Changuru che bhokumi bho bhaato bha kare
11
Mbe,
obhokumi n‑kubha no obhuhëënë bho mangʼana ghano toghoghiitëngʼëra.
Wiiki n‑ghokumi inkongʼorimu amangʼana ghano totaaghogharighi kwi ibheere.
2 Gho nchëra e korekumi Eryobha,
bhasookoro bhiito ꞉mbiishereriiru ne Eryobha.
3 Gho nchëra e ghokumi,
ntweche kubha Eryobha ꞉ndiitëëmiri ase,
gho kobhugha angʼana.
꞉Ndeebhitëëmiri ebheghiro bhino bhekorighibhu koru mo‑bhino bhetaakorighibhu.
4 Obhokumi ꞉mbuuköriri Abheeri akareruuseri Eryobha amaruusi amachömu ghokera ghano Kaayini ꞉aruusiri.
a Kwo bhokumi bhuyo Eryobha ꞉ndeemubhariire Abheeri kubha omuhëënë gho ghosongʼaana amaruusi ghaache.
Nangabha Abheeri akuure,
amare obhokumi bhooche mbokwëndërëra kubha eghetuubhaani ghichömu ghokwito koru reero.
5 Obhokumi ꞉mbuuköriri Henooki aghaghëghu koru hano mo‑se,
atakuure.
Bhataamorooche wiiki gho kubha Eryobha ꞉ndeemwimokiri ghuye Mwishaaro.
Koru Amandëkö Amatööbhiyu ngakwibhateri kubha,
hano are akeere ghughëghu,
naare ararichömëri Eryobha.b
6 Taanyi‑ho omooto uno aghotora koretegheri Eryobha aribha ataanyi no obhokumi.
Omooto woose uno akwënda korisëngëra Eryobha,
nakwëndëru ghokumi kubha Eryobha ndeenyi‑ho,
na kubha ndekobhaha atuho bhano bhaghwiköngʼi koritabhara.
7 Obhokumi ꞉mbuuköriri Nuhu akaresooka Eryobha,
hano remoshaangʼiri ighoro e mangʼana ghano ꞉ghaare ghakeere korwera.
Gho ghayo aghaköra asafina kubha etoori abhaato bhaache.
c Gho kohetera obhokumi bhuyo,
niyahwire na abhaato bha mo‑se bhano bhataarekumiri Eryobha,
kubha bhateneru ekiina.
Wiiki kwo bhokumi bhuyo,
Eryobha rekamubhara kubha omuhëënë ambërë yaache.
8 Obhokumi ꞉mbuuköriri Abhurahamu akaresooka Eryobha,
hano remobhooriire kubha aru mo‑se yaache,
aghi mo‑se ino Eryobha ꞉reemuraghiri komuha.
Abhurahamu akaru mo‑se yaache,
nangabha taamënyiri hano aghuye.d
9 Obhokumi ꞉mbuuköriri Abhurahamu akamanya kinya omughëni mo‑se ino Eryobha ꞉reemuraghiire komuha.
Naare amanyiri iyo mwibhuru haghirohamu na Isaka na Yakobho,
abhaghabhi haghirohamu nawe bha riiraghano riire riire rino Eryobha ꞉reemuraghiire Abhurahamu.
10 Abhurahamu ꞉naaköriri hangʼu,
gho kubha naare ariitëngʼëra kumanya mo‑moghya uno onyi no obhoroso bhuköngʼu,
omoghya uno Eryobha eryene ꞉reewusëëmiri na kowaabhëka.
11 Obhokumi ꞉mbuuköriri Saara,
nangabha are akunguhiri,
akabhöna obhotoro bho ghughëgha anda,
e gho kubha naare arakumi kubha Eryobha ndekohikeerani eriiraghano reeche.f
12 Mbe,
gho nchëra e mooto umu,
Abhurahamu,
uno are omugharuka chwee,
꞉mbiibhwiru abhaato bhaaru,
kinya chanchöta che mwishaaro na kinya omwishekeenya o mo‑nyancha uno otaaghotora kubharu.g
13 Abhaato bhayo bhoose ꞉mbaakuure bhaanyi no obhokumi.
꞉Mbaakuure bhakeere ghoghasongʼaana ghano Eryobha reere rebharaghiire,
amare mbaare bhagharooche gho kurë na ghosiighasiigha.
