Kɔ̀dɛ́ńtìpa Pɔkàcecetá 4

Kídísì dehèpa.

¹ Yè békú, nɛ́ ti diìda Kídísì dehèpa-dà, pà hḭ́nà-pa è yɔ̀ pá caka Weèdi wɛbeèdi mɛ̀nì sɔ̀ɔ-dí. ² Pà békú-sa deho, ó n'cɔ́dí-ma o dehèna wɛǹni mɛhɛká. ³ Mmí kú pesá, yè pú n yòǹ màcɔ̰́mà, kà nɛ́na n sídáà yoo nìpa sídàma hòǹhòni nìcɔ̰́nì n sídáà. N yàma pú n kɔkapú yècḭ́ḭ̀ kú hḭ́ǹka. ⁴ Mii há̰ pú kó n'tee n kó pṵ́tá-ma n cɔ̰́ɔ̰̀di è yɔ̀ n coó. N sídàko-dà héé Teó. ⁵ Ye kú kpɛ́mú-dà tee nɛ pú yònà é sída-má nìdo kà wɔ̀ni mun pú tɛ̀ni. Nɛ́ ceí kà Teó é tóní, é tɛ̀ni é deèna-ní wenkú mɛhɛká mìì sɔ̀ɔ-sá binìku mɛhɛká, é fohìna nìpa yam̀màhàka mɛ̀ǹkà sɔ̀ɔ-ká pa yàma mɛhɛká. Ye wɔ̀ni-dà Weèdi kó kɔ̰́ɔ̰́-ma bá mɛ̀ǹǹ dɛ̀ɛ̀-ko cóńtàma ò sànà-ma.

⁶ N kúcàpa nà n potɔ̰ɔ̰̀pa-nà, n tódà ye kú yohènamà-ní, mmí nà Àpòdósì hḭ́ǹka, è kpɛ̀i kà nɛ́ yekà yècḭ́ḭ̀-dà. N kpɛ̀i nɛ́ yá̰dá è yɔ̀ nɛ pú yònà é ha̰tá pà wà̰tà-sa hḭ́mpú-dà. Ye kú kpɛ́mú, n'ɔɔ̀cɔ̰́ǹ pú yònà é fóń n'ɔ̀ɔ̀ péé-ma nìì mɛnǹ kú dàhàka, è pú péé tɔɔ̀o dàhàka. ⁷ Ye hḭ́ǹka, m̀mɔ́ńya̰-dà bɛkú è yɔ̀ a ha̰tà-nà tɔɔ̀pa? M̀mɔ́ńya̰-dà a káá-ma kà Weèdi pú yè n'àà pɛ̰ḭ? Kà mɛní-dà há̰ yè n'àà pɛ̰ḭ, badà tee k'à fóǹ k'yè yònà pà p'éè n'àà kɔ̰́ɔ̰̀-ma?

⁸ Nɛ yɔ̀ɔ dɛ́tápu-dè nɛ kpɛ̀i-sá wɛǹni! Nɛ yɔ̀ɔ káápu-dè! Nɛ kpáńtà wóópa-dè kà tḭ́ńti mun pú mà hḭn-ḭ! N de kpɛ̀i-í-ma nɛ́ mà n'yòǹ, k'yé teha kà tí pɛ́ɛ́ é nɛ n'wódí-nà. ⁹ Àmá, mmí maàhu è yɔ̀ tḭ́ńti Kídísì tɔntɔndipá, Weèdi ti hḭ́nà kàdìdi dèǹdèni-dà, kà ti yònà nìpa pà dènà nùdi è kó kɔ̀ù-pa. Nì ti hḭ́nà fòùku kpɛ́ɛpá wɛǹni yìhìka-dà, nà Weèdi tɔntɔndipá yìhìka, nà nìpa yìhìka è yɔ̀ pá ti sódí. ¹⁰ Ti yòǹ fìkapá-dà nà Kídísì kpɛ́mú. Àmá nɛ́na, nɛ césí-ma nà múnáma nɛ pa̰à̰-ma nà Kídísì kpɛ́mú. Tḭ́ńti kɔ́ɔ́ kpeèti, àmá nɛ́na tì káá-ma. Pà nɛ cuunì-í-ma sukú, àmá tḭ́ńti kà pà ti yɔ̰́sí. ¹¹ Háá sá̰mà, ti káà kɔǹ-nà kòni-dà, nà nɛ́yà̰hakú, ti pú káá báatí, kà pà ti poti, kà ti dɛ̀i páàti wɛǹni. ¹² Ti dehú-ma nà ti mɔ́mpá kú nɔ̀hi è wéní. Pà ti teù-ú-ma, àmá kà tḭ́ńti pà kónì. Pà ti diinì-í-ma náńkú, kà ti kù tohú. ¹³ Pà cakú-ma kpákpààma ti hḭ́ǹka, àmá kà tḭ́ńti pà tɛ̰́nì suumá. Háá nà sá̰mà, nìpa káà ti dìi è yɔ̀ ti yòǹ fòùkù mɛnkù kú yoǹti-dà, míǹti nìi pú yònà é tɔ́ká-ti.

