Kɔ̀dɛ́ńtìpa Pɔkàcecetá 5

Sɔ̀kací pa̰á̰ma kɔ̀dɛ́ńtì weèdɔɔ̀-nàmɔ̀ni mɛhɛká

¹ Ti you kà pà wɛì páàti wɛǹni, è yɔ̀ sɔ̀kací pa̰á̰ma màcɔ̰́mà-dà péé nɛ cɔhɔ̀ka. Ye kú sɔ̀kací pa̰á̰ma dɔɔ̀haà é pɛtá-ma-hɔ̰, bá kà pà pú kó nɛɛ́ mà pèta-nà mɛ̀m̀pà pú yòǹ-pa weèdɔɔ̀pa pesá. Pà wɛì è yɔ̀ n'ɔɔ̀cɔ̰́ǹ-dà tódà o báàa poòo òò káá. ² Kà nɛ há̰ wá̰kàn'à̰! Nɛ múńtà de yònà é n'kaàdi kṵ́mú-dà. Nɛ de yònà é deèna-á-ma ye kú nìdò nɛ cɔhɔ̀ka. ³ Mmí, n pú nɛ tɔ́sí-nà, àmá n nɛ péé-nà-á-ma n yam̀màhàdi mɛhɛká. N mɛ̀ɛ cem̀ sídáà-á-ma ye yaǹn mɛ̀ǹǹ pa̰à̰-ko miya̰ è yònà n yè péé-ma nɛ cɔhɔ̀ka. ⁴ Nɛ́ tíká nà Teó Sèsíì yèdi, n kó nɛ m'péé-nà-á-ma n yàma mɛhɛká. Ti Teó Sèsíì kpeèti kó nɛ m'péé-nà-á-ma, ⁵ kà nɛ́ taàa ye yaǹn Wɛɛ̀kupá wódo nɔ̀hi mɛhɛká, k'yé teha k'òo wɔ̰̀ǹku pa̰á̰kpákpààma é kpíí, ye wɔ̀ni k'òo sèdi dɛ́tá fḭ́táma Teó kó tóní tḭ́ń daadí.

⁶ Yècḭ́ḭ̀ kɔ́ɔ́ ye pesà nɛ kó wá̰káná-nà-sa. Nɛ pú yá̰á̰ è yɔ̀ yòmu yíkànasá cɛ̰́masí-dà hɔ̰́ yíkàna yòmu wɛǹni? ⁷ Deèda-nà yòmu yíkànasá kpɛ̰́ǹya̰ nɛ cɔhɔ̀ka, k'yé teha kà nɛ́ n'yònà yòmu pàmu, mɛ̀mù kɔ́ɔ́-pu yòmu yíkànasá. Nɛ mɛ̀ɛ cem̀ yòm̀pu-dà, è yá̰á̰ Kídísì-dà yòǹ ti Pákì hɔ̰ɔ̰̀bíidí pà pa̰à̰-di-dà dɔ̀hàdi ti kpɛ́mú. ⁸ Ye kú kpɛ́mú, tí dii Pákì kúúdi nà pɛ̰́ɛ̰̀ mɛ̀ǹǹ kɔ́ɔ́-ko yòmu yíkànasá. Ti dá ò dii nà sḭ̀ḭ̀ma nà mɛkatohiká. Àmá t'óò dii nà yàma mɛ̀mà weni-má, nà wɛbeèdi.

⁹ N pɔ̀kàta tɔɔ̀ta mɛhɛká, n de nɛ wa̰à̰haà é nɛ caka è yɔ̀ nɛ dá m'pɛ́ɛ́-nà nìpa mɛ̀m̀pà fòù-pa yáyámú mɛhɛká. ¹⁰ N há̰ de pú kpɛ̀i é n'yɔ̀, nɛ́ yentá mɛ̀m̀pà kú wɛnnì fòù-pa yáyámú mɛhɛká fòùkù mɛnkù kú mɛhɛká. N mɛ̀ɛ de pú kpɛ̀i é n'yɔ̀ nɛ́ yentá daakú yam̀ma, yoo túùpa, yoo mɛ̀m̀pà tṵ̀n-pá wàci cɔ̀ku. K'yè kó hḭn mɛma, yè kó béka è yɔ̀ nɛ́ yɛ̀ɛ̀ fòùku mɛhɛká-dà mɛmɛ-ɛ̀!

¹¹ N de kpɛ̀i é nɛ caka è yɔ̀, nɛ dá m'pɛ́ɛ́-nà nìi mɛ̀ǹǹ tonà-ko ò yòǹ weèdɔɔ̀o-dà, è há̰ fòù yáyámú mɛhɛká. N de wɛì mɛ̀ǹǹ hḭ́n-kó ò yòǹ weèdɔɔ̀o-dà, è há̰ yóu, yoo è káá daakú, yoo è tṵ̀n wàci cɔ̀ku, yoo è tèù tɔɔ̀pa, yoo è yòǹ naàyà̰do. Nɛ múńtà pú yònà é pɛ́ɛ́ é dii-nà ye kú yanǹ.

^12-13 Mmí-dà yònà ń sída mɛ̀m̀pà pú yòǹ-pa weèdɔɔ̀pa? Fɔ́ú! Mɛmpa, Weèdi-dà kó pà sída. Àmá nɛ́na, nɛ́na-dà yònà é sída nɛ hòǹhòni kpɛ́ɛpá. Pà wà̰tà Weèdi pɔ̀kàhi mɛhɛká è yɔ̀: Bɔhà-nà niìsḭ̀ǹn nɛ cɔhɔ̀ka.