Wiiki ꞉mbiisheriiri kubha mbaare abhaghëni na abhaheti mo‑se ino.
14 Abhaato bhano bhaghosiikëra amangʼana kinya ghayo,
mbakwërëki haheero kubha mbakwënda kubha na ase yaabho abheene.
15 Aribha bhangabheere bhariihëëbha ighoro e se yaabho ino bharuure,
mbe,
mbangabhwine omweya o ghugharuka iyo.
16 Amare abhaato bhayo mbaare bhariighomba ase anchömu chwee.
Ase iyo n‑ase e Mwishaaro.
Nikyo Eryobha retaakorighi chaasoni kobherekeru Eryobha reebho,
gho kubha ndimariri ghusëëmi omoghya gho ghiri yaabho.
17 Obhokumi ꞉mboomuköriri Abhurahamu,
hano Eryobha ꞉reemusakiri,
aghiishereri akaruusi Isaka abhe amaruusi gha Ryobha.
Abhurahamu niwe ꞉ahaabhuru eriiraghano koru kwo Waryobha,
amare ꞉niisheriiri komoruusi omoona waache omwene chiri abhe amaruusi,h
18 nangabha Eryobha reere remobhooriire Abhurahamu kubha,
“Kohetera kwo Isaka nokubhöna orwibhoro runo rokobherekeru ro roocho.”i
19 Abhurahamu ꞉naakumiri kubha Eryobha ndeenyi no obhotoro bho komoryoki Isaka koru mo‑bhaku.
Mbe,
Abhurahamu akahaabhu wiiki Isaka uno are kinya omooto uno akuure,
akaryoka.
20 Obhokumi ꞉mbuuköriri Isaka akabhiitabheri abhaana bhaache Yakobho na Esaawu gho ghiri e mangʼana ghano ghakuucha korwera hayo ambërë.j
21 Obhokumi ꞉mbuuköriri Yakobho,
hano atingʼiri ghoku,
akabhiitabheri abhaana bhabhere bha Yusubhuk na korisëngëra Eryobha ino isiimiri mo‑himbo yaache e ghughëndëra.l
22 Obhokumi ꞉mbuuköriri Yusubhu,
hano atingʼiri ghoku,
aghasiikëra amangʼana kebhuno Abhiisiraeri bhaakoru mo‑se e Miisiri.
Wiiki akabharaghereri kubha bhiimoki amaghuha ghaache bhayi nagho ghogharyeka mo‑se e Kanaani.m
23 Obhokumi ꞉mbuuköriri abhiibhori bha Musa bhakamobhisa Musa emyëri etato korwera hano ibhoriiru.
꞉Mbaaköriri hangʼu gho kubha ꞉mbaarooche kubha Musa ꞉niibhwiru muhëntani,
koru bhatatiiniri ghusari omoghiro o mutëmi o Miisiri.n
24 Obhokumi ꞉mbuuköriri Musa,
hano are omontomonkoro,
akaanga kobherekeru mwërëëti o muukë o Bharaawo.
25 Iwe narooche kubha,
ngʼoni kunyaaka haghirohamu na abhaato bha Ryobha ghokera ghwichömi mo‑masari kwo riibhagha ighuhe.
26 Musa ꞉naarooche ghotoku gho ghiri e Kirisito nkoonyi no obhwame ghokera kubhöna agharinga yoose e mo‑se e Miisiri.
꞉Naaköriri hangʼu gho kubha naare ariitëngʼëra atuho ino Eryobha rekomuha chaasiko chino chekuucha.
27 Obhokumi ꞉mbuuköriri Musa akaru mo‑se e Miisiri,
ino ataaghotiina ghukarara kwo mutëmi.
꞉Naaghumeriiri gho kubha naare kinya akorerighi Eryobha rino retaakorighibhu.
