Kɔ̀dɛ́ńtìpa Pɔkàcecetá 9

Pɔ́dì yení pà yònà óò pa̰á̰-sa

¹ N pú káá foóma è yɔ̀ ń pa̰á̰ n kpɛ̀i-sá-a? N pú yòǹ Sèsíì tɔntɔndikó-a? N pú dɛ́hà Sèsíì ti Teó? Nɛ́na pú yòǹ Teó tɔmú n pa̰à̰-pu kú bíiká-dò? ² Bá kà tɔɔ̀pa yení pà kó teha-má è yɔ̀ n yòǹ Sèsíì tɔntɔndikó, nɛ́na kú pesá n ò yòǹ-ń-ma dɛ́dɛ́í, mìì tee-sá n tɔmú-dà tee kà nɛ múń nà Teó. Nɛ mɔ́-mɔ́mpá-dà yòǹ niìya̰ mìì bɛkú-sa è yɔ̀ n ò yòǹ.

³ Ǹtɛ n hɔ̰́ tɛ̰́ńkamá mɛ̀m̀pà wɛì-pa kpákpààma n hḭ́ǹka: ⁴ Ti pú sànà é ta̰ǹta ti kó dii-sá nà ti kó yà̰à̰-sa ti tɔmú kpɛ́mú? ⁵ Ti pú káá foóma kà t'oòcɔ̰́ǹ kó nɛɛ́ n'kɛ̰hidi cà̰ǹku è nɔɔ̀-nà o poòo, é n'yònà tɔntɔdipá tɔɔ̀pa, nà Teó kúcàpa, nà Píyɛ́ɛ̀ hɔ̰mpú? ⁶ Nkɛ́ɛ̀ mmí nà Bàànàbásì cɔ̰́ɔ̰̀di-dà yònà é ká̰tá wìku é nɛɛ́ dii? ⁷ Sóso wodà hɔ̰́ m'péé sósìma mɛhɛká, é tṵ́má m'bopù o cɔ̰́ɔ̰̀di? Woò hɔ̰́ híúwá tená è há̰ pú kó dii na bíiká? Cɛ̰nto woò hɔ̰́ n'cɛ̰ǹ nɔtí è há̰ pú kó yà̰à̰ ti mɛhimá?

⁸ Kà n kɔ̰́nì ye kú yohènamà-ní, nɛ dá n'toò nìpa cɔ̰́ɔ̰̀di pesá-dà yè pa̰kú-ma? Bá Mɔ̀yísì kpɛ̰́ńtìnùka hḭ́mpú-dà. ⁹ Mɔ̀yísì wà̰tà o kpɛ̰́ńtìnùka mɛhɛká è yɔ̀: Dá bowá nàfa nùdi yɔ̀ka kɔ̰ṵmá wɔ̀ni^a è yɔ̀ fà dá kà dii. Nɛ toò Weèdi de kɔń nàfa-dà é wɛɛ́ mɛma? ¹⁰ Ti kú kpɛ́mú pú tee kà nì de mà wɛdá? Mɛmá-dà-ma, ti kú kpɛ́mú-dà de tee kà pá mà wà̰ta. Yè békú è yɔ̀ mɛ̀ǹǹ bɔɔ̀-ko ní n'dehú è dań-ma è yɔ̀ ò kó n'káá o kú todidí. Yè békú è yɔ̀ mɛ̀ǹǹ kɔ̰ṵ-kó ní n'dehú è dań-ma è yɔ̀ ò kó n'káá o kú todidí. ¹¹ Ti bɔɔ́ Weèdi wɛmá-dà nɛ yàma mɛhɛká é n'yònà pà hɔ̰́ bɔkamá dití yoǹku mɛhɛká. Sḭ̀ḭ̀ma há̰ péé ya-dà kà ti békáà nɛ kááma mɛhɛká niìi yècɔ̰́? ¹² Kà tɔɔ̀pa mà nɛ hɔ̰n, tḭ́ńti pú yònà é pa̰á̰ miya̰ é ha̰tá dò? Nà mɛma baàkaà ti pú mà hḭn. Múńdìkaà, ti teháà náńkú wɛǹni ti hḭ́ǹka, è pú kpɛ̀i k'yècḭ́ḭ̀-dà é kpaná nìpa pà kó yekà-ma Kídísì wɛnaamá. ¹³ Nɛ pú yá̰á̰ è yɔ̀ mɛ̀m̀pà dehú-pa Weèdi hɔ̰́ɔ̰̀ta mɛhɛká, pa dimá yɛɛ̀hu-ní ta mɛhɛká-dà? Mɛ̀m̀pà mɛ̀ɛ té pa̰kú-pa dɔ̀hàka cɔ̰̀ǹcɔ̰̀ka hḭ́ǹka, kà pa dimá yɛɛ̀hu-nà-ní ka pesá? ¹⁴ Mɛmá-dà mɛ̀ɛ té dɛɛ̀, Teó hḭ́nà-ma è yɔ̀ mɛ̀m̀pà cakú-pa o wɛnaamá, yònà é n'fòù-nà ma kú tɔmú-dà.

¹⁵ Mmí há̰kà, n pú deháà n'ɛ̀ɛ nùdì. N mɛ̀ɛ pú nɛ wa̰à̰hu-hɔ̰ è kpɛ̀i nɛ́ n naǹci-ní yècḭ́ḭ̀. N kṵ́mú kpɛ́ɛmá tɔ̰ṵ-ṵ́-ma. Òcɔ̰́ǹ mɛ̀ɛ pú kó nɛɛ́ n deèda ye kú yaǹnaakù-ní. ¹⁶ Mmí kú pesá, é caka Kídísì wɛnaamá pú yòǹ cɔ̰́ɔ̰̀di wɛkànamá, è yá̰á̰ yè békú má caka-á-ma, kà Weèdi mɛ̀ɛ é n towá è yɔ̀ ń mà caka. Kà n pú mà cakáà, nɔdàma-dà kó n'dɛɛ̀ n kpɛ́mú. ¹⁷ Kà n mɔ́nń-dà de ta̰kadà ye tɔmù-ní, n de kó n'ceí-ma è yɔ̀ pá n bodá. Há̰kà yè yòǹ-mà pà mù nà púkà nà kpeèti-dà, n pa̰kú tɔmú pà hḭ́n n pa̰á̰-pu-dà sá̰à̰di. ¹⁸ N boutí há̰ héé m̀mɔ́ńti-dà? Mɛntí-dà héé ń caka Kídísì wɛnaamá fàdà, è pú m'békáà boutí ma cakàma yònà é n kɔ̰́ɔ̰́-ti.

¹⁹ N pú yòǹ n'ɔɔ̀cɔ̰́ǹ kú núǹn, n tee n cɔ̰́ɔ̰̀di-dà. Nà mɛma baàkaà, ká ń kɔ̰́ɔ̰́ n cɔ̰́ɔ̰̀di é hḭn deho nɛ wɛǹni kpɛ́mú, è kpɛ̀i nìku dɔ́ɔ́di é teha Kídísì. ²⁰ Kà n péé-nà Sùwífùpa, n hɔ̰́ n'fòù è yònà Sùwífù-dà, è kpɛ̀i pá teha Kídísì. Kà n mɛ̀ɛ péé-nà mɛ̀m̀pà tṵ̀n-pá Mɔ̀yísì kpɛ̰́ńtìnùka, nà n pú kà tṵ̀n-sà, n hɔ̰́ kà tṵ̀na-á-ma è kpɛ̀i pá teha Kídísì. ²¹ Kà n péé-nà mɛ̀m̀pà pú yá̰á̰-pa Mɔ̀yísì kpɛ̰́ńtìnùka, n hɔ̰́ n'fòù è yònà n pú kà yá̰á̰-ma-dà è kpɛ̀i pá teha Kídísì. Mii há̰ pú kpɛ̀i é caka è yɔ̀ n pú tṵ̀n Weèdi kpɛ̰́ńtìnùka, è yá̰á̰ n tṵ̀n-ń-ma Kídísì kpɛ́ɛká. ²² Kà n péé-nà mɛ̀m̀pà pú kpenì-pa Weèdi cɔ̀ku mɛhɛká, n mɛ̀ɛ té hɔ̰́ m'pa̰kú è yònà mɛ̀ǹǹ pú kpenì-ko-dà è kpɛ̀i pá teha Kídísì. N hɔ̰́ kpáhìna n cɔ̰́ɔ̰̀di é hḭn bá pa mɛ̀m̀pà dɛ̀ɛ̀-pa yòm̀pu, è kpɛ̀i n'ɛ̀ɛ kú pa̰á̰mà wɛnnì, ń fḭ́hìna pa pàcɔ̰́-dà. ²³ N pa̰kú miì kú wɛnnì Sèsíì wɛnaamá kpɛ́mú-dà, k'yé teha ká n wáńtá n'káá todidí ma kááma mɛhɛká.

²⁴ Nɛ pú yá̰á̰ è yɔ̀ nìpa mɛ̀m̀pà pàhù-pa hɔ̰́ cocí-í-dà pa wɛǹni, àmá òcɔ̰́ pɔ́pɔ́ú-dà hɔ̰́ tódá tandánɔ́ɔdí? Yè yòǹ-mà mɛma, cocí-nà yè békúma kú bookú k'yé teha kà nɛ́ nì tódá. ²⁵ Cocokapá wɛǹni hɔ̰́ hḭ́ná pa cɔ̰́ɔ̰̀di niìya̰ dɔ́ɔ́di-dà pà yònà é nakadá-sa pa biɔhàma mɛhɛká. Pà mà hɔ̰n mɛma, è kpɛ̀i é dɛ́tá boutí mɛ̀ǹtì pú yókú-ti-dà cɔ̰hàpu. Àmá tḭ́ńti, ti mà hɔ̰n, è kpɛ̀i dɛ́tá boutí mɛ̀ǹtì pú kó cɔ̰ha-tí-dà daadí yènì. ²⁶ Ye kú kpɛ́mú-dà tee, mmí n pú cokù-ma hécí. N yònà mɛ̀ǹǹ poò-ko-dà nàǹwɛ̰ɛ̰̀ka, n mɛ̀ɛ pú kà podì kpeèsa. ²⁷ Múńdìkaà, n diinì n wɔ̰̀ǹku-dà náńkú tenten, è kù cɛ̰ɛ̰́ dɛ́dɛ́í, mìì tee-sá n wani n kó caka-má-dà tɔɔ̀pa Weèdi wɛnaamá, kà nì há̰ wáńtá n yeda.