Kɔ̀dɛ́ńtìpa Pɔkàcecetá 7

Pɔ́dì tɛ̰́nà kɔ̀dɛ́ńtìpa békàma potóóma hḭ́ǹka

¹ Sá̰mà, tí dentá nɛ n wa̰à̰haà-ní nɛ pɔ̀kàta é wɛɛ́-sa kú wɛmá. Nɛ yɔ̀: Yè suu-ú-ma è yɔ̀ dɔɔ̀o dá pḭ́ń poòo-è! ² Há̰kà, mmí n nɛ cakú-ma è yɔ̀ nà yáyámù mɛ̀mù sṵ́n-mù mɛmà kú kpɛ́mú, yè suu-ú-ma è yɔ̀ dɔɔ̀o bá mɛ̀ǹǹ dɛ̀ɛ̀-ko é n'káá o poòo, kà poòo bá mɛ̀ǹǹ dɛ̀ɛ̀-ko é n'káá o dɔɔ̀o. ³ Dɔɔ̀o yònà é pa̰ná hɔ̰́ɔ̰́tàdɔ̀o yònà é pa̰á̰-sa-dà o poòo, kà poòo yònà é pa̰ná hɔ̰́ɔ̰́tàpòo yònà ó pa̰á̰-sa o dɔɔ̀o. ⁴ Poòo pú tee o wɔ̰̀ǹti, o dɔɔ̀o-dà tì tee. Mɛmá-dà mɛ̀ɛ té dɛɛ̀, dɔɔ̀o pú tee o wɔ̰̀ǹti, o poòo-dà tì tee. ⁵ Nɛ dá yetá é m'mɔɔ̀ni nɛ tɔɔ̀pa. Y'aa n'yòǹ-ma nɛ yeèkaà nɛ tɔɔ̀pa bààsí, è yɔ̀ nɛ dá pḭ́ń nɛ tɔɔ̀pa daàka cɛ̰́masí mɛhɛká, k'yé teha kà nɛ́ dɔ̀hà é pa̰á̰ weèdɔɔ̀pu. Àmá ye kú dàhàka, nɛ yònà é tón é pɛ́dá-ma, k'yé teha kà Wɛɛ̀kupá wódo dá nɛ bɛń, mìì tee-sá nɛ pú kó nɛɛ́ cɛ̰ɛ̰́ nɛ cɔ̰́ɔ̰̀di.

⁶ N nɛ cakú-sà miì pú yòǹ nùdi kà n nì nɛ kɔ̰́nì, àmá pa̰á̰ma-dà n hḭ́n nɛ kó nɛɛ́ pa̰á̰-ma. ⁷ N kpɛ̀i-í-ma nìpa wɛǹni é n'yònà n yòm̀pù. Àmá, bá ti mɛ̀ǹǹ dɛ̀ɛ̀-ko, Weèdi ò pɛ̰ḭ o pa̰dí-dà. Òcɔ̰́ pa̰dì mɛnì, tɔɔ̀o pa̰dì mɛnì.

⁸ Ǹtɛ há̰kà n kpɛ̀i é caka-sa kpíipoòti nà dakɔ̰́hɔ̀ka: Yè suu-ú-ma è yɔ̀ pá n'sɔ̰ncí, é n'fòù pa cɔ̰́ɔ̰̀di é n'yònà mmí. ⁹ Àmá kà pà pú kó nɛɛ́ é cɛ̰ɛ̰́ pa cɔ̰́ɔ̰̀di ye kú hḭ́ǹka, kà pá tódá poòpa yoo é yan. Yè tɔ̰ṵ-ṵ́-ma è yɔ̀ á tódá poòo yoo é yan, nà níkú kó n'àà kɔ̀dì-ma.

¹⁰ Ǹtɛ nùdi n kɔ̰́nì-di weèdɔɔ̀pa mɛ̀m̀pà tóò-pa poòpa yoo daapá, nì mɛ̀ɛ pú péé-nà-ní n pesá, Teó-dà yɔ̀: Poòo pú yònà é yeda o dɔòo. ¹¹ K'ò mɛ̀ɛ ò yedáà, ò koò dá yan, kà mɛma dɔ, k'ó tón n'ɔ̀ɔ dɔɔ̀o kà pá naaka. Dɔɔ̀o mɛ̀ɛ té pú yònà ó bɔhà o poòo.

