Omuchaama Omokoro o Riiraghano Eriihë
8
Mbe,
angʼana ankoro mo‑ghoose ghayo niyo ino.
Itu ntoonyi nawe Omuchaama Omokoro anga uyo,
iwe niikeere eribhaara re kubhökö gho kwiro kwo Mutëmi Waryobha,
ahaghiro ha sooko chwee iyo Mwishaaro.
2 Iwe n‑Omuchaama Omokoro o Haghiro Ahatööbhiyu iyo Mwishaaro,
moose e riibhuru riire re hëënë rino retaabhëkuru no omooto amare n‑Omutëmi Waryobha omwene aryabhëkiri.
3 Eryobha ndehaabha reraahura Omuchaama Omokoro kubha abhe araruusi amaruusi na chatyenyