Abheebhuraaniya 10

Mbe, emeghiro ghe Musa n‑eghetuubhaani ke mangʼana amachömu ghano ghakuucha, amare taanyi amangʼana ghayo agheene. Kiyo nikyo gheghuköra amaruusi ghano abhaato bhakoruusi kira omooka kurëngʼaana ne emeghiro ghiyo, ghetaaghotora naabha kobhamusa abhaato bhano bhakorisëngëra Eryobha. 2 Aribha amaruusi ghayo ngangabheere gharabhamusa amasari ghaabho hëënë, abhaato bhano ꞉bhaare bharasëngëra Eryobha gho nchëra e ghutambana emeghiro, bhatangabheere bharëëndërëra kwiyoghu mo‑metema gheebho kubha n‑abhaköri bha masari. Wiiki bhatangatighiri koruusi amaruusi ghaabho gho kubha Eryobha ndengabheere rebhamusiri mara rimu hangʼu. 3 Amare amaruusi ghayo gha kira omooka ngaare gharabhahiiti abhaato amasari ghaabho, 4 gho kubha amasaahë gha chambërëtë na gha chaheeri ghataanyi ni inguru che koruusi amasari gha bhaato. 5 Nikyo ꞉ghiighëriri hano Kirisito ichiri mo‑se ino, akarebhoorera Eryobha akabhugha,

“Iye tookwënda amaruusi gha chatyenyi

koru amaruusi gha ghosireekereru,

amare nusëëmiri omobhere waane.

6 Iye tuchömiiru na amaruusi gha ghosireekereru,

hamu amaruusi gho ghiri e masari.

7 Mbe, gho ghayo ꞉neesiikiire, nekabhugha,

‘Oo Waryobha waane! Eni neenyi hano kubha

nibhe neraköra amiigha ghaacho,

kinya bhuno Amandëkö Amatööbhiyu

ghaghungamba eni.’ ”

8 Ekimbërë Kirisito ꞉naasiikiire akabhugha kubha, “Iye tookwënda amaruusi na amaruusi gha chatyenyi, na amaruusi gha ghosireekereru na amaruusi gho ghiri e masari, wiiki tuchömiiru nagho.” ꞉Naabhughiri hangʼu, nangabha amaruusi ghoose ghayo mbaare bhararuusi kurëngʼaana ne emeghiro ghe Musa. 9 Akamara aghasiikëra akabhugha, “Oo Waryobha waane! Eni neenyi hano kubha nibhe neraköra amiigha ghaacho.” Gho ghayo Eryobha ꞉ndeeruusiri eriiraghano e rimbërë na koretoora eriiraghano re kabhere. 10 Mbe, gho kubha Yesu ꞉naahikeriine amënda gha Ryobha, itu ntoghuköru abhatööbhiyu gho nchëra e maruusi gha mobhere o Yesu uno ꞉iruusiri mara rimu hangʼu.

11 Kurëngʼaana ne Eriiraghano re Kare, chaasiko choose bha Bhayahuuti mbahaarihökëri Eryobha na koruusi amaruusi ghaare ghaare mara kaaru ghano ghataaghotora naabha koruusi amasari. 12 Amare Kirisito ꞉niiruusiri mara rimu hangʼu kubha amaruusi gho ghiri e masari ghiito. Iwe niwe amaruusi ghano gha ghwisha emiishe ghyose. Gho ghayo niikeere eribhaara re kubhökö gho kwiro kwo Ryobha. 13 Iyo naghughanya mbagha hano Eryobha reghotoora abhabhisa bhaache haase e maghoro ghaache. 14 Gho nchëra e Yesu kwiruusi mara rimu hangʼu, nabhamusiri na kobhaköra kubha abhaato bhaache emiishe ghyose.

15  nekuhëënëhi amangʼana ghano ghokwito kubha n‑gha hëënë hano ekobhugha kubha,

16 “Omutëmi Waryobha nabhughiri kubha,

‘ Eriihë rino nekoretoora na Abhiisiraeri

mo‑chaasiko chino chekuucha niryo rino.

Neghotoora emeghiro gheene mo‑metema gheebho,

na neghoghyandëka mo‑bhongo bhoobho.’ ”

17 Ekamara Akörö Ahörëëru ekabhugha kubha, “Nteekohiita wiiki amasari ghaabho koru amaköri ghaabho amabhe.” 18 Mbe, aribha Eryobha rimariri kobhaabhëra abhaato amasari, ghataanyi‑ho amënda gha koruusi amaruusi wiiki.

