Kɔ̀dɛ́ńtìpa Pɔkàcecetá 6

Sídàma weèdɔɔ̀pa cɔhɔ̀ka

¹ Badà tee kà n'ɔɔ̀cɔ̰́ǹ káá-nà o weèdɔɔ̀tɔ̀o wɛkú, ò pú hɔ̰́ taá ò yíí pa weèdɔɔ̀tɔ̀pa pesá, k'ò há̰ té cḭḭ̀na kṵnnɔ̀fa é taá ò yíí sídàpa mɛ̀m̀pà pú yá̰á̰-pa Weèdi pesá? ² Nɛ pú yá̰á̰ è yɔ̀ mɛ̀m̀pà yòǹ-pa Weèdi kpɛ́ɛpá-dà kó sída fòùku kpɛ́ɛpá? Kà nɛ́na-dà há̰ kó sída fòùku kpɛ́ɛpá, nɛ kó hɛ̰ka-á-ma nɛ kó sída-má wɛkú mɛ̀ǹkù pú kpenì-ku-aa? ³ Nɛ pú yá̰á̰ è yɔ̀ tḭ́ńti-dà kó wáńtá sída Weèdi tɔntɔndipá? Ntɛ́ t'aá kó hḭmà é hɛ̰ka ti kó sída-má fòùkù mɛnkù kú wɛkú? ⁴ Nɛ há̰ hɔ̰́ n'káá wɛkú nà nɛ tɔɔ̀pa fòùku kpɛ́ɛsá hḭ́ǹka, è té tódá weèdɔɔ̀-hòǹhòni pú kaǹ-pá-dà, kà pá kù sída. ⁵ Nɛ fɛ̀ci-dà kà n mà wɛì-nà. Nìdo òcɔ̰́ǹ kɔ́ɔ́ nɛ cɔhɔ̀kà, è yòǹ yaǹfòùma yaǹn, è kó nɛɛ́ sída wɛmá mɛ̀mà péé-ma o weèdɔɔ̀tɔ̀pa pàdɛ́ɛ́ cɔhɔ̀ka? ⁶ Yè suu-ú-dà yɔ̀ weèdɔɔ̀o é yíí sídàma o weèdɔɔ̀tɔ̀o mɛ̀m̀pà pú yá̰á̰-pa Weèdi pesá?

⁷ Yè múńtà yòǹ hɛ̰kàma-dà ye pesà-ní, kà nɛ sídí-nà nɛ tɔɔ̀pa. Badà tee múńdìkaà, kà nɛ pú kpɛ̀i é kɔ̀ù nɛ kpɛ́ɛmá, tɔɔ̀o nɛ pa̰à̰ tḭ́ń wɔ̀ni yècḭ́ḭ̀ k'yè pú coó? Badà tee kà nɛ pú kpɛ̀i kà nìi é fɔ̰ɔ̰̀ta nɛ kpìku? ⁸ Múńdìkaà, nɛ́na-dà pú coó è fɔ̰̀hu tɔɔ̀pa kpìtìdi. Ye tɔɔ̀pa nɛ fɔ̰ɔ̰̀hu-pá kú kpìtìdi-dà héé nɛ weèdɔɔ̀tɔ̀pa. ⁹ Nɛ pú yá̰á̰ è yɔ̀ mɛ̀m̀pà pú coó-pa pú wáńtà dúti Weèdi wóòti mɛhɛká? Nɛ dá m'báńtí nɛ cɔ̰́ɔ̰̀di. Mɛ̀m̀pà kú wɛnnì fòù-pa yáyámú mɛhɛká, nà mɛ̀m̀pà tṵ̀n-pá wàci cɔ̀ku, nà mɛ̀m̀pà cɔ̰hú-pa dɔɔdí, nà daapá mɛ̀m̀pà dɔɔ̀-nà-pa pa datɔɔ̀pa yoo poòpa mɛ̀m̀pà dɔɔ̀-nà-pa pa potɔɔ̀pa, ¹⁰ nà túùpa, nà daakú yam̀ma, nà naàyà̰pa, nà mɛ̀m̀pà tèùdì-pa tɔɔ̀pa, nà mɛ̀m̀pà fèùdì-pa tɔɔ̀pa kpɛ́ɛsá, pa wɛnnì pú wáńtà dúti Weèdi wóòti mɛhɛká. ¹¹ Nɛ pàcɔ̰́ há̰ de yòm̀pu-dà. Àmá kà Weèdi é nɛ pɔkàda nɛ sḭ̀ḭ̀ma, é nɛ cená ni kpɛ́mú, é hédá kà nɛ coó, nà Teó Sèsí-Kídísì yèdi, nà Weèdi Sèdi kpeèti.

Nɛ dá m'pa̰kú-nà nɛ wɔ̰̀ǹti nɛ yàma kpɛ̀i-sá.

¹² Nɛ pàcɔ̰́ tonà: Kà n kpɛ̀i-sá mií-dà n kó pa̰á̰-ma. Mɔ́masí-dà, k'à kpɛ̀i-sá a kó pa̰á̰-sa-dà, àmá niìi wɛǹni pú sudi a kpɛ́mú. Kà n kpɛ̀i-sá mií-dà n kó pa̰á̰-ma, àmá n pú kpɛ̀i é n'yòǹ yècḭ́ḭ̀ kú núǹn. ¹³ Nɛ tṵ́mà hɔ̰́ n'yɔ̀: Dipú péé pɛutí kpɛ́mú-dà, kà pɛutí péé dipú kpɛ́mú. Mɔ́masí-dà, há̰kà Weèdi kó wáńtá fíɔ́wá-ma dipú nà pɛutí. Nìi wɔ̰̀ǹti mɛnti há̰ pú péé yáyámú kpɛ́mú. Tì péé Teó kpɛ́mú-dà, kà Teó tee kà tì péé. ¹⁴ Weèdi mɛ̀nì yá̰hìnà-di Teó kpíípa mɛhɛká, nì mɛ̀ɛ té kó wáńtá ti yá̰hìna-á-ma nà ni kpeèti.

¹⁵ Nɛ pú yá̰á̰ è yɔ̀ nɛ wɔ̰̀ǹti yòǹ Kídísì wɔ̰̀ǹti bɛ̀m̀bɛ̀ka-dà? N há̰ kó tódá Kídísì wɔ̰̀ǹti bɛ̀m̀bɛ̀ka-dà é kà kpáhìna yáyámú kpɛ́ɛká? Fɔ́ú. ¹⁶ Nɛ pú yá̰á̰ è yɔ̀ kà nìi dɔɔ́-nà pokɔ̰́kédi, nà mɛní pà hḭn wɔ̰̀ǹti tìcɔ̰́-dà? Pà wà̰tà Weèdi pɔ̀kàhi mɛhɛká è yɔ̀: Padɛ́ɛ̀di kó hḭn nìi òcɔ̰́-dà. ¹⁷ Àmá mɛ̀ǹǹ dàdi-nà-ko Teó, nà mɛnń pà hɔ̰́ hḭn sèdi nìcɔ̰́-dà.

¹⁸ Ye kú kpɛ́mú-dà tee, nɛ yònà é nátá-nà-ma yáyámú. Sḭ̀ḭ̀ma tɔɔ̀ma nìpa pa̰kú-ma pú dìi pa wɔ̰̀ǹti. Àmá nìi mɛ̀ǹǹ pa̰kú-nà-ko o wɔ̰̀ǹti yáyámú, ye yaǹn pa̰kú sḭ̀ḭ̀ma o mɔ́nń kú wɔ̰̀ǹti-dà. ¹⁹ Nɛ pú yá̰á̰ è yɔ̀ nɛ wɔ̰̀ǹti yòǹ Weèdi Sèdi hɔ̰́ɔ̰̀ta-dà? Weèdi-dà nì nɛ pɛ̰ḭ kà nì péé nɛ mɛhɛká. Ye kú kpɛ́mú, nɛ pú tee nɛ cɔ̰́ɔ̰̀di. ²⁰ Weèdi nɛ dontà nà díikpecí-dà. Ye kú kpɛ́mú, nì cùu-nà nà nɛ wɔ̰̀ǹti pa̰kú-sa wɛǹni mɛhɛká.