Amangʼana gha Riiraghano e rimbërë
9
Eriiraghano e rimbërë ndeere ne emeghiro ghino abhaato ꞉bhaare bharaghesooka hano ꞉bhaare bhararisëngëra Eryobha.
Wiiki Eriiraghano riyo ndeere na Ahaghiro Ahatööbhiyu ha korisëngërëra Eryobha mo‑se ino.
2 ꞉Haabhëkuru eriibhuru gho ghiri e korisëngëra Eryobha rino reere ne ebhenyumba bhibhere.
Ekenyumba e kimbërë nkeere ne eghesungo ghe ghotoorera ebhemore na chameecha che ghotoora emighaate ambërë e Ryobha.
Ekenyumba kiyo ꞉nkeebherekiiru,
Ahaghiro Ahatööbhiyu.
3 Mo‑riibhuru riyo ꞉haare no omwando mokoro oteniini oraahukani ekenyumba e kimbërë na ghe kabhere.
Ekenyumba ghe kabhere ꞉nkeebherekiiru,
Ahaghiro Ahatööbhiyu ha Hatööbhiyu.
4 Mo‑kenyumba kiyo ꞉haare na ahaghiro ha ghusëngërëra hano haare haabhëkuru gho sahaabhu hano abhachaama ꞉bhaare bharaghunderi‑ho akorose.
Wiiki ndeere‑mu Erisandëkö re Riiraghano rino ꞉riihakuru asahaabhu chambaara choose.
Mo‑risandëkö riyo ꞉haare na anyongo e sahaabhu,
ino ere ne ekiinyakurë kino kebherekiiru manaa na ahimbo e Haruuni ino esebhokiri amato.
Wiiki mbeere‑mu ebheteneka bhibhere bhe mabhohe bhino ꞉bhyandëkuru emeghiro ghe riiraghano.b
5 Ighoro e risandëkö riyo ncheere‑ho chasanaamu che bhetyenyi bhibhere bhino bheere bhërëërëki obhokumi obhokoro bho Ryobha.
c Ebhetyenyi bhiyo mbeere na amabhabha ghano ghakundekiiri erisandëkö ahaghiro hayo habherekiiru,
eghetumbe ghe changori.
Amare eriibhagha rino totaaghotora ghoghatöngöchi bhoheene ghoose ghayo kebhuno ghaanyi.
6 Mbe,
eriibhagha ebheghiro bhyose bhisëëmiru na ghotoora amëërëkërëri bhoheene,
abhachaama ꞉mbaasöhiri chaasiko choose mo‑kenyumba kiire e kimbërë ke riibhuru,
na korihökëri Eryobha kwo meremo ghe bhuchaama.
7 Amare Omuchaama Omokoro omwene chiri,
niwe are ariisherereru ghusöha mo‑kenyumba kiire ghe kabhere,
woose naare arasöha mara rimu hangʼu kwo mooka.
Wiiki nëëndiiru ghusöha na amasaahë gha tyenyi ino esinchuru na koruusi kwo Waryobha.
Naare araköra hangʼu gho ghiri e kwabhëru amasari ghaache na amasari gha bhaato abhande bhano ꞉bhaare bharaköra amasari ino bhateeche.
8 Akörö Ahörëëru nehaatwërëki kubha anchëra e ghusöha Ahaghiro Ahatööbhiyu ha Hatööbhiyu ekeere ghwighoru kwo bhaato abhande gho kubha,
eriibhuru riire e rimbërë rekeere reraköra emeremo.
9 Emeremo ghyose ghino gheere gheraköru mo‑riibhuru riire n‑eghetuubhaani ke meremo ghe riibhagha rino.
Nekwërëki kubha,
amaruusi na chatyenyi che ghosireekereri ghano ꞉ghaare ghararuusibhu kwo Waryobha,
ghataare gharatora koruusi amasari koru mo‑metema ghe bhaato bhano ꞉bhaare bhararisëngëra Eryobha.
10 Amangʼana ghayo,
ngaare ighoro e bhiinyakurë,
ne ebhinywebhu na kwimusa emebhere.
Ghoose ghayo ngaghosira eriibhagha rino Eryobha reghugharura ebheghiro kubha bhihë.
Amasaahë gha Kirisito
11 Kirisito ꞉niichiri kubha abhe Omuchaama Omokoro o mangʼana amachömu ghano ghakuucha.
Iwe niwe aghuköra emeremo mo‑riibhuru erende ichömu wiiki ndehikeriine ghokera riire e rimbërë.
Eriibhuru riyo retaabhëkuru na abhaato,
niko kobhugha,
eriibhuru rino retaanyi re mo‑se ino.
12 Iwe ꞉naasöhiri mara rimu hangʼu Ahaghiro Ahatööbhiyu ha Hatööbhiyu.
Taasöhiri na amasaahë gha chambërëtë hamu gha kimööri,
amare ꞉naasöhiri na amasaahë ghaache omwene kubha atotingori emiishe ghyose.
13 Kurëngʼaana ne emeghiro ghe Musa,
abhachaama mbaare bharasusuuteri amasaahë gha chambërëtë,
na gha chaheeri ne eriibhu re bhimööri kwo bhaato bhano ꞉bhaare abhaghonchu kubha bhamusu emebhere gheebho.
