Emeremo ghino ghekoretegheri Eryobha
13
Mwëndërërë ghosiighana kinya bhuno ekwëndëru mo‑bhakumi.
2 Wiiki mwëndërërë kobhaghënëhi abhaghëni mo‑chaaka cheenyu,
gho kubha gho ghuköra hangʼu,
abhaato abhande ꞉mbaabhaghënëhiri bhamarayika bha Ryobha ino bhateeche.
3 Mobhahiite bhano bhaanyi mo‑kibhöhö,
mubhe kinya mubhöhuru haghirohamu nabho.
Mobhahiite bhano bhakunyaaka,
mubhe kinya mokunyaaka haghirohamu nabho.
4 Obhokwiri mbokwëndëru ghosooku na abhaato bhoose,
wiiki omosubhe no omukari bhiikabhaahane no obhutaari gho kubha Eryobha ndekobhatenera ekiina abhaato bhoose bhano bhaghuköra obhutaari.
5 Motabha na atëëmö e ghosiigha chambiiri,
amare muhaabhe na bhino moonyi nabhyo,
gho kubha Eryobha eryene ꞉ndeebhughiri kubha,
“Nteeghoghotigha koru nteeghoghosuuhera naabha.”a
6 Nikyo toghotora ghosiikëra ino totaanyi na ahaho kubha,
“Omutëmi Waryobha niwe aghontoori eni,
nteeghotiina egheghiro ghyokyose.
Kana omooto nibhu aghunköra?”b
7 Mobhahiite abhakangati bhano ꞉bhaare bharabheeghi angʼana e Ryobha.
Mwihëëbhë amaköri ghaabho ghano ꞉bhaare bharaköra mo‑riimanya reebho na mweghe obhokumi bhoobho.
8 Yesu Kirisito w‑wuure wuure,
icho,
na reero ne emiishe ghyose.
9 Motangʼiinu na ameeghi aghande amahë gha ghighëni,
gho kubha changuru che metema gheenyu nchekoru mo‑ghareeya e Ryobha,
taanyi mo‑meghiro ghe bhiinyakurë.
Emeghiro ghiyo ghetaakobhatoori ghyokyose bhano bhaghoghitambana.
10 Ntookurë amaruusi ghano ghasinchuru ighoro e haghiro ha koruuseri amaruusi hano koru abhachaama bhano bhakorihökëri Eryobha mwibhuru re ghusëngërëra,
bhataaghwisherereru kurë.
11 Kurëngʼaana ne emeghiro ghe Musa,
Omuchaama Omokoro naare ariimoki amasaahë gha chatyenyi na ghoghasöhi Ahaghiro Ahatööbhiyu ha Hatööbhiyu kubha Eryobha rebhaabhërë abhaato amasari ghaabho.
Amare naare ariimoki chaanyama che chatyenyi chiyo na ghocheeki anche e moghya.
12 Nikyo ꞉ghiighëriri Yesu woose akanyaakibhu na ghwitu anche e kehita eghekoro ke mo‑moghya o Yerusareemu,
kubha abhamuse abhaato amasari ghaabho gho nchëra e masaahë ghaache.
13 Mbe,
na niitu ntomutambane anche e kehita kiyo na ghoghumereri chaasoni kinya bhuno iwe aghumeriiri.
14 Tukörë hangʼu gho kubha mo‑se ino totaanyi no omoghya o miishe ghyose,
amare ntoghughanya ghusöha mo‑moghya o Mwishaaro uno okuucha.
15 Mbe,
twëndërërë koreghongi Eryobha gho kohetera Yesu ino totaaghutamu,
gho kubha amangʼana ghiito gha koreghongi eriina reeche ngatuubhiine na amaruusi ghano tokomoruuseri.
16 Mwëndërërë kobhatoori abhaghëndi na ghusanga nabho ebheghiro bhino moonyi nabhyo,
gho kubha ghuköra hangʼu,
nigho amaruusi ghano ghaghuchömëri Eryobha.
17 Mobhasooke abhakangati bhaanyu na ghughööta amaraghereri ghaabho,
gho kubha nibho bhakobhanyaakera inyu ino bhataaghutamu,
na mbakwëndëru ghutöngööchi emeremo gheebho ambërë e Ryobha.
Gho ghayo mobhasooke,
kubha bhakörë emeremo gheebho gho ghuchömëru,
gho kubha aribha moraanga kobhasooka,
mbaakubha bharaköra emeremo gheebho kwo macheeche,
ne emeremo ghiyo ghetaakubha gherabhatoori inyu ghyokyose.
18 Mwëndërërë ghotusabhera.
Ntoonyi no obhuhëënë kubha emetema ghiito ghetaaghototenera ekiina ghyokyose,
gho kubha ntoghwiköngʼi ghuköra ghano ghaanyi gha hëënë kwo bhaato bhoose.
19 Neghusabha mubhe moransabhera kwo Waryobha kubha nibhëndë ghugharuka bhowaanyu.
Amangʼana gha kuragha
20 Mbe,
Eryobha re murëmbë ꞉ndeemoryokiri Omutëmi wiito Yesu,
Omoriishi Omokoro o changʼöndu,
gho ghiri ekubha ꞉niitiri amasaahë ghaache ghano ghahëënëhiri eriiraghano re miishe ghyose.
21 Eryobha rebhakörë mohikeerane kwo mangʼana amachömu ghoose,
mukörë ghano ghaanyi amiigha ghaache.
Wiiki abhahë obhotoro bho ghuköra ghano ghakomuchömëri gho ghughöötana na Yesu Kirisito.
Iwe aghongibhu emiishe ne emiishe.
Hawubhaabha.
22 Inyu abhahiiri bhaane,
ˆnekabhasasaama chwee mughöötë amangʼana ghano nebherekeriiri,
gho kubha nebhaandëkiire kwo bhoghuhe.
23 Nekwënda mumënyë kubha omokumi mughëndi wiito Timotewo mbamotighoorikiri koru mo‑kibhöhö.
Aribha araacha bhwango hano neenyi,
nekuucha nawe bhowaanyu kobhataarera.