Kɔ̀dɛ́ńtìpa Pɔkàcecetá 11

¹ Tempa-nà é tṵṵ̀na n fòùmu yòm̀pu é n'yònà n mɔ́nń tempú-ma è tṵ̀n Kídísì kpɛ́mú.

Poòo nà dɔɔ̀o báatí weèdɔɔ̀-nàmɔ̀ni mɛhɛká

² N nɛ cóńtí-ma nà nɛ dèn-má n kpɛ́mú wɔ̀ka wɛǹni, nà nɛ tṵ́mà púsí-ma biɔhànamá pà n biɔhànà-ma kà n mɛ̀ɛ té mà nɛ biɔhàna, nɛ pú mà pèǹtà. ³ Há̰kà, n kpɛ̀i nɛ́ yekà miì-dà sukú: Kídísì-dà yòǹ dɔɔ̀o wɛǹni kpɛ̰́ǹn, kà dɔɔ̀o yòǹ poòo kpɛ̰́ǹn, é yídá kà Weèdi yòǹ Kídísì kú kpɛ̰́ǹn. ⁴ Kà dɔɔ̀o dɔń Weèdi yoo ò tɛ̰́nì ni wɛmá è yídí yìcḭ́ḭ̀ o yudí hḭ́ǹka, ò yɔ́kánì o kpɛ̰́ǹn-dà. ⁵ Kà poòo mɛnn há̰ dɔń Weèdi yoo ò tɛ̰́nì ni wɛmá n'ɔ̀ɔ yukpeèdi, ò yɔ́kánì o dɔɔ̀o-dà. Yè yònà ye kú wɔ̀nì ò koó-ma-dà yuhá̰há̰dídi. ⁶ Kà poòo pú yídí yècḭ́ḭ̀ o yudí, k'ó cemá kodí yuhá̰há̰dídi. K'yè há̰ yòǹ fɛ̀ci-dà è yɔ̀ poòo é kɛ̰ḭ o yùti yoo ó tì kodí há̰há̰dí, k'ó yídí yècḭ́ḭ̀ o yudí. ⁷ Dɔɔ̀ɔ mɛnn pú yònà é yídí yècḭ́ḭ̀ o yudí hḭ́ǹka, è yá̰á̰ Weèdi ò pa̰à̰ k'ò nì yònà-á-ma è tṵ́mà bɛkú ni wɛhimú. Poòo mɛnn bɛkú dɔɔ̀o kú wɛhimú-dà. ⁸ Nɛ yá̰á̰-ma è yɔ̀ Weèdi pú dedà poòo wɔ̰̀ǹku mɛhɛká yècḭ́ḭ̀ é pa̰á̰-nà dɔɔ̀o, àmá nì dèdà dɔɔ̀o kpɛ́kú mɛhɛká-dà yècḭ́ḭ̀ é pa̰á̰-nà poòo. ⁹ Weèdi mɛ̀ɛ pú pa̰à̰ dɔɔ̀o poòo kpɛ́mú, àmá nì pa̰à̰ poòo dɔɔ̀o kpɛ́mú-dà. ¹⁰ Mɛmá-dà tee, poòo yònà yídí-ma yècḭ́ḭ̀ o yudí hḭ́ǹka, mìì kó m'bɛkú-sa kpɛ̰́ǹti o dɔɔ̀o káá-ti o hḭ́ǹka. Ò mɛ̀ɛ yònà é mà hḭn Weèdi tɔntɔndipá kpɛ́mú-dà. ¹¹ Há̰kà, Teó cɔ̀ku mɛhɛká, poòo pú yòǹ yècḭ́ḭ̀ kà dɔɔ̀o kɔ́ɔ́, dɔɔ̀o mɛ̀ɛ pú yòǹ yècḭ́ḭ̀ kà poòo kɔ́ɔ́, ¹² è yá̰á̰ dɔɔ̀o wɔ̰̀ǹku mɛhɛká-dà pà dènà-ma-ní poòo, kà poòo há̰ té tṵ́má pɛdá dɔɔ̀o, pa dɛ́ɛ̀ka há̰ péé-nà-ní Weèdi pesá-dà.

¹³ Nɛ mɔ́mpá é cɔ́ɔ́ dɛ́hé-è: Yè suú-dà è yɔ̀ poòo é n'dɔń Weèdi è pú yídí yècḭ́ḭ̀ o yudí hḭ́ǹka? ¹⁴ Pemá mɔ́mmá nɛ biɔhànì-í-dà è yɔ̀ fɛ̀ci-dà kà dɔɔ̀o toó yuùdɛutí. ¹⁵ Àmá poòo mɛnn kú pesá, yè ò yòǹ yèdi-dà k'ò tì toó, è yá̰á̰ Weèdi tì n'ɔ̀ɔ̀ pɛ̰ḭ kà tì yòǹ o pɛ́ńkú-dà. ¹⁶ Kà nìi há̰ tṵ́mà kpɛ̀i é n'sɔ̰ncí è nɔ̀hù ye hḭ́ǹka, k'yèe yaǹn n'yá̰á̰ è yɔ̀ tḭ́ńti nà weèdɔɔ̀-hòǹhòka, ti pú mantà ye kú pa̰á̰mà.

