàkaà, kù pú kó n besí.

²² Boocí a pú yá̰á̰-ci wɛɛ́ma yòǹ yḭdó-dà mɛma mɛ̀m̀pà pú yòǹ-pa weèdɔɔ̀pa pesá, ò pú yòǹ yḭdó weèdɔɔ̀pa pesá. Àmá, Weèdi wɛmá ta̰ǹtamá é mà tɛ̰́ná kú pa̰dí mɛni yòǹ yḭdó-dà weèdɔɔ̀pa pesá, nì pú yòǹ yḭdó mɛ̀m̀pà pú yòǹ-pa weèdɔɔ̀pa pesá.

²³ K'yè yònà weèdɔɔ̀pa hòǹhòni tísí è wɛì boocí pà pú yá̰á̰-ci pa wɛǹni, k'yè yònà mɛ̀m̀pà pú yá̰á̰-pa Weèdi, yoo mɛ̀m̀pà pú yá̰á̰-pa yè yòm̀pu tɛ̀ni ye pesá, pà pú kó pà tódá fìkapá dò? ²⁴ K'yàá yònà pa wɛǹni ta̰à̰ni Weèdi wɛmá-dà è mà tɛ̰́nì, kà mɛ̀ǹǹ pú yòǹ-ko weèdɔɔ̀o yoo mɛ̀ǹǹ kpɛ̀i é besí-ko sá̰à̰di, tɛ̀ni ye pesá ò kó yekà-sa wɛn-wɛǹni k'óò pḭ́ń-ma k'ó bantá o sḭ̀ḭ̀ma. ²⁵ Ò de sɔ̀ɔ-sá o yàma mɛhɛká kó fodá-ma dɛ́dɛ́í, ye wɔ̀ni ò k'ó hìu-ú-ma é sḭ́ná yudí, é fa̰nta Weèdi è yɔ̀:

Mɔ́ma-dà Weèdi péé-ma nɛ cɔhɔ̀ka!

Nɛ dá m'pa̰kú niìya̰ yákìyákì weèdɔɔ̀-nàmɔ̀ni mɛhɛká

²⁶ N kúcàpa nà n potɔ̰ɔ̰̀pa-nà, m̀mɔ́ńya̰-dà nɛ yònà é m'pa̰kú-ma? Kà nɛ té petà è kó dɔwa Weèdi, n'ɔɔ̀cɔ̰́ kó nɛɛ́-ma é deèn nɛ́yɛ̰̀ǹfa, kà tɔɔ̀ɔ é biɔhàna Weèdi wɛmá, kà tɔɔ̀ɔ é caka Weèdi ò bɛkáà-sa, kà tɔɔ̀ɔ é wɛɛ́ nà bookú ò pú yá̰á̰-ku, kà tɔɔ̀ɔ é wekàna ò wɛɛ̀-sa tonàpu. Ye wɛnnì há̰ yònà é pa̰á̰ cóńcodí-dà, k'yé teha k'yé tempanà weèdɔɔ̀-hòǹhòni kà ni dandaní é kpɛ̰́ń. ²⁷ Kà nìpa kpɛ̀i é wɛɛ́ boocí pà pú yá̰á̰-ci, kà pá wɛɛ́ nìi pàdɛ́ɛ́ yoo pàta̰di pà dá ha̰tá mɛma, pà mɛ̀ɛ é wɛɛ́ òcɔ̰́ òcɔ̰́, kà tɔɔ̀o é caka pà wɛì-sa tonàpu. ²⁸ K'òòcɔ̰́ǹ kɔ́ɔ́ è kó caka pà wɛì-sa tonàpu, kà pá hḭn wá̰m nìpa cɔhɔ̀ka, é n'wɛì-nà pa cɔ̰́ɔ̰̀di nà Weèdi sá̰à̰di. ²⁹ Mɛ̀m̀pà tà̰ni-pá Weèdi wɛmá è mà tɛ̰́nì mɛmpa, pàdɛ́ɛ́ yoo pàta̰a̰ sá̰à̰di té wɛdá, kà tɔɔ̀pa é yṵmpà pà wɛɛ̀-sa é dɛ́há k'yè sà. ³⁰ Kà Weèdi kɔ̰́ɔ̰̀-ní òcɔ̰́ǹ ni wɛmá, k'yè hɔ̰́tà mɛ̀ǹǹ wɛì-ko, k'ó hḭn wá̰m. ³¹ Nɛ kó nɛɛ́-ma nɛ wɛnnì, é ta̰ǹta wɛmá Weèdi nɛ kɔ̰́ɔ̰̀-ma é mà tɛ̰́ná tɔɔ̀pa, àmá nɛ́ mà n'hɔ̰n òcɔ̰́ òcɔ̰́, k'yé teha kà nɛ wɛǹni é dɛ́tá biɔhànamá nà wɔ̰̀ǹti yahikànamá ma mɛhɛká. ³² Weèdi wɛtɛ̰́nápa hɔ̰́ nɛɛ́ cɛ̰ɛ̰́-ma pa cɔ̰́ɔ̰̀di ni wɛmá tɛ̰́náma wɔ̀ni. ³³ Weèdi pú yòǹ yákìyákìma Weèdi, àmá nì yòǹ wɛ̀ɛ̀di Weèdi-dà.

É n'yònà yè yòm̀pu weèdɔɔ̀-hòǹhòka wɛǹni mɛhɛká, ³⁴ poòpa pú yònà é wɛdá nɛ tíkáma mɛhɛká, è yá̰á̰ kpɛ̰́ńtìnùka pú pà pɛ̰ḭ nùdi è yɔ̀ pá wɛdá. Kà yɔ̀ pà yònà é kaàdi yɔkàma-dà é besí. ³⁵ Kà pà káá màcɔ̰́mà è kó béka, kà pà té mà béka pa daapá pa hɔ̰́ɔ̰́hí mɛhɛká. Yè pú sudi è yɔ̀ poòo ní n'wɛì weèdɔɔ̀pa hòǹhòni mɛhɛká.

³⁶ Nɛ maàhu Weèdi wɛmá cetà nɛ pesà-dà? Nkɛ́ɛ̀ nɛ maàhu è tonà nɛ cɔ̰́ɔ̰́dì-dà mà yèkaà? ³⁷ Kà nìi maàhu è toò ò yòǹ Weèdi wɛtɛ̰́náko yoo Weèdi Sèdi dehú o mɛhɛká, ye yaǹn yònà é teha-á-ma è yɔ̀ wɛmà n nɛ wa̰à̰hu-mà, mà yòǹ Teó nùdi-dà. ³⁸ K'ò mɛ̀ɛ pú teháà n nɛ wa̰à̰hu-sà, yè bɛkú è yɔ̀ Weèdi-dà mɛ̀ɛ té p'óò yá̰á̰.

³⁹ Kà mɛmá-dà n kúcàpa nà n potɔ̰ɔ̰̀pa-nà, pɛha-nà tenten Weèdi wɛmá ta̰ǹtamá é mà tɛ̰́ná tɔɔ̀pa kú pa̰dí. Nɛ dá n'kpanì tɔɔ̀pa pà kó n'wɛì-ma boocí pà pú yá̰á̰-ci. ⁴⁰ Àmá nɛ́ m'pa̰kú niìi wɛǹni k'yé n'coó, kà yákìyákìma é n'kɔ́ɔ́.