14 Amare ibheere amasaahë gha Kirisito ngaanyi na changuru chwee ghokera amasaahë gha chatyenyi chiyo!
Gho nchëra e Körö ino enyi e miishe ghyose,
iwe ꞉niiruusiri kwo Waryobha kubha amaruusi ghano ghahikeriine.
Amasaahë ghaache nigho ghaghotomusa emetema ghiitod ighoro e masari ghano ghaghughëri oroko kubha torisëngërë Eryobha rino reenyi ihöru.
15 Gho ghayo,
Yesu niwe akobhaghöötani abhaato ne Eryobha mo‑Riiraghano Eriihë kubha abhaato bhano Eryobha rebhahwire bhabhönë obhuhöru bho miishe ghyose bhuno ꞉riiraghiri kobhaha.
Ghano ngaghotora ghuköru hangʼu gho kubha Yesu ꞉naakuure kubha abhatingori abhaato koru mo‑masari ghano ꞉bhaare bharaköra mo‑Riiraghano re Kare.
16 Erabha omooto andëkiri ighoro e ghabho e bheghiro bhino anyi nabhyo,
ghano andëkiri ngaghuköra emeremo aribha omooto uyo akuure.
17 Ghano ꞉aragheriiri ngaakubha na changuru aribha omooto uno ꞉andëkiri nakuure,
amare ghataakubha na changuru kinya bhuno omooto uyo angabheere muhöru.
18 Nikyo ꞉ghiighëriri koru Eriiraghano riire re Kare retaare na changuru oraanga ghwita amasaahë gha chatyenyi.
19 Hano Musa amariri kuraghani emeghiro ghe Ryobha ambërë e Bhiisiraeri bhoose kinya bhuno ere yëndiiru,
꞉niimokiri amasaahë gha kimööri na gha ndome,
aghasangerani na amanche.
Hano amariri,
aghasusuuteri amasaahë ghayo mo‑ghitabhu ke meghiro na mo‑bhaato bhoose gho kuhökëri obhorobha bhubhararatu bhuno bhubhöhuru mo‑ghisa ke rweri.
20 Niho Musa akabhabhoorera abhaato bhoose akabhugha,
“Ghano n‑amasaahë ghano ghakuhëënëhi eriiraghano re Ryobha rino ꞉aragheriiri kubha mubhe moraritambana.”e
21 Hangʼu hangʼu,
Musa ꞉naasusutiiri amasaahë eriibhuru ne ebheghiro bhyose bhino ꞉bhaare bharahökëri eriibhagha ꞉bhaare bharasëngëra Eryobha.
22 Kurëngʼaana ne emeghiro ghe Musa,
amasaahë nigho ꞉ghaare gharamusa nanga kira egheghiro.
Aribha amasaahë ghatiitekiri,
Eryobha retaakobhaabhëra abhaato amasari ghaabho.
Kirisito ꞉niiruusiri
23 Eriibhuru ne ebheghiro bhyose bhino abhachaama ꞉bhaare bharahökëri koruusi amaruusi,
mbeere eghetuubhaani ke bheghiro bhino bheenyi Mwishaaro.
Eriibhuru ne ebheghiro bhiyo mbeere bheramusu gho nchëra e masaahë gha chatyenyi,
amare ebheghiro bhe Mwishaaro mbekwëndëru komusu na amaruusi amachömu ghano ghaghokera amasaahë ghayo gha chatyenyi.
24 Kirisito taasöhiri Ahaghiro Ahatööbhiyu ha Hatööbhiyu hano habhëkuru na abhaato,
ahaghiro hayo n‑eghetuubhaani ke ahaghiro ha hëënë hano haanyi Mwishaaro.
Iwe ꞉naasöhiri Mwishaaro aheene,
kwo riibhagha rino naghotusabhera ambërë e Ryobha.
25 Omuchaama Omokoro o Bhayahuuti naare arasöha Ahaghiro Ahatööbhiyu ha Hatööbhiyu kira omooka na amasaahë gha chatyenyi.
Amare Kirisito taasöhiri Mwishaaro kubha iruusi mara kaaru.
26 Aribha nengabheere hangʼu,
mbe,
nangabheere arëndëru kunyaaka mara kaaru korwera hano Eryobha ritëëmiri ase.
Amare iwe mo‑chaasiko chino che ntenero,
niichiri na kwiruusi kubha amaruusi mara rimu hangʼu kubha atomuse amasari ghiito.
27 Omooto woose nahaaku mara rimu hangʼu,
aramara ghoku,
Eryobha remotenera ekiina.
28 Hangʼu hangʼu Eryobha ꞉ndeemoruusiri Kirisito kubha aku na kubha amaruusi mara rimu hangʼu kubha Eryobha rebhaabhërë abhaato bhaaru amasari ghaabho.
Wiiki Kirisito nakuucha mara e kabhere.
Amare eriibhagha riyo,
taakuucha kwabhëra abhaato amasari ghaabho,
amare nakuucha kobhaha obhotoori abhaato bhano bhaghwiköngʼi komughanya.