Kɔ̀dɛ́ńtìpa Pɔkàcecetá 8

Màǹci pà dɔ̀haà-ci wàci fɔ̰̀ka

¹ Tí sóńtá sá̰mà békàma nɛ békáà-ma màǹci pà dɔ̀haà-ci wàci fɔ̰̀ka. Nɛ yɔ̀ ti wɛǹni ti káá-dà yá̰á̰ma ye kú hḭ́ǹka, bemú-dà mɛ̀ɛ dɛɛ̀. Àmá ye kú yá̰á̰mà há̰ tɛɛ̀hu-nà-ní fóńfóǹti-dà. Dɔ́kàma mɛma madì hɔ̰́ɔ̰̀ta-dà. ² Kà mɛ̀ǹǹ màhu-kó è tonà ò yá̰á̰ yècḭ́ḭ̀, ye yaǹn mun pú yá̰á̰ ò yònà é yá̰dá-sa. ³ Àmá, kà nìi dɔ́sí Weèdi, nì yá̰á̰-ma ye yaǹn.

⁴ Nɛ békàma nɛ de békáà-ma è yɔ̀: Nɛ kó nɛɛ́ dii-í-dà màǹci pà dɔ̀haà-ci wàci fɔ̰̀ka? Ǹtɛ mmí n káá-ma. Ti yá̰á̰-dà è yɔ̀ wàci pú yohènì yècḭ́ḭ̀ k'yè yòǹ mɔ́ma fòùku mɛhɛká. Ti mɛ̀ɛ yá̰á̰-dà è yɔ̀ Weèdi yòǹ nìcɔ̰́-dà. ⁵ Nìpa tóńkú niìi dɔ́ɔ́di-dà, k'yè péé hḭ́ǹka nà teǹka mɛhɛká k'yè yòǹ pa wàci. Ye kú kpɛ́mú-dà tee, kà wàci yoo kpɛ̰́m̀ma dɔ́ɔ́di péé teǹka nà hḭ́ǹka. ⁶ Tḭ́ńti kú pesá há̰kà, ti yá̰á̰ è yɔ̀ Weèdi yòǹ nìcɔ̰́-dà. Mɛní mɛ̀nì yòǹ-di Báàa, è pa̰à̰ niìi wɛǹni, kà ti fòù ni kpɛ́mú. Teó yòǹ òcɔ̰́-dà. Mɛnń-dà héé Sèsí-Kídísì. Niìi wɛǹni péé nà mɛnń kú nɔɔ̀ti-dà, mɛnń-dà mɛ̀ɛ tee kà ti fòù.

⁷ Há̰kà, weèdɔɔ̀pa wɛǹni mun pú yá̰á̰ mii kú wɛnnì. Nɛ pàcɔ̰́ de mantà wàci fɔ̰̀ka-dà dɛ́dɛ́í, k'yé n'tee háá nà yenì, kà pà yon ye màǹci, k'yè té n'yònà pà cì dɔ̀haà-ma wàci fɔ̰̀ka. Ye wɔ̀ni, pà há̰ mun pú kpenì-ma Weèdi cɔ̀ku mɛhɛká tá, kà pa yàma té pà n'kɔkapú è yɔ̀ pà pú weni Weèdi yìhìka. ⁸ Dimá há̰ pú kó nɛɛ́ ti tɔ́káná nà Weèdi. Kà ti dii, yè pú kó ti tɔhɛ̀na yècḭ́ḭ̀. Kà ti pú dii, yè pú kó ti yakàda yècḭ́ḭ̀.

⁹ Há̰kà, nɛ́ pa̰á̰ yɔkàma, kà nɛ cɔ̰́ɔ̰̀di teemá dá hédá kà mɛ̀m̀pà kú dandaní pú kpenì-pa é dɔdi sḭ̀ḭ̀ma mɛhɛká. ¹⁰ K'yè yònà nìi mɛ̀ǹǹ kú dandaní pú kpenì-ko a dɛ́hà, fɔ̰́ń mɛ̀ǹǹ káá-ko yá̰á̰ma, k'à kàdi è yon wàfa hɔ̰́ɔ̰̀ta mɛhɛká, o yàma mɛhɛká, ò mɛ̀ɛ té pú kó mahà è yɔ̀ ò kó nɛɛ́ é dii-í-dà màǹci pà dɔ̀haà-ci wàci fɔ̰̀ka? ¹¹ Ye wɔ̀ni, n'àa yá̰á̰ma kú kpɛ́mú, ye mɛ̀ǹǹ kú dandaní pú kpenì-ko kó sèǹ-ń-ma. A kúcàa-dà há̰ dɛɛ̀, kà Kídísì kpíi o kpɛ́mú. ¹² Kà nɛ pa̰à̰ ma kú bookù sḭ̀ḭ̀ma nɛ kúcàpa, è cɔ̰háà pa yàma, nɛ yetà-nà Kídísì mɔ́nń-dà. ¹³ Ye kú kpɛ́mú, kà n kó dii-sá kó n'tee kà n kúcàa yoo n potɔ̰ɔ̰̀ɔ̰ é dɔdi sḭ̀ḭ̀ma mɛhɛká, n koò pú kó cécí màǹci k'yé teha kà n dá pà hɛ́í.