¹² Tɔɔ̀pa mɛ̀m̀pà mɛ̀ɛ té káá-pa poòpa nà daapá, ǹtɛ mmí n pà cakú-sa, yè mɛ̀ɛ pú yòǹ Teó-dà mà hḭ́n: Kà weèdɔɔ̀o káá poòo, k'ò pú yòǹ weèdɔɔ̀o, k'yèe poòo teháà è k'óò m'péé-nà, ò dá ò bɔ̀hà. ¹³ Kà poòo-dà mɛ̀ɛ káá dɔɔ̀o k'ò pú yòǹ weèdɔɔ̀o, k'yèe dɔɔ̀o teháà è k'óò n'káá, ò dá ò yeda. ¹⁴ N hḭ́n mɛma mìì tee-sá, ye dɔɔò mɛ̀ǹǹ pú yòǹ-kò weèdɔɔò, ò hḭn Weèdi kóoó-dà nà múnáma ò pa̰à̰-ma n'ɔ̀ɔ poòo kpɛ́mú. Ma cɔ̰́ɔ̰̀di-dà nà poòo mɛ̀ǹǹ mɛ̀ɛ té pú yòǹ-ko weèdɔɔ̀o, ò hḭn Weèdi kóoó-dà nà múnáma ò pa̰à̰-ma n'ɔ̀ɔ dɔɔ̀o kpɛ́mú. Kà mɛma dɔ, pa bííhí kó n'yònà hì nátà-nà-ma-dà Weèdi, è pú yá̰kà hì yòǹ Weèdi kpɛ́ɛ́hí-dà. ¹⁵ Há̰kà, nìi n'ɔ̀ɔ poòo, kà pa mɛ̀ǹǹ pú yòǹ-ko weèdɔɔ̀o kpɛ̀i é yeda tɔɔ̀o, kà p'óò hédá k'ó pa̰á̰ ò kpɛ̀i-sá. Ye wɔ̀ni, yècḭ́ḭ̀ koò pú péé mìì tṵḿ-sa ye poòo n'ɛ̀ɛ dɔɔ̀o cɔhɔ̀ka, è yá̰á̰ Weèdi nɛ yíí è yɔ̀ nɛ́ n'fòù wɛ̀ɛ̀di mɛhɛká-dà. ¹⁶ Pooò fɔ̰́ń mɛ̀ǹǹ yòǹ-ko weèdɔɔ̀o, ntɛ́ a kó hḭmà é n'yá̰á̰ è yɔ̀ a kó fḭ́hìna a dɔɔ̀o? Yoo dɔɔò fɔ̰́ń mɛ̀ǹǹ yòǹ-ko weèdɔɔ̀o, ntɛ́ a kó hḭmà é n'yá̰á̰ è yɔ̀ a kó fḭ́hìna a poòo?

