Amëërëkërëri kwo bhakari na abhasubhe
3
Hangʼu hangʼu inyu abhakari,
mobhasooke abhasubhe bhaanyu,
kubha aribha bhaanyi‑ho bhano bhataakorekumi Eryobha,
bhatore korutu gho korighi atëëmö yaanyu anchömu.
Gho ghayo bhatore ghokumi Eryobha nangabha bhatabhooriiru angʼana,
2 gho kubha mbakorighi eriimanya reenyu kinya reenyi ichömu na re sooko.
3 Motabha abhaato bha ghwichöcha gho nche okwene,
kinya bhuure ghoshuka chanchweri,
kobheeka ebheghiro bhe sahaabhu,
hamu changibho che riighori ikoro.
4 Amare oghwichöcha koonyu ghusëëmërë mo‑metema gheenyu,
obhuchömu bhuno bhotaaghotora ghusarëka koru ghokunguha.
Obhuchömu bhuyo,
n‑kubha no omukörö omuhöriicho no obhuhörëëru,
na nibho obhuchömu bhuno bhoonyi no obhwëra bhokoro mo‑miisho gha Ryobha.
5 Hangʼu nibhu ꞉bhaare bhariichöcha hayo kare,
abhakari bhano bhariitëngʼiire Eryobha,
ino bharasooka abhasubhe bhaabho.
6 Omukari o ghetuubhaani n‑Saara,
omukari o Abhurahamu.
Iwe naare aramosooka omosubhe waache bhoheene,
aramobherekera omutëmi.
Bhuure bhuure inyu bhoose,
aribha moghuköra amachömu ino motaaghotiina ghyokyose,
mbe,
mobheere abhaana bhaache.
7 Inyu abhasubhe,
mwikare na abhakari bhaanyu kwo bhongo,
moramënya kubha bhataanyi ni inguru kinya inyu.
Mobhatughe gho kobhasooka,
gho kubha ibho bhoose mbaghughabha aghareeya e bhuhöru.
Gho ghayo abhasubhe,
mukörë hangʼu,
kubha amasabhi ghaanyu ghatahööchërëru.
Mukörë amachömu gho ghwiköngʼi
8 Antenero,
ˆnekabhabhoorera bhoose kubha,
mughöötane,
na mubhe ne eriihëëbhö rimu,
na mosiighane kinya abhahiiri,
na morigherani changori na mubhe bhanyööhu.
9 Motareha amabhe kwo mabhe,
hamu amatoki kwo matoki,
amare mobhiitabheri abhande.
Mobherekiiru ghuköra hangʼu,
kubha inyu bhoose mubhönë orubhango.
10 N‑kinya Amandëkö Amatööbhiyu ghakobhugha,
“Wowoose uno akwënda kumanya
eriimanya ichömu na re rubhango,
atighe kobhiiherana na ghosiikëra obhuröngö.
11 Na atighe ghuköra amabhe,
akörë amachömu.
Nekwëndëru atabhare omurëmbë
na kowutambana chwee,
12 gho kubha Omutëmi Waryobha
nahaateereera abhaato abhahëënë,
na nahooghu amasabhi ghaabho.
Amare,
bhano bhaghuköra amabhe,
Eryobha ndehaabhaanga.”a
13 N‑niwe aghotora kobhakörëra amabhe,
aribha moghwiköngʼi ghuköra amachömu?
14 Amare nangabha mokunyaaka gho ghiri e ghuköra ghano ghaanyi gha bhuhëënë,
Eryobha ndekobhiitabheri.
Gho ghayo,
motabha na ahaho koru ghotiina bhano bhakobhanyaaki.
Amare,
mubhe no Omutëmi umu hangʼu mo‑metema gheenyu,
niwe Kirisito.
15 Mubhe mwisëëmiri eriibhagha ryose ghugharokeri wowoose uno akobhabhoori kino moghwitëngʼëra.
Mukörë hangʼu kwo bhuhörëëru na asooko,
16 na mubhe na amënda meero,
kubha aribha bharabhibhoneereri ighoro e mangʼana ghayo moghuköra gho ghiri e Kirisito,
mbe,
bharighi chaasoni.
17 Ngʼoni kunyaaka gho ghiri e ghuköra amachömu,
aribha nigho amënda gha Ryobha,
ghokera kunyaaka gho ghuköra amabhe.
18 Kirisito woose nanyaakiru mara rimu hangʼu gho ghiri e masari,
omooto omuhëënë gho ghiri e bhaato bhano bhataanyi abhahëënë,
kubha atughöötani ne Eryobha.
Omobhere ꞉wiituru,
amare kwo bhotoro bho Akörö Ahörëëru ꞉naabhwine wiiki obhuhöru.
19 Mbe,
꞉naaghiire kuraghaneri chaakörö che bhaato bhano bhakuure,
chino cheere mo‑kibhöhö.
20 Chaakörö chiyo n‑che bhano bhataresookiri Eryobha hayo kare,
eriibhagha Nuhu are araabhëka asafina.
Eryobha ꞉ndeeghumeriiri obhobhe bhoobho mbagha asafina ekamaru kwabhëku,
amare antenero abhaato bhanaane hangʼu,
nibho ꞉bhaatooriibhu koru mo‑manche.
21 Amanche ghayo n‑eghetuubhaani ke bhubhatiiso,
bhuno bhoghototoori,
taanyi gho koruusi eriiku mo‑mobhere,
amare n‑eriiraghano re mënda meero kwo Waryobha.
Amangʼana ghayo,
ngaakubha gho kohetera koryoka kwo Yesu Kirisito.
22 Iwe naghiire Mwishaaro,
ni ibheere niikeere okubhökö gho kwiro kwo Waryobha,
ahaghiro ha sooko chwee.
Naghukangata bhamarayika,
ne ebhetyenyi bhyose bhe bhotoro,
na bhe changuru.