Anyaarubha a yimbërë e
Bheetero
Amakëërani
1
Anyaarubha ino neyandëkiri eni Bheetero,
omotomu o Yesu Kirisito.
ˆNekabhaandëkëra inyu bhano mwahwiru ne Eryobha,
bhano mumanyiri kinya abhaghëni na ghusancha mo‑mikööwa ghe Bhonto,
na Gharatiya,
na Kabhatokiya,
na Asiya na Bhitiniya.
2 Korwera kare,
Taata Waryobha nabhamënyiri na kobhaahura gho ghiri yaache.
Akörö yaache nebhaköriri mubhe abhatööbhiyu,
kubha momosooke Yesu Kirisito na komusu kwo masaahë ghaache.
a
Nëköbhëëndëra aghareeya no omurëmbë kwo bhwaru, ghibhe na niinyu.
Obhokumi bhwito
3 Aghongibhu Waryobha,
Taata o Mutëmi wiito Yesu Kirisito.
Kurëngʼaana na changori cheeche chaaru,
natwibhwire mara e kabhere gho nchëra e komoryoki Yesu Kirisito koru mo‑bhaku.
Gho ghayo,
ntobhwine eriitëngʼërö re bhuhöru.
4 Ibheere ntoghughanya ghughabha orubhango runo Eryobha retindekiri Mwishaaro,
gho ghiri yaanyu.
Orubhango ruyo rotaaghotora kobhusha,
hamu ghusarëka,
hamu kunyaara.
5 Eryobha ndekobhachonga inyu gho changuru cheeche,
gho nchëra e komokumi Yesu Kirisito.
Moghochongu mbagha hano mokubhöna obhotoori bhuno bhokorighibhu mo‑chaasiko che ntenero.
6 Mbe,
muchömëru chwee ighoro e mangʼana ghayo,
nangabha ibheere kwo riibhagha ighuhe mookubha na amacheeche ighoro e masaki gha manga maaru.
7 Amasaki ghayo ngakurëngi obhokumi bhoonyu bhorighibhu kubha m‑bho hëënë.
Asahaabhu ayeene ne egheghiro kino kehaasakibhu gho ghweku no omororo,
nangabha ehaasarëka.
Hangʼu hangʼu obhokumi bhoonyu bhuno bhoonyi bho riighori ikoro ghokera asahaabhu,
mbokwëndëru bhurëngu,
bhorighibhu kubha m‑bho hëënë.
Hayo Yesu Kirisito nakobhaha aghongo,
no obhokumi obhokoro na asooko,
orosiko runo akuucha kwiyërëkani haheero.
8 Inyu momosiighiri,
nangabha motaamara komorighi.
Wiiki nangabha motaakomorighi ibheere,
amare mokomokumi.
Gho ghayo,
muchömiiru chwee mo‑bhokumi,
oghuchömëru kuyo nkoonyi no obhokumi obhokoro bhuno bhotaaghotora koru ghughambu,
9 gho kubha moghosongʼaana obhotoori bhoonyu.
Obhotoori bhuyo nikyo ekebhune ke bhokumi bhoonyu.
10 Abharööti bha kare ꞉mbiiköngʼiri ghwisuncha obhotoori bhuyo,
nabho ꞉mbaaröötiri ighoro e ghareeya e Ryobha ino ebhahikiire inyu.
11 Akörö e Kirisito neere moose yaabho,
꞉niiröötiri kubha Kirisito nakunyaakibhu,
ne eramara koheta anyaako iyo,
nakubhöna obhokumi obhokoro.
Abharööti bhayo ꞉mbiiköngʼiri chwee ghwisuncha bhamënyë kubha,
amangʼana ghayo ngaakubha nyingake,
na nibhu ghakomubhöna.
12 Eryobha ndebhahunyuriire abharööti bhayo kubha,
amangʼana ghano ꞉bhaare bhararööta,
ghataare ghaghaabho abheene,
amare n‑gho ghiri yaanyu.
Amangʼana ghano ꞉bhaabhughiri,
nigho muraghaniiru na abhaato bhano bhabharëëtiire Angʼana Anchömu ighoro e Yesu Kirisito kwo bhotoro bho Akörö Ahörëëru ino etomuru koru Mwishaaro.