Bá mɛ̀ǹǹ dɛ̀ɛ̀-ko dá cehèna Weèdi ò yíí k'ò yòm̀pu

¹⁷ É m'bààsí miya̰, bá mɛ̀ǹǹ dɛ̀ɛ̀-ko é n'sɔ̰ncí é n'fòù Teó ò pɛ̰ḭ è yɔ̀ ó n'fòù-ma kú bookú, ò dá peǹta yècḭ́ḭ̀ Weèdi de kó n'kó ò yíí k'ò yòm̀pu. Ye kú nùdì-dà n hḭ́nà-ma weèdɔɔ̀-nàmɔ̀ka wɛǹni mɛhɛká. ¹⁸ Kà Weèdi yíí nìdo è hɔ̰́tà ò ca̰ntà, ò dá yetá é sɔɔ̀na o ca̰ntáma. Kà Weèdi mɛ̀ɛ yíí nìdo k'ò pú ca̰ntà, ò dá yetá hédá kà p'óò ca̰ntá. ¹⁹ A ca̰ntà yoo a pú ca̰ntà, mii pú héé. Mìì héé-sa, á n'tṵ̀n Weèdi kpɛ̰́ńtìnùka hḭ́mpú-dà. ²⁰ Bá mɛ̀ǹǹ dɛ̀ɛ̀-ko ní n'yòǹ ò de yòm̀pu kà Weèdi é nɛɛ́ ò yíí. ²¹ A de yòǹ núǹn-dà kà Weèdi é nɛɛ́ a yíí-i? Yè dá n'àà n'kɔkapú. Àmá, k'à kó nɛɛ́ teeka a cɔ̰́ɔ̰̀di, a dá m'bóhi^a. ²² N yɔ̀ yè dá n'àà n'kɔkapú mìì tee-sá, núǹn Teó yíí-ko hɔ̰́ n'tee o cɔ̰́ɔ̰̀di-dà sḭ̀ḭ̀ma yìhìka, é n'fòù o kpɛ́mú. Ma cɔ̰́ɔ̰̀di-dà mɛ̀ɛ dɛɛ̀, Weèdi yíí-ko k'ò tee o cɔ̰́ɔ̰̀di hɔ̰́ kpáńtá Kídísì núǹn-dà. ²³ Weèdi bodà sàma-dà é nɛ dontá. Nɛ dá teha é hḭn nìpa núm̀ma. ²⁴ Ye kú kpɛ́mú n kúcàpa nà n potɔ̰ɔ̰̀pa-nà, bá nɛ mɛ̀ǹǹ dɛ̀ɛ̀-ko é n'yòǹ ò de yòm̀pu Weèdi yìhìka kà ní nɛɛ́ ò yíí.

Sepàm̀ma nà kpíipoòti wɛmá

²⁵ Sepàm̀ma mɛ̀m̀pà mun pú yan-pá kú bɛ́ka, n kó wɛɛ́-sà miì pú yòǹ nùdi kà nì péé-nà-ní Teó pesá. Àmá, n pà cakú mmí maàhu-sá-dà. Pà mɛ̀ɛ yònà é nà n dań-ma nà pa̰á̰suumá Teó n pa̰à̰-ma kpɛ́mú. ²⁶ Ǹtɛ mmí maàhu è yɔ̀ mìì suu-sá: Nà fá̰kápàmà mɛ̀mà péé-mà yenì kú kpɛ́mú, yè suu-ú-ma è yɔ̀ bá mɛ̀ǹǹ dɛ̀ɛ̀-ko é n'yòǹ ò baà yòm̀pu. ²⁷ A káá poòo-dà, a dá yetá ò wɛ́í. A pú káá poòo, dá yetá pɛha è yɔ̀ á kádá. ²⁸ Àmá k'à tódà poòo, a pú pa̰à̰ sḭ̀ḭ̀ma. Kà sepàǹn mɛ̀ɛ té yan, ò pú pa̰à̰ sḭ̀ḭ̀ma. Àmá mɛ̀m̀pà tódà-pa poòpa yoo daapá kó dii-í-ma náńkú dɛ́dɛ́í pa daàka wɛǹni fòùmu mɛhɛká, n mɛ̀ɛ kpɛ̀i é nɛ yenkàna-sá-dà.

²⁹ N kúcàpa nà n potɔ̰ɔ̰̀pa-nà, ǹtɛ mìì tee-sá kà n yɔ̀ mɛma: Wɔ̀ni mɛ̀nì kaá-di koò pú wɛhi. É tódá sá̰mà, daapá mɛ̀m̀pà káá-pa poòpa yònà é n'fòù é n'yònà pà pú káá-ma-dà poòpa. ³⁰ Mɛ̀m̀pà kɔǹ-pa, kà pá n'fòù é n'yònà pà pú kɔǹ-ma. Mɛ̀m̀pà péé-pa yaǹnaakú mɛhɛká, kà pá n'fòù é n'yònà pà pú péé-ma yaǹnaakú mɛhɛká. Mɛ̀m̀pà don-pá, kà pá n'fòù é n'yònà pà don-sá pú yòǹ-ma pa kpɛ́ɛsá. ³¹ Mɛ̀m̀pà you-pá fòùkù mɛnkù kú kááma naakú, k'yé n'yònà pà pú you-má yècḭ́ḭ̀, è yá̰á̰ fòùkù mɛnkù kɔ́dí yɔ̀ɔpú-dà.

