2
Mbe,
motighe obhobhe bhoose,
no obhuröngö bho manga ghoose,
na amangʼana amabhe ne eriihari,
koru kobhiiherana.
2 Kinya bhuno ebhengʼwerere bhehiighomba amabhëërë gha bhaanyina,
na niinyu bhuure bhuure mwighombe amabhëërë gha hëënë gha Körö e Ryobha,
kubha muköngʼë na ghotooribhu.
3 Kinya bhuno Amandëkö Amatööbhiyu ghakobhugha,
mumënyiri kubha Omutëmi m‑muhöriicho.a
Abhaahöru bha Ryobha
4 Momutambane uno anyi eriibhohe erihöru re kwabhëkëra.
Eriibhohe riyo,
abhaato ꞉mbaaryangiri,
amare Eryobha ꞉ndeeryahwire,
wiiki n‑de riighori ikoro mo‑miisho ghaache.
5 Mbe,
mumënyë kubha koru inyu n‑kinya amabhohe ghano ghaanyi amahöru,
mokwabhëku ne Eryobha mubhe erikindahaase re körö.
Wiiki ndekobhaköra mubhe abhachaama bhaache bhano bhaahwiru koruusi amaruusi gha mo‑chaakörö gho nchëra e Yesu Kirisito.
6 N‑kinya Amandëkö Amatööbhiyu ghakobhugha kubha,
“Mumööhi,
iyo mo‑moghya o Sayuuni,
b
neghatoora eriibhohe ikoro re bhoroso,
wiiki n‑eriibhohe re riighori ikoro rino nyahwire.
Na wowoose uno akomokumi
uyo anyi eriibhohe riyo,
taaghosookibhu naabha!”c
7 Ghokoonyu inyu bhano moghokumi eriibhohe riyo,
n‑de riighori chwee.
Amare,
ighoro e bhano bhataakorekumi,
Amandëkö Amatööbhiyu ngakobhugha kubha,
“Eriibhohe rino abhaabhëki ꞉bhaangiri,
niryo ribheere eriibhohe ikoro re bhoroso.”d
8 Wiiki,
Amandëkö ngakobhugha kubha,
“Eriibhohe riyo n‑eriibhohe re ghwituuratuura,
n‑eriitare re ghoghwishi abhaato.”
e
Abhaato mbaghwituuratuura,
gho kubha bhataaghughööta angʼana e Ryobha. Na hangʼu nibhu ꞉bhaare bhasëëmiiru korwera kare.
9 Amare inyu n‑orwibhoro orwahöru,
na abhachaama bha ghitëmi,
na abhaato abhatööbhiyu,
na abhaato bha Ryobha eryene,
kubha muraghani amaköri amakoro gha Ryobha.
Iryo ndebhabherekiire koru mo‑kengʼuuri,
moghi mo‑bhwero bhooche obhokoro bho koroghoori.f
10 Hayo ekeenyuma,
motaare abhaato bha Ryobha,
amare ibheere inyu n‑abhaato bhaache moonyi.
Wiiki motaare morochiiru changori ne Eryobha,
amare ibheere,
morochiiru changori.g
Kumanya kinya abhatamishi bha Ryobha
11 Abhasiighani bhaane,
inyu m‑bhaghëni moonyi na abhaheti mo‑se ino.
Gho ghayo nekobhasasaama kubha,
motiishereri amiigha ghaanyu amabhe,
ghano ghaghokindana na niinyu,
ghabhakinde.
12 Mobhakörërë amachömu abhaato bhano bhataryeche Eryobha,
kubha eriibhagha bhaakubha bharabhabhiihera amangʼana amabhe,
bharighi amaköri ghaanyu amachömu.
Niho bhaghotora koreghongi Eryobha gho ghiri yaanyu,
mo‑rosiko ro kuucha kooche.
13 Mubhe morasooka abhaato bhoose bhano bhaanyi no obhotoro,
gho ghiri e komosooka Omutëmi.
Momosooke omutëmi waanyu,
gho kubha iwe niwe omukangati omokoro mo‑se yaanyu.
14 Wiiki mobhasooke abhakangati bha mikööwa,
gho kubha ibho mbaahwiru no omukangati uyo.
Mbaahwiru bhabhe bharabhatëma anchagho abhaato bhano bhaghuköra amasari,
na kobhaghongi bhano bhaghuköra amachömu.
15 Eryobha ndekwënda,
mubhe moraköra amangʼana amachömu,
kubha mobhakiri abharaghaanu bhano bhateeche amangʼana ghaache.
16 Mumanye kwo bhohuuru,
amare motahökëri obhohuuru bhuyo ghuköra amabhe.
Mumanye kinya abhatamishi bha Ryobha bhakwëndëru kumanya.
17 Mobhasooke abhaato bhoose,
na mobhasiighe abhakumi abhaghëndi bhaanyu.
Morisëngërë Eryobha,
na momosooke Kayisaari,
omutëmi waanyu.
Amëërëkërëri gha bhasësë
18 Inyu abhasësë,
mobhasooke chwee abhatëmi bhaanyu,
taanyi kwo bhahöriicho hamu abhahörëëru abheene,
koru na kwo bhahaari.
19 Eryobha ndeghuchömëru hano moghoghumereri anyaako ino motaakurëngʼaanëra,
gho ghiri e koritambana iryo.
20 Mokubhöna atuho ke moraghumereri anyaako ino murëngʼaaniire gho ghiri e masari ghaanyu?
Amare aribha moraghumereri anyaako gho kubha muköriri amachömu,
hayo mokoretegheri Eryobha.
21 Eryobha ndebhabherekiire kwo bhoghumereri bhuyo,
gho kubha koru Kirisito omwene nanyaakiru gho ghiri yaanyu.
Gho ghuköra hangʼu,
akabhatighera eghetuubhaani,
kubha mubhe moramwegha.
22 Iwe taaköriri amasari ghoghoose,
koru ghosiikëra obhuröngö bhobhoose.h
23 Hano atokuru,
tagharokiiri angʼana yoyoose.
Hano anyaakiru,
taasakiri korehani asiire,
amare ꞉naaretighiire Eryobha ghoose,
rino reghotena ekiina kwo bhuhëënë.
24 Kirisito omwene ꞉niimokiri amasari ghiito mo‑mobhere waache ighoro e musarabha.
꞉Naaköriri hangʼu,
kubha itu toku mo‑mangʼana gha amasari,
amare tubhe abhahöru mo‑mangʼana gha bhuhëënë.
Na gho ghutëmu kooche,
inyu muhöruru.
25 Moore mobhoriri kinya changʼöndu chino chetighuru mo‑nchëra,
amare ibheere,
momugharokiire Omoriishi waanyu uno akobhachonga.