Amangʼana ghayo,
koru bhamarayika mbaghwighomba chwee ghoghamënya.
Kumanya kinya abhaana bha Ryobha
13 Gho ghayo,
mubhe miisho na mutëngë,
na mubhe ne ekirëngërë.
Motoore amiitëngʼërö ghoose mo‑ghareeya ino mokuucha kubhöna,
hano Yesu Kirisito akorighibhu haheero.
14 Inyu n‑abhaana bha Ryobha moonyi.
Ibheere moresooke,
motiishereri ghutambana wiiki amiigha ghano moore nagho hayo ekeenyuma,
eriibhagha riire moore mokeere korimënya Eryobha.
15 Eryobha rino ꞉reebhabherekiire,
n‑itööbhiyu.
Ibheere inyu bhoose mokwëndëru mubhe abhatööbhiyu mo‑ghoose ghano moghuköra,
16 gho kubha Eryobha ndebhughiri mo‑Mandëkö Amatööbhiyu kubha,
“Mubhe abhatööbhiyu,
gho kubha eni m‑Mutööbhiyu neenyi.”b
17 Inyu mokorebherekera Eryobha,
Taata.
Iryo retaakwahukani omooto wowoose,
amare ndeghotenera ekiina abhaato bhoose kurëngʼaana na amaköri ghano ꞉bhaaköriri.
Gho ghayo,
mumanye gho korisëngëra Eryobha kwo riibhagha rino risaaghiri ghokoonyu re kumanya hano mo‑se kinya abhaghëni.
18 Inyu,
moore mumanyiri kurëngʼaana na amaköri ghaanyu amabhe,
kinya bhuno ꞉muughabhiri koru kwo bhasookoro bhaanyu.
Ibheere mumënyë kubha,
Eryobha retabhatooriri inyu koru mo‑ghano moore moraköra,
gho kuhökëri ebheghiro bhino bhehaasarëka,
kinya chambiiri na chasahaabhu.
19 Amare,
ndebhatooriri gho kuhökëri amasaahë ghano ghaanyi ne eriighori ikoro.
Amasaahë ghayo n‑gha Kirisito,
iwe naare kinya omoona o ngʼöndu uno ataanyi no obhurëma koru ghosuuheru.
20 Korwera hano ase ere ekeere ghutëëmu,
Eryobha ndeere rimariri komwahura gho ghiri iyo.
Amare reghaghanya mbagha chaasiko chino che ntenero,
niho rekamurëëta na komwërëkani haheero mo‑bhaato bhoose bha mo‑se.
Ghayo ghoose ꞉ndiiköriri gho ghiri yaanyu.
21 Kohetera gho Kirisito,
mokorekumi Eryobha,
rino remoryokiri koru mo‑bhaku na komuha obhokumi obhokoro.
Gho ghayo,
mokomokumi na koriitëngʼëra Eryobha.
22 Inyu mumanyiri kurëngʼaana na ameeghi gha hëënë ighoro e Yesu.
Gho ghayo,
emetema gheenyu ngyeghuru ni ibheere moghotora ghosiigha abhaghëndi bhaanyu kwo bhuhëënë.
Mbe,
mosiighane kwo mukörö mwero,
23 gho kubha mwibhwiru mara e kabhere.
Kwibhoru kuyo,
ghotarweriire mo‑bhiiso bhano bhaghotora ghoku,
amare inyu mwibhwiru kwo ngʼana e Ryobha ino enyi ihöru na neekubha‑ho emiishe ghyose.
24 Kinya Mandëkö Amatööbhiyu ghakobhugha,
“Abhaato bhoose n‑kinya amanyaaki,
no obhuchömu bhoobho
n‑kinya ebhibhari bhe mo‑manyaaki.
Amanyaaki ngahaanyaara
ne ebhibhari mbehaagho,
25 amare angʼana e Mutëmi Waryobha
neekubha‑ho emiishe ghyose.”
c
Angʼana iyo niyo Angʼana Anchömu ino ꞉muuraghaniiru.