12
Weèdi Sèdi pa̰ká
1 Tí sóńtá sá̰mà mìì héé-sa Weèdi Sèdi pa̰ká. N kúcàpa nà n potɔ̰ɔ̰̀pa-nà, n pú kpɛ̀i k'yèècḭ́ḭ̀ é nɛ m'binì-nà ka hḭ́ǹka. 2 Nɛ mɔ́mpá yá̰á̰-ma è yɔ̀ nɛ de mun pú yá̰á̰ tḭ́ń wɔ̀ni Weèdi, k'yècḭ́ḭ̀-dà nɛ yɛ̰ṵ̀ wàci mɛ̀ǹcì pú wɛì-ci dɔɔ̀mu mɛhɛká kà nɛ pú kó nɛɛ́ yee-nà nɛ cɔ̰́ɔ̰̀di. 3 Ye kú kpɛ́mú-dà tee n kpɛ̀i nɛ caka-má è yɔ̀: Òcɔ̰́ǹ pú kó nɛɛ́ n'yɔ̀ ò wɛì nà Weèdi Sèdi nɔɔ̀ti-dà, ye wɔ̀ni è há̰ wɛdá è yɔ̀: Nɔdàma dɔdi Sèsíì hḭ́ǹka. Òcɔ̰́ǹ mɛ̀ɛ pú kó nɛɛ́ n'yɔ̀ Sèsíì yòǹ Teó-dà, k'yè pú yòǹ nà Weèdi Sèdi kú nɔɔ̀ti.
4 Weèdi Sèdi pa̰ká yòǹ cɛ̰má dɔ́ɔ́di-dà, àmá Weèdi Sèdi yòǹ nìcɔ̰́-dà è kà pɔ̰n. 5 Weèdi tɔná yòǹ cɛ̰má dɔ́ɔ́di-dà, àmá ti nà pa̰kú Teó òcɔ̰́ kú kpɛ́mú-dà. 6 Cɔ̀ci Weèdi hɔ̰́ yɛ̀ɛ̀-ci é deha-nà cì yòǹ cɛ̰má dɔ́ɔ́di-dà, àmá Weèdi nìcɔ̰́-dà cì tṵ̀nì è pa̰kú ye kú niì wɛǹni pa fòùmu mɛhɛká. 7 Weèdi Sèdi bɛkú ni kpeèti bá mɛ̀ǹǹ dɛ̀ɛ̀-ko mɛhɛká, nìpa wɛǹni suumá kpɛ́mú-dà. 8 Òcɔ̰́, Weèdi Sèdi hɔ̰́ ò pa̰a̰ k'ò ní n'wɛì nà yaǹfòùma-dà, tɔɔ̀o, k'yèe Sèdi ni cɔ̰́ɔ̰̀di óò pa̰a̰ k'ó n'káá yá̰á̰ma. 9 Nìi tɔɔ̀o, k'yèe Sèdi ni cɔ̰́ɔ̰̀di óò pa̰a̰ dandankpeèdi. É yídá tɔɔ̀o, ye Sèdi ni cɔ̰́ɔ̰̀di, kà n'ɔ́ɔ̀ pa̰a̰ pa̰di k'ò ní n'kpekànì mɔkàpa. 10 Nìi tɔɔ̀ɔ, kà n'ɔ́ɔ̀ pa̰a̰ pɔ́ńtápa̰á̰ma kú pa̰dí. É yídá tɔɔ̀ɔ, kà n'ɔ́ɔ̀ pa̰a̰ pa̰dí k'ò ní n'ta̰à̰ni Weèdi wɛmá è mà tɛ̰́nì. Tɔɔ̀ɔ, kà n'ɔ́ɔ̀ pa̰a̰ k'ó n'nɔn è bàhù Sèka. Tɔɔ̀o, kà n'ɔ́ɔ̀ pa̰a̰ pa̰dí, k'ó n'nɔn è wɛì boocí ò pú yá̰á̰-ci. É yídá tɔɔ̀o, kà n'ɔ́ɔ̀ pa̰a̰ pa̰dí, k'ó n'nɔn è tɛ̰́nì pà wɛì-sa ye boocí mɛhɛká tonàpu. 11 Ye Weèdi Sèdì ni cɔ̰́ɔ̰́dì-dà pa̰kú mii kú wɛnnì, è tookú ye pa̰kà bá mɛ̀ǹǹ dɛ̀ɛ̀-ko nì kpɛ̀kaàma.