Teó dipú hḭ́ǹka

¹⁷ Wɛmá tɔɔ̀ma n kpɛ̀i nɛ caka-mà miì, mɛmá-dà héé nɛ peètamá hḭ́ǹka. N pú kó nɛ cóńta ye kú hḭ́ǹka è yá̰á̰ mà pú nɛ tempúnà, mà múńtà dɔ̀haà nɛ cɔ̰hú-ma. ¹⁸ N cedí é yekà kà pà yɔ̀ kà nɛ petà, totáma-dà hɔ̰́ m'péé nɛ cɔhɔ̀ka, n mɛ̀ɛ maàhu è yɔ̀ yècɔ̰́ yòǹ mɔ́ma-dà. ¹⁹ Yè békú totáma-dà é m'péé nɛ cɔhɔ̀ka, k'yé teha kà tí bantá nɛ mɛ̀m̀pà yòǹ-pa weèdɔɔ̀pa mɔ́mpá. ²⁰ Kà nɛ petà, yè koò pú hɔ̰́ n'yònà nɛ kó dii-má Teó dipú-dà, ²¹ è yá̰á̰ kà nɛ yɔ̀ɔ kaàdipú è kó dii, bá nɛ mɛ̀ǹǹ dɛ̀ɛ̀ hɔ̰́ cemá pa̰á̰ fem̀ma é tódá o mɔ́nń kú dipú-dà é dii, ye wɔ̀ni kà kòni té n'kɔdì pàcɔ̰́, kà tɔɔ̀pa há̰ té dii é yà̰à̰-nà naàma hádí é yó bɔń. ²² Nɛ pú káá-ní hɔ̰́ɔ̰́hí è kó nɛɛ́ dii é yà̰à̰-nà-ní hi mɛhɛká? Nɛ yɔ̰́sí Weèdi kpɛ́ɛpá hòǹhòni-dà, nkɛ́ɛ̀ nɛ kpɛ̀i é diá fɛ̀ci mɛ̀m̀pà pú toó-pa-ní yècḭ́ḭ̀? Nɛ hḭ́n ń nɛ n'yɔ̀ badà? Ń nɛ cóńta? Ṵ́ṵ̀, ye kú hḭ́ńkà-ní n pú kó nɛɛ́ nɛ cóńta.

²³ Kákamú pa̰á̰ma n nɛ bɛkáà-mà-ní, Teó-dà mà nà n biɔhànà: Teó Sèsíì, yèǹka pà de k'óò yɛda-ká mɛhɛká, ò de tódà pɛ̰́ɛ̰̀-dà, ²⁴ é sɛda Weèdi, óò wɛ́ha è yɔ̀: Miì yòǹ n wɔ̰̀ǹku-dà n kɔ̰́nì-ku nɛ kpɛ́mú. N'ɛ́ɛ̀ m'pa̰kú é n'dèn n kpɛ́mú. ²⁵ Ma cɔ̰́ɔ̰̀di hḭ́ǹka, pà yɔ̀ɔ-má dipú, k'ó tódá bondidí nà dìfɛ̰́ɛ̰̀ è yɔ̀: Dìfɛ̰́ɛ̰̀ mɛnǹ yòǹ múnápààma-dà Weèdi pa̰kú-ma nà n hḭ̀ma. Wɔ̀ka wɛǹni kà té k'óò nìì, kà nɛ té mà hḭn é deǹta n kpɛ́mú. ²⁶ Yè sá̰kà, wɔ̀ka wɛǹni kà nɛ yon ye pɛ̰́ɛ̰̀, è yɔ̰̀ǹ-nà ye dìfɛ̰́ɛ̰̀, nɛ cakú Teó kṵ́mú-dà háá o tóḿma-ní.

²⁷ Yè kú kpɛ́mú-dà tee, kà nìi dii Teó pɛ̰́ɛ̰̀, è nìì-nà o dìfɛ̰́ɛ̰̀ è p'éè kɛ̀dà yècḭ́ḭ̀, ye yaǹn kɔ̰́nì o cɔ̰́ɔ̰̀di-dà yetádi Teó wɔ̰̀ǹku n'ɔ̀ɔ hḭ̀ma hḭ́ǹka. ²⁸ Yè yòǹ-mà mɛma, bá mɛ̀ǹǹ dɛ̀ɛ̀-ko té cɔ́dí o cɔ̰́ɔ̰̀di o yàma mɛhɛká, é nɛɛ́ dii ye pɛ̰́ɛ̰̀ é yà̰à̰-nà ye dìfɛ̰́ɛ̰̀-ní. ²⁹ Mɛ̀ǹǹ kó dii-kó ye pɛ̰́ɛ̰̀-ní, é yà̰à̰-nà ye dìfɛ̰́ɛ̰̀ è pú n'kɛdà Teó wɔ̰̀ǹku yècḭ́ḭ̀, ye yaǹn húdi ha̰nkɔ̰ká-dà o yudí hḭ́ǹka. ³⁰ Ye kú kpɛ́mú-dà tee, nɛ cɔhàka, kà mɔkàpa dɔ́ɔ́di sṵ́n, nà hɔ̀ùhi, kà nɛ sààpa múńtà kpíi. ³¹ Kà ti mɔ́mpá cɔ́dí ti fòùmu yòm̀pu ti yàma mɛhɛká, Weèdi koò pú kó ti sída. ³² Àmá Teó yɔ̰́ǹ ti toòka, è kpɛ̀i ti nadí-ma, k'yé teha kà ti dá wáńtá dúú ni sídàma mɛhɛká é n'yònà fòùku kpɛ́ɛpá.

³³ Kà mɛmá-dà n kúcàpa nà n potɔ̰ɔ̰̀pa-nà, kà nɛ té petà è kó dii Teó dipú, kà nɛ té ceí nɛ tɔɔ̀pa. ³⁴ Kà kòni té káá nìdo, k'ò té dii-ní o hɔ̰́ɔ̰̀ta. Mɛma, nɛ peètemá koò pú kó n'yɔ̰́ǹ-ní Weèdi sídàma nɛ hḭ́ǹka.

Békàma tɔɔ̀ma mɛ̀mà kaá-ma, kà n tɛ̀i-ho tḭ́ń daadí nɛ hɔ̰́ɔ̰́hí n kó mà dɔ̀hà.