Ghutambana eghetuubhaani ke Yesu
12
Mbe,
gho kubha ntoonyi ne erikinda ikoro re bhiibhateri bhano bhatwinariiri,
tobheruusi bhyose bhino bheghotuhööchërëra,
wiiki toghatighe amasari ghano ghaghotoghwishi.
Wiiki toyaare ahönta ino Eryobha retooriri ambërë yiito kwo bhoghumereri.
2 Tubhe toramumööhërëri Yesu,
gho kubha niwe asëëmiri obhokumi bhwito,
wiiki nakobhohikeerani.
Iwe ꞉naaghumeriiri oroko ro musarabha,
tarooche chaasoni gho ghiri e ghuchömëru kuno koore ambërë yaache.
Ibheere niikeere eribhaara re kubhökö gho kwiro re ghetumbe ghe ghitëmi ke Ryobha.
3 Mwihëëbhë kinya bhuno Yesu aghumeriiri ghaare ꞉ghaamobhwine ghano abhaköri bha masari ꞉bhaare bharamoshangʼaani.
Mbe,
gho ghayo,
mwitoore omukörö kubha motaacha ghutamu korekumi Eryobha.
4 Nangabha moghwiköngʼi ghoghakinda amasari,
koru hangʼu mokeere kurööna eriihë mbagha kohikera ghwita amasaahë ghaanyu.
5 Kana,
mwebhuru amangʼana ghano Eryobha ꞉reebhabhooriire gho kobhatoora omukörö inyu bhano moonyi abhaana bhaache?
Eryobha ꞉ndeebhughiri kubha,
“Iye omoona waane,
otabha orachëëra
ghano Omutëmi Waryobha waacho,
aghoghutöngëra.
Wiiki otaku omukörö hano akubha arakurööna.
6 Omutëmi Waryobha nakomutöngëra omooto wowoose uno amosiighiri.
Wiiki nakomurööna omooto wowoose
uno akomwishereri kubha omoona waache.”a
7 Mbe,
moghumereri hano Eryobha rekobharööna.
Ndeghuköra hangʼu gho kubha inyu n‑abhaana bhaache moonyi.
Taanyi‑ho omoona wowoose uno ataakuröönu ni ishe.
8 Eryobha ndehaabharööna abhaana bhaache bhoose.
Gho ghayo,
aribha Eryobha retaakobharööna,
mumënyë kubha inyu moonyi kinya abhaana bhi ibhara,
taanyi abhaana bhaache.
9 Haghirohamu na ghayo,
itu bhoose ntoonyi na bhataata abhiibhori bhiito,
mbaare bharaturööna,
na niitu ntoore torabhasooka.
Kana,
totaakwëndëru komosooka chwee Waryobha Taata wiito uno anyi Mwishaaro kubha tubhe no obhuhöru?
10 Abhiibhori bhiito bha mo‑se ino mbaghoturööna kwo riibhagha ighuhe kurëngʼaana na bhuno bhakwihëëbha kubha m‑bhoheene.
Amare Eryobha ndeghoturööna gho ghiri yiito itu abheene kubha tubhe haghirohamu nawe mo‑bhutööbhiyu bhooche.
11 Taanyi‑ho omooto uno aghuchömëru hano akuröönu,
amare naghwitumata.
Abhaato bhano bhakwegha kubha na atëëmö inchömu gho nchëra e kuröönu,
mbaakubha no omurëmbë na ghuköra amangʼana gha hëënë.
12 Mbe,
mwëngërë changuru mo‑mabhökö ghaanyu ghano ghaanyi amatöbhu na mo‑maru ghaanyu ghano ghaghosingisa.b
13 Mughëndë mo‑chanchëra chino chighörörökiri,
c kubha kino keenyi ekibhëëru ghetaacha kunyahaareka,
amare kihöru.
Atöngërö mo‑bhakumi
14 Mbe,
mwiköngʼi kumanya kwo murëmbë na abhaato bhoose.
Wiiki mwiköngʼi kubha abhatööbhiyu mo‑riimanya reenyu gho kubha taanyi‑ho omooto uno aghotora komorighi Omutëmi ino ataanyi omutööbhiyu.
15 Mubhe amiisho kubha ataacha kubha‑ho omooto wowoose uno aghokindu kubhöna aghareeya e Ryobha.
Wiiki eriitina re bhosongo retasebhokad rebhanyaaki,
reghonchi chaakörö che bhaato bhaaru.