Wɔ̰̀ǹku kùcɔ̰́, nà bɛ̀m̀bɛ̀ka dɔ́ɔ́di há̰kà
12 Nìi wɔ̰̀ǹku yòǹ kùcɔ̰́-dà è há̰ káá bɛ̀m̀bɛ̀ka dɔ́ɔ́di. N'ɛ̀ɛ bɛ̀m̀bɛ̀kà pú pɛ́ɛ́ pɛ́ɛ́-sà nà ka tɔɔ̀ka, kà baà múń è yòǹ wɔ̰̀ǹku kùcɔ̰́-dà. Ma cɔ̰́ɔ̰̀di-dà mɛ̀ɛ dɛɛ̀ nà Kídísì. 13 Ti wɛnnì-ní, Sùwífùpa nà mɛ̀m̀pà pú yòǹ-pa Sùwífùpa, núm̀ma nà mɛ̀m̀pà pú yòǹ-pa núm̀ma, pà de ti cóńtà nà Weèdi Sèdi nìcɔ̰́-dà kà tí hḭn wɔ̰̀ǹku kùcɔ̰́ kú kpɛ́ɛpá. Ti wɛǹni, ti de niì ye Sèdi ni cɔ̰́ɔ̰̀di kú nɛ́ɛmá-dà.
14 Wɔ̰̀ǹku pú káá bɛ̀m̀bɛ̀ni nìcɔ̰́, àmá kù káá bɛ̀m̀bɛ̀ka dɔ́ɔ́di-dà. 15 K'yè yònà tàdi hḭ́n: N pú yòǹ nɔ̀ku, n pú péé wɔ̰̀ǹku mɛhɛká. Ye kú kpɛ́mú-dà kó n'tee kà nì koò pú n'yòǹ wɔ̰̀ǹku bɛ̀m̀bɛ̀ni? 16 K'yè mɛ̀ɛ yònà toodí hḭ́n: N pú yòǹ nɔ̀ǹfa, n pú péé wɔ̰̀ǹku mɛhɛká. Ye kú kpɛ́mú-dà kó n'tee kà nì koò pú n'yòǹ wɔ̰̀ǹku bɛ̀m̀bɛ̀ni? 17 Kà wɔ̰̀ǹku wɛǹni de yòǹ nɔ̀ǹfa-dà, ntɛ́ kù kó hḭmà é n'you wɛmá? K'yè mɛ̀ɛ yònà ku wɛǹni de yòǹ toodí-dà, ntɛ́ kù kó hḭmà é n'you nɔ́kú? 18 Weèdi hḭ́nà wɔ̰̀ǹku bɛ̀m̀bɛ̀ni bá mɛ̀nì dɛ̀ɛ̀-di kú hḭ́ǹka, nì kpɛ̀kaàma-dà. 19 Kà wɔ̰̀ǹku wɛǹni de yòǹ bɛ̀m̀bɛ̀ni nìcɔ̰́-dà, è yenì ti pú kù toò wɔ̰̀ǹku. 20 Nìi wɔ̰̀ǹku yòǹ kùcɔ̰́-dà è há̰ káá bɛ̀m̀bɛ̀ka dɔ́ɔ́di.
