Eriimanya rino reghotegheri Eryobha
4
Mbe,
gho kubha Kirisito nanyaakiri mo‑mobhere waache,
inyu bhoose mwisëëmi kunyaaka kinya iwe.
Neghosiikëra hangʼu,
gho kubha,
omooto uno amariri kunyaaka mo‑mobhere waache,
nataaniri na amasari.
2 Gho nchëra iyo,
eriimanya reeche ryose rino risaaghiri,
nakumanya kurëngʼaana na bhuno Eryobha rekwënda,
taanyi gho ghutambana amiigha gha bhaato.
3 Kare,
moore moraköra amangʼana gha bhaato bhano bhataryeche Eryobha.
꞉Muutambiine amiigha ghaanyu amabhe gha bhutaari.
꞉Muumanyiri kinya abharëëbhi na ghosiigha chanyangi che mo‑se.
꞉Muusëngiire chasanaamu,
chino Eryobha ryangiri.
꞉Muuköriri amangʼana ghayo kwo riibhagha irë chwee.
4 Ibheere,
abhaato bhano bhataryeche Eryobha,
mbakuhagha hano bhakorighi kubha motaaghughöötana nabho ghuköra amabhe,
na kurëngʼaana na ghayo,
mbakobhatoka.
5 Amare,
abheene mbakwëndëru ghwitachura ambërë e Ryobha rino riisëëmiri ghotenera ekiina abhaato bhoose,
bhano bhaanyi abhahöru na bhano bhakuure.
6 Nikyo gheghughëri abhaato bhano kwi ibheere bhakuure,
꞉mbaabhooriiru Angʼana Anchömu hano bhaare abhahöru,
kubha koru nangabha bhateniiru ekiina mo‑riimanya reebho kinya abhande,
bhamanye kwo bhotoro bho Körö Ahörëëru,
kinya Eryobha reenyi ihöru.
7 Antenero e mangʼana ghoose ˆeghatingʼi.
Gho ghayo,
mubhe bhangʼiini na mwikabhaahe mo‑ghoose,
kubha motore ghusabha.
8 Ghokera ghayo ghoose,
mosiighane chwee,
gho kubha obhosiighi mbohaakundekeri amasari maaru.a
9 Mubhe abhaato bha ghwighënëhi inyu bheene kwo bheene ino motakwingʼunyerangʼunyera.
10 Omooto woose nahaabhuru ekihaano keeche koru kwo Waryobha.
Nekwëndëru ghokihökëri bhoheene gho ghiri e ghusakerani,
kinya omwimeerereri omuhöriicho o ghareeya e Ryobha ino enyi e manga maaru.
11 Aribha omooto anyi na amangʼana gha ghosiikëra,
asiikërë kinya n‑kwo Ryobha gharuure.
Na aribha omooto aghusakeri abhaghëndi bhaache,
abhasakeri kwo bhotoro bhuno bhookoru kwo Waryobha.
Gho ghayo,
Eryobha ndeghoghongibhu mo‑mangʼana ghoose,
gho nchëra e Yesu Kirisito omwene uno anyi no obhokumi obhokoro no obhotoro emiishe ne emiishe.
Hawubhaabha.
Kunyaaka gho ghiri e Yesu
12 Abhasiighani bhaane,
motahagha ighoro e masaki mahaari ghano ghakorwera ghate yaanyu ghusaki obhokumi bhoonyu.
Motarighi kinya n‑egheghiro ghighëni kino ghekobhabhöna.
13 Amare muchömëru kubha mokunyaaka kinya bhuure Kirisito ꞉anyaakiri.
Muchömëru ibheere,
kubha mokuucha ghuchömëru chwee,
hano akuucha,
no obhokumi bhooche obhokoro kwërëkibhu haheero.
14 Aribha moghotoku gho ghiri e riina re Kirisito,
ngʼoni inyu.
Angʼana iyo nekwërëki kubha Akörö e Ryobha e bhokumi obhokoro neenyi haghirohamu na niinyu.
15 Mbe,
anyaako yaanyu etaacha korwera gho ghiri e bhwiti,
no omwibhi,
na ghuköra amabhe hamu ghwisöhi mo‑mangʼana gha bhande.
16 Amare wowoose uno akunyaaka gho kubha m‑Mokirisito,
atarighi chaasoni.
Amare areghongi Eryobha gho kobherekeru eriina riyo.
17 Mumënyë kubha,
eriibhagha re ghoteneru ekiina ˆrekahika,
ne Eryobha ndeghusëëma ghotenera ekiina abhaato bhaache.
Ibheere,
aribha ghoteneru ekiina ngoghusëëmëra ghokwito itu bhano toonyi abhaato bhaache,
kana nibhu ekubha kwo bhano bhakwanga Angʼana Anchömu e Ryobha?
18 Amandëkö Amatööbhiyu ngakobhugha kubha,
“Aribha n‑ghuköngʼu kwo bhano
bhaanyi abhahëënë ghotooribhu,
kana,
nibhu ekubha kwo bhano bha masari
bhano bhataakoresooka Eryobha?”b
19 Gho ghayo,
bhano bhakunyaaka gho ghuköra ghano Eryobha rekwënda,
bhamënyë kubha Eryobha n‑Itëëmi na n‑ihëënë.
Gho ghayo,
bhiitoore mo‑mabhökö ghaache,
bhëëndërërë ghuköra amachömu.