16 Mubhe miisho kubha ataacha kubha‑ho omooto wowoose ghate yaanyu omutaari hamu uno ataakoresooka Eryobha kinya Esaawu.
Iwe aghaghori omweya waache o bhutange gho ghiri e kiinyakurë ke riibhagha rimu hangʼu.e
17 Inyu mweche kubha,
eriibhagha Esaawu ꞉ëndiri ghughabha orubhango,
ishe akaanga,
gho kubha tabhwine omweya o ghotuukuuna amasari ghaache,
nangabha ꞉atabhiire gho changishori.f
18 Inyu motahikiri mo‑gheghoro kino abhaato bhaghotora ghogheturi,
kinya ghe Sinaayi,
kino keere keraaka omororo,
uno ore ne ekengʼuuri eghekoro,
no obhukama bhuhaari chwee.
19 Wiiki motaamara kohika ahaghiro hano Abhiisiraeri bhooghwire chantaara cheraghamba ne eriiraka ikoro re Ryobha rerasiikëra.
Abhiisiraeri hano bhooghwire eriiraka riire,
bhaghatiina chwee,
bhakarisabha Eryobha kubha retabha rerasiikëra nabho wiiki.g
20 ꞉Mbaabhughiri hangʼu gho kubha,
bhataatoriri ghoghumereri eriihatëkö rino Eryobha ꞉riiragheriiri kubha,
“Koru atyenyi eraturi egheghoro kino,
nekwëndëru irasu amabhohe.”h
21 Ghoose ghano ꞉ngaarweriire mo‑gheghoro ghe Sinaayi ghakabhatiini chwee abhaato koru Musa akabhugha,
“ˆNeghasingisa chwee gho kubha neenyi na ahaho inkoro.”i
22 Amare inyu mohikiri mo‑gheghoro ghe Sayuuni,
hano haanyi no omoghya o Yerusareemu e Mwishaaro.
Omoghya uyo n‑omoghya o Ryobha rino reenyi ihöru.
Mo‑moghya uyo mbiikomiine gho ghuchömëru bhamarayika ebheku ne ebheku.
23 Inyu mohikiri mo‑riikanisa re bhiibhoru a bhambërë bha Ryobha,
bhano amariina ghaabho ghaandëkuru Mwishaaro.
Mohikiri ambërë e Ryobha rino reenyi omoteni o kiina o bhaato bhoose na ambërë e bhaato abhahöriicho bhano bhakuure bhano Eryobha rebhahikeriini.
24 Inyu mohikiri o Yesu,
omughöötani o Riiraghano Eriihë,
na kwo masaahë ghaache ghano ꞉ghiitëkiri mo‑musarabha gho ghiri e masari ghiito.
Amasaahë ghayo,
taanyi kinya amasaahë gha Abheeri,
ghano ꞉ghëëndiri korehani asiire.j
25 Mbe,
mukabhaahe motaacha kwanga komutëghëërëra uno aghosiikëra na niinyu.
Aribha Abhiisiraeri bhataatooriibhu hano bhaangiri komutëghëërëra wuure are arabhatöngëra hano mo‑se,
itu ntoghotora bhu ghotooribhu aribha toraanga komutëghëërëra uno aghotutöngëra koru Mwishaaro?
26 Eriibhagha riire Eryobha ꞉reesiikiire koru mo‑gheghoro ghe Sinaayi,
ase yoose eghasingisa.
Amare ibheere ndiraghiri kubha,
“Nekoyesingisi ase wiiki,
nteekoyesingisi ase ayeene hangʼu amare koru erishaaro ryose.”k
27 Angʼana ino,
“wiiki” nekwërëki haheero kubha ebheghiro bhyose bhino Eryobha ritëëmiri mo‑se ino,
mbeghosingisa na koruusibhu‑ho,
kubha bhisaaghe ebheghiro bhiire bhetaaghotora ghosingisu.
28 Gho ghayo,
tubhe torariitabheri Eryobha gho kubha ndetwishereriiri tubhönë obhutëmi bhooche bhuno bhotaaghosingisa.
Tubhe torarisëngëra Eryobha gho nchëra ino ekoretegheri na kwo bhunyööhu,
na gho sooko,
29 gho kubha Eryobha riito ndeenyi kinya omororo muhaari uno oghweki na ghosireekereri kimu.l