21 Mií-dà tee nɔ̀ǹfa pú kó nɛɛ́-ma é caka nɔ̀ku è yɔ̀: N tɔmú a kɔ́ɔ́-nà. Yudí mɛ̀ɛ pú kó nɛɛ́ é caka tàka è yɔ̀: N tɔmú nɛ kɔ́ɔ́-nà. 22 Múńdìkaà, wɔ̰̀ǹku bɛ̀m̀bɛ̀ka mɛ̀ǹkà sém̀ kɔ́ɔ́-ka kpeèti, kà káá tɔmú-dà tenten. 23 Bɛ̀m̀bɛ̀ka ti pú kɛɛ̀hi-ká, mɛnká-dà ti hɔ̰́ cuùwa-má sàma. Ti mɛ̀ɛ káá-nà-ka fɛ̀ci, ti hɔ̰́ kà n'wisí-ma dɛ́dɛ́í. 24 Ti mɛ̀ɛ pú káá-nà-ka fɛ̀ci, ti pú hɔ̰́ kà n'wisí ma kú bookú. Weèdi há̰ pa̰à̰ wɔ̰̀ǹku, é dɔ̀hà é pa̰a̰ cuùmá ku bɛ̀m̀bɛ̀ka mɛ̀ǹkà mà kɔ́ɔ́-ma-dà. 25 Nì hḭn mɛma, è kpɛ̀i kà totáma-dà é n'kɔ́ɔ́ wɔ̰̀ǹku bɛ̀m̀bɛ̀ka cɔhɔ̀ka, àmá kà ká n'tempúnà ka tɔɔ̀ka. 26 Kà wɔ̰̀ǹku bɛ̀m̀bɛ̀ni nìcɔ̰́ yon náńkú, tɔɔ̀ka wɛǹni mɛ̀ɛ té hɔ̰́ kù n'yon-nà-á-ma ye náńkú. Kà pà mɛ̀ɛ cuwà ku bɛ̀m̀bɛ̀ni nìcɔ̰́, tɔɔ̀ka wɛǹni hɔ̰́ m'péé wɛ̀ɛ̀di mɛhɛká-dà nà mɛní.
27 Nɛ há̰ yòǹ Kídísì wɔ̰̀ǹku-dè, bá nɛ mɛ̀ǹǹ dɛ̀ɛ̀-ko k'ò yòǹ ku bɛ̀m̀bɛ̀ni nìcɔ̰́. 28 Ma kú bookú-dà Weèdi hḭ́nà-ma weèdɔɔ̀pa hòǹhòni mɛhɛká, nìpa dɔ́ɔ́di bá mɛ̀ǹǹ dɛ̀ɛ̀-ko n'ɔ̀ɔ tɔmú: Cecemá, nì hḭ́nà Sèsíì tɔntɔndipá-dà, dɛ́ɛ́ma Weèdi wɛtɛ̰́nápa, ta̰á̰ma Weèdi wɛmá biɔhànapá. É yídá, nì pɛ̰ḭ-pá pa̰dí kà pà pa̰kú pɔ́ńtápa̰á̰ma kà pà péé, kà mɛ̀m̀pà káá-pa mɔkàpa kpekànamá pa̰dí péé, kà mɛ̀m̀pà káá-pa tempàma kpɛ́ɛdí péé, kà mɛ̀m̀pà kó nɛɛ́ nihí-pa tɔɔ̀pa péé, é yídá kà mɛ̀m̀pà kó nɛɛ́ n'wɛì-pa boocí pà pú yá̰á̰-ci péé. 29 Pa wɛǹni pú yòǹ Sèsíì tɔntɔndipá, yoo Weèdi wɛtɛ̰́nápa, yoo Weèdi wɛmá biɔhànapá. Pa wɛǹni mɛ̀ɛ pú pa̰kú pɔ́ńtápa̰á̰ma, 30 yoo è kpekanì mɔkàpa, yoo è wɛì boocí pà pú yá̰á̰-ci, yoo è n'nɔn è tɛ̰́nì pà wɛì-sa boocí mɛhɛká tonàpu. 31 Nɛ́ pɛha Weèdi Sèdi pa̰ká mɛ̀ǹkà ha̰tà-ka tɔɔ̀ka wɛǹni.
Ye kú kpɛ́mú, n kó nɛ bɛka sá̰mà-ní, cɔ̀ku mɛ̀ǹkù ha̰tà-ku-dà tɔcí wɛǹni.