³² N há̰ pú kpɛ̀i kà nɛ́ m'péé yam̀màhàka mɛhɛká. Mɛ̀ǹǹ pú káá-ko poòo hɔ̰́ n'wisí Teó tɔmú-dà, é m'pɛnti ò kó hḭmpú k'óò n'naa-nà. ³³ Mɛ̀ǹǹ káá-ko poòo hɔ̰́ n'wisí fòùkù mɛnkù kú kpɛ́ɛsá-dà, k'yé teha k'ó dɛ́há ò kó hḭmpú é nakàna o poòo yàma. ³⁴ Ye wɔ̀ni, ò hɔ̰́ totá-ma o yàma mɛhɛká. Ma cɔ̰́ɔ̰̀di-dà mɛ̀ɛ dɛɛ̀, poòo mɛ̀ǹǹ pú káá-ko dɔɔ̀o yoo sepàǹn mɛ̀ǹǹ pú yan-kó hɔ̰́ n'wisí Teó kpɛ́ɛsá-dà. Pà hɔ̰́ m'pɛnti pà kó hḭmpú-dà é n'yòǹ o kpɛ́ɛpá tenten pa pa̰á̰ma nà pa yam̀màhàka mɛhɛká. Poòo mɛ̀ǹǹ mɛ̀ɛ káá-ko dɔɔ̀o, hɔ̰́ n'wisí fòùkù mɛnkù kú kpɛ́ɛsá hḭ́ǹka-dà, è kpɛ̀i é nakàna o dɔɔ̀o yàma.

³⁵ N cakú-sà miì kó tempanà nɛ́na-dà, n pú yè nɛ cakú è kó nɛ díhìna máàdi. Àmá n kpɛ̀i nɛ́ baàta mìì suu-sá-dà k'yé teha kà nɛ́ n'daàdi-nà Teó cɔ̰́ɔ̰̀di.

³⁶ Kà dapàǹn káá o pocɛ̰ǹni, è hɔ̰́tà ò kó nì yetá-nà-á-ma k'ò pú nì tódà poòo, k'ò koò pú kó nɛɛ́ é cɛ̰ɛ̰́ o cɔ̰́ɔ̰̀di, è màhu è yɔ̀ pá tódá pa tɔɔ̀pa, k'ó pa̰ná o kpɛ̰̀ta hḭ́n-sá^b. Pá tódá pa tɔɔ̀pa, ò pú pa̰à̰ sḭ̀ḭ̀ma. ³⁷ Há̰kà, k'yè yònà ye dapàǹn ta̰kadà tenten n'ɔ̀ɔ cɔ̰́ɔ̰̀di è yɔ̀ ò pú kó tódá o pocɛ̰ǹni, kà mà péé-nà-ní o yàma mɛhɛká-dà, k'yè pú yòǹ nà nɔɔ̀ti, k'ò mɛ̀ɛ kó nɛɛ́ é cɛ̰ɛ̰́ o cɔ̰́ɔ̰̀di, ò pa̰kú k'yè suu-ú-ma. ³⁸ Mɛmá-dà, kà nìi tódà o pocɛ̰ǹni, ò pa̰à̰ k'yè suu-ú-ma. Kà nìi mɛ̀ɛ pú tódà o pocɛ̰ǹni, ye yaǹn pa̰à̰ k'yè dɔ̀haà è suu-ú-ma é ha̰tá.

³⁹ Tɔɔ̀ma mɛ̀mà péé-ma, kà poòo dɔɔ̀o káà fòù, ò pú yònà é yan dɔɔ̀o tɔɔ̀o. Àmá k'òo dɔɔ̀o kpíi, ò kó nɛɛ́-ma é yan dɔɔ̀o ò kpɛ̀i-kó, àmá ye dɔɔ̀o ní n'yòǹ weèdɔɔ̀o. ⁴⁰ Há̰kà, mmí maàhu è yɔ̀ k'ò pú tódà dɔɔ̀o, yè k'óò n'yòǹ wɛ̀ɛ̀di-dà. N mɛ̀ɛ té yá̰á̰-ma è yɔ̀ Weèdi Sèdi péé n mɛhɛká.