Ntoonyi no obhohuuru bho ghuye ambërë e Ryobha

19 Inyu abhahiiri bhaane, gho nchëra e masaahë gha Yesu, itu ntoonyi no obhohuuru bho ghusöha gho kohetera amasaahë gha Yesu totaanyi no obhotiini. 20 Gho nchëra e roko rooche, iwe natwighoriire anchëra ahë e bhuhöru, kubha totore ghwishuka ambërë e Ryobha. N‑kinya koheta mo‑mwando uno oteniini na ghusöha Ahaghiro Ahatööbhiyu ha Hatööbhiyu. 21 Itu ntoonyi nawe Omuchaama Omokoro uno anyi omwimeereri o bhaato bha mo‑nyumba e Ryobha. 22 Mbe, tubhe toraghe ambërë e Ryobha ne emetema myero ghino ghekomokumi kwo bhuhëënë, gho kubha Eryobha ndetomusiri emetema ghiito emebhe gho nchëra e masaahë gha Yesu na ghoghyeghi emebhere ghiito na amanche ameero. 23 Twiköngʼi chwee ghoghaghööta ghano toghoghakumi na ghoghitëngʼëra totighe kohombahoomba, gho kubha Eryobha n‑ihëënë mo‑ghano riraghiri. 24 Wiiki totereere bhuno toghotoorana omukörö, kubha tosiighane na ghukörërana amachömu itu bheene kwo bheene. 25 Totatigha chaasughara chiito che ghutëmëërana haghirohamu kwo masabhi kinya bhuno abhaato abhande bhaghuköra. Amare twëndërërë ghotoorana omukörö itu bheene kwo bheene ghokera bhuno toore toraköra, gho kubha ntweche kubha orosiko ro ghugharuka kwo Mutëmi ˆroghatingʼi.

26 Aribha ntokwëndërëra ghuköra amasari gho ghitaraaho eriibhagha ntobhweche obhuhëënë bho Ryobha, mbe, retaanyi‑ho eriruusi erende rino reghotora ghotomusa amasari. 27 Mbe, ntusaaghiri toraghanya kwo bhotiini ghoteneru ekiina ke Ryobha kwo mororo muhaari uno okobhasireekereri abhaato bhoose bhano bhakoryanga Eryobha. 28 Omooto uno are arataasi emeghiro ghe , bhataare ne ebheghongi ghokooche, naare ariitu hano abhiibhateri bhabhere hamu bhatato bhakobhugha kubha mahëënë naköriri hangʼu. 29 Ibheere mwihëëbhë! Kana, n‑anchagho e ngʼana hayi ino akubhöna omooto uno akomutaraaha na korighi kubha amasaahë gha riiraghano rino ꞉reemomusiri amasari ghaache kubha taanyi egheghiro ghe ghotereera, na kwo mooto uno aghotoka Akörö Ahörëëru ino enyi e ghareeya? 30 Ntweche Eryobha ꞉ndeebhughiri kubha, “Korehani asiire n‑emeremo gheene, eni niwe nehaarehani asiire.” Wiiki ꞉ndeebhughiri kubha, “Omutëmi Waryobha nakobhatenera ekiina abhaato bhaache.” 31 N‑angʼana e ghotiini chwee ghugho mo‑mabhökö gha Ryobha rino reenyi ihöru.

32 Amare mohiite chaasiko chiire ꞉muusëëmiri komokumi Kirisito. Nangabha moore morabhöna anyaako inkoro, koru hangʼu moore moraghumereri anyaako iyo. 33 Eriibhagha nyarebhe abhaato mbaare bharabhatoka na kobhanyaaki haheero. Eriibhagha erende moore morabhatoori bhano ꞉bhaare bharanyaaka kinya inyu. 34 Wiiki moore morabharigheri changori abhaghëndi bhaanyu bhano ꞉bhaare bhabhöhuru mwighërëcha. Wiiki hano ꞉bhaare bharabhahöka obhwame bhoonyu, moore morachömëru mo‑metema gheenyu gho kubha moore mweche kubha moonyi ne ebheghiro bhyaru bhichömu chwee bhino bhetaaghosira naabha.

35 Gho ghayo, mwëndërërë kubha no obhosubhesubhe bhuyo, gho nchëra iyo moghosongʼaana atuho inkoro chwee koru kwo Waryobha. 36 Mokwëndëru mubhe moraghumereri kubha eriibhagha mookubha moraköra ghano Eryobha rekwënda, mubhönë kiire Eryobha ꞉reebharaghiire kobhaha. 37 Yandëkuru mo‑Mandëkö Amatööbhiyu kubha,

“Ndisaaghiri eriibhagha ighuhe hangʼu,

uno akuucha, nakuucha, koru taaghukëëchëra.

38 Uno anyi omuhëënë,

nakumanya kwo bhokumi.

Amare aribha aghotigha ghuntambana,

eni nteeghuchömëru nawe naabha.”

39 Amare totaanyi kinya abhaato bhano bhaghotigha koritambana Eryobha, bhano bhabhoriri. Amare ntoonyi haghirohamu na bhaare bhakorekumi. Gho nchëra iyo, ntotooriibhu.