28 Obhokumi ꞉mbuuköriri Musa aghaköra anyangi e Bhaasaka.
Akabharaghereri Abhiisiraeri bhahake amasaahë mo‑mahërö gha bhisëku kubha eriibhagha marayika omosireekereri akubha araheta,
ataturi abhaana bhaabho a bhambërë.o
29 Obhokumi ꞉mbuuköriri Abhiisiraeri bhaghatëënya anyancha e Shaamu kwo maghoro kinya bhuno abhaato bhaghughënda mo‑se ayoomu.
Amare Abhamiisiri hano bhasakiri ghutëënya,
amanche ghakabhakundekeri,
bhaaghaku bhoose.p
30 Obhokumi ꞉mbuuköriri Abhiisiraeri bhakiinaara eribhendo ikoro re moghya o Yeriko gho chaasiko mohungate,
reeghagho.q
31 Obhokumi ꞉mbuuköriri Rahaabhu uno are omukari musöngörëëri akahöna ghwitu haghirohamu na abhaato bhano bhataare bhararekumi Eryobha.
Akahöna ghwitu gho kubha ꞉naabhaghënëhiri abhaseghaayi bha Bhiisiraeri kwo murëmbë.r
32 Nebhughe ke ghokera ghayo?
Nteenyi ne eriibhagha re ghosiikërëra ighoro e bhokumi bho Ghitiyooni,
na Bharaki,
na Samusooni,
na Yeebhuta,
na Tawuti,
na Samweri na abharööti.
33 Kurëngʼaana na ghokumi koobho,
abhaato bhayo ꞉mbaarööniri amahë na abhatëmi bha chaase echende,
bhakabhakinda.
Mbaare bharakangata kwo bhuhëënë na ghosongʼaana ghaare Eryobha ꞉riiraghiri kobhaha.
Wiiki mbaare na changuru che kohunya emenu ghe chaaka.
34 Kurëngʼaana na ghokumi koobho,
mbaare bhararimi omororo muhaari,
꞉mbaahöniri ghwitu ne ekinyamiino.
Bhataare ni inguru,
amare Eryobha ꞉ndeebhaheere changuru che ghokinda eriihë na kuhëëbha abhaashirikare bha chaase echende.
35 Obhokumi ꞉mbuuköriri abhakari nyarebhe bhaghasongʼaana abhahiiri bhaabho bhano ꞉bhaare bhakuure,
amare bhakaryoka.
Abhande ꞉mbaanyahaaruru chwee na ghwitu,
amare bhatiisheriiri ghotighooroku,
gho kubha mbaare bhariitëngʼëra kubha,
Eryobha ndengabharyokiri na kobhaha obhuhöru bhuno bhoonyi no obhwëra chwee.
36 Abhamu mbaare bharabhachëëra na kobhatëma ne emicharicho.
Abhande mbaare bharabhabhöha ne eminyörörö na ghotooru mo‑maghërëcha.
37 Wiiki abhande ꞉mbiituru gho kobharasa na amabhohe,
abhande ꞉mbaanunguru ebheteneka bhibhere ne emesumeeno,
s na abhande mbaare bhariitu ne ebhinyamiino.
Abhande mbaare bhariinaaranaara bhabheekiri amashëërö gha changʼöndu na gha chambërëtë.
Wiiki m‑bhahabhe ꞉bhaare,
꞉mbaanyaakibhuru na ghukörëru amabhe maaru.
38 Abhaato bhayo mbaare bhariinaaranaara mwibhara na mo‑bheghoro,
bhariikara mo‑chakoobho na mo‑maribha.
Abhaato bhayo,
ase tirengʼaniire kubha nabho.
39 Nangabha abhaato bhayo bhoose ꞉mbiishereriiru ne Eryobha kurëngʼaana no obhokumi bhoobho,
amare bhataabhwine ghaare Eryobha reere rebharaghiire.
40 Eryobha ꞉ndiiköriri hangʼu gho kubha ndeere retusëëmiire amangʼana amachömu chwee,
kubha itu haghirohamu nabho,
tohikeeranibhu gho kubhöna ghaare ꞉riiraghiri ghotuha.