¹⁴ N pú nɛ wa̰à̰hu miì è kpɛ̀i é nɛ diá fɛ̀ci. Àmá n nɛ wa̰à̰hu è kó nɛ caka mìì péé-sa-dà, nɛ́na n bíidɔ́kàhi. ¹⁵ Há̰kà, bá kà nɛ kpɛ̀i kà nɛ́ n'káá biɔhànapá tòhìka píta, kà pà nɛ biɔhànì nɛ kó n'fòùkàma Kídísì cɔ̀ku mɛhɛká, nɛ pú káá báàpa dɔ́ɔ́di. Mmí-dà nɛ pɛdà Sèsí-Kídísì cɔ̀ku mɛhɛká nà wɛnaamá n nɛ cakáà-ma kà n'ɔ́ɔ̀ kɔ̰́ɔ̰́ nɛ cɔ̰́ɔ̰̀di. ¹⁶ Ye kú kpɛ́mú, n nɛ teǹ-ń-ma è yɔ̀ nɛ́ tṵṵ̀na n yòm̀pu. ¹⁷ Mɛmá-dà tee ká n tɔn-hɔ̰ Tìmɔ̀téè, n bíitá n dɔ́sí-ta, kà tà cɔ́dí Teó cɔ̀ku mɛhɛká. Ò kó nɛ dehèna-á-ma fòùmu cɔ̀ci n tṵ̀n-cí Kídísì mɛhɛká. Ò kó cì nɛ dehèna n baà cì biɔhànì-ma kú bookú-dà páàti wɛǹni, weèdɔɔ̀-hòǹhòka wɛǹni mɛhɛká.

¹⁸ Nɛ pàcɔ̰́ de maàhu è tonà n koò pú tóńti-ho nɛ hɔ̰́ɔ̰́hí, ye wɔ̀ni è fóǹ ye hḭ́ǹka. ¹⁹ Àmá kà Teó n pɛ̰ḭ bòdi, n kó tɛ̀i-í-ma-hɔ̰ nɛ hɔ̰́ɔ̰́hí. Ye wɔ̀ni, yè pú kó n'yòǹ ye fónfóǹti yam̀ma wɛmá cɔ̰́ɔ̰̀di-dà n kó yá̰dá-ma, àmá n kó dɛ́há pà kó nɛɛ́ pa̰á̰-sa-dà. ²⁰ N wɛì mɛma mìì tee-sá, Weèdi wóòti pú yòǹ nùdi wɛmá cɔ̰́ɔ̰̀di, àmá tì yòǹ kpeèti-dà. ²¹ M̀mɔ́ńya̰-dà nɛ kpɛ̀i-má? Ń tɛ̀ni nɛ hɔ̰́ɔ̰́hí nà dɔ̀ɔ̀di, nkɛ́ɛ̀-ɛ̀ ń tɛ̀ni nà dɔ́kàma, nà yaǹyɔ̀kàm̀ma?