Kɔ̀dɛ́ńtìpa Pɔkàcecetá 13

Dɔ́kàma-dà ha̰tà

¹ Bá kà n wɛì nìpa boocí wɛmá nà Weèdi tɔntɔndipá kpɛ́ɛmá, kà n pú káá dɔ́kàma, n yònà máabéńti-dà yoo cekedeǹta è toó hodí sá̰à̰di. ² K'yè mɛ̀ɛ yònà Weèdi n pɛ̰ḭ pa̰dí kà n tà̰ni ni wɛmá è mà tɛ̰́nì, k'yè yònà nì n pɛ̰ḭ kà n yá̰á̰ ni kpɛ́ɛsá wɛǹni mìì sɔ̀ɔ-sá, è n pɛ̰ḭ yá̰á̰ma wɛǹni pa̰dí, è n pɛ̰ḭ dandankpeèdi wɛǹni kà nì kó nɛɛ́ é tuhìna ta̰à̰ka, kà n pú káá dɔ́kàma, n yòǹ hécí-dà. ³ Bá kà n kó nɛɛ́ totá n kááma wɛǹni pɛ́íhí, hádí é múńtá yɔ̀ɔ kɔ̰́ɔ̰́ n wɔ̰̀ǹku kà pá kù tɔ̀n ha̰mú, kà n pú káá dɔ́kàma, yè pú n tempú-nà yècḭ́ḭ̀.

⁴ Kà nìi káá dɔ́kàma, ò hɔ̰́ n'káá mùyɔ̰-dà. Dɔ́kàma pa̰kú tɔɔ̀pa nììma-dà. Mà pú kpɛ̰dì tɔɔ̀o kpɛ́ɛsá, mà pú hókánì, mà mɛ̀ɛ pú káá fóńfóǹti. ⁵ Dɔ́kàma pú pa̰kú fɛɛ̀kɔ́ɔ̀mu pa̰á̰ma, mà pú hɔ̰́ m'bɔhàta ma kú cɔ̰́ɔ̰̀di cɔ́ǹti, mà pú mɔkú fɔ̰́ɔ̰́di, mà mɛ̀ɛ pú hɔ̰́ n'wɔ̰ncí tɔɔ̀pa. ⁶ Dɔ́kàma pú naanà pa̰á̰ma mɛ̀mà pú coó-ma, àmá mà naanà wɛbeèdi-dà. ⁷ Dɔ́kàma hɔ̰́ bútá-ma dàhàka tɔɔ̀pa yetáka wɛǹni, mà hɔ̰́ teha-á-ma tɔɔ̀pa cakú-sa wɛǹni, mà hɔ̰́ n'dań-ma niìi wɛǹni mɛhɛká, mà mɛ̀ɛ hɔ̰́ toó-ma niìi wɛǹni.

⁸ Dɔ́kàma pú kó yɔ̀ɔ daadí yènì. Mìì héé-sa Weèdi n'wɛì k'à tɛ̰́nì ni wɛmá, yè kó nɛɛ̀hi-í-ma daadí yènì, kà boocí a pú yá̰á̰-cí kú wɛdáma kó yɔ̀ɔ, é yídá kà yá̰á̰ma kó yɔ̀ɔ. ⁹ Yè kó hḭmpú-dà mìì tee-sá, ti yá̰á̰ma pú cɛ̰̀di, ni wɛmá ti mɛ̀ɛ ta̰à̰ni-má è mà tɛ̰́nì mɛ̀ɛ té pú cɛ̰̀di. ¹⁰ Àmá niìi mìì weni-sá kó tɛ̀ni tḭ́ń daadí, mìì pú cɛ̰̀di-sá kó yɔ̀ɔ-ɔ́-ma.

¹¹ N de káà yòǹ tḭ́ń daadí bíitá, è wɛì è yònà bíitá-dà, è màhu è yònà bíitá, è dìhu niìya̰ è yònà bíitá. N kpɛ̰́ń tḭ́ń wɔ̀ni, ye wɔ̀ni é wɛ́í bíkéḿpa̰á̰ma. ¹² Yenì kpɛ́ɛ́dì-ní, ti dìi niìya̰ k'yè ti binì-í-ma, t'eè dìi k'yè yònà díhikú mɛhɛká-dà. Àmá daadí kó pɛdá-ma kà t'éè dɛ́há pópóí ti yìhìka. Yenì kpɛ́ɛ́dì-ní, n pú yá̰á̰ é cɛ̰ɛ̰̀na, àmá daadí kó pɛdá-ma ká n yá̰dá dɛ́dɛ́í é n'yònà Weèdi n yá̰káàma.

¹³ Sá̰mà-ní, niìi yèta̰a̰ miì-dà péé è pú kó yɔ̀ɔ, mií-dà héé: Dandaní, nà daḿma, nà dɔ́kàma. Àmá ye ta̰à̰kà mɛhɛkà, dɔ́kàma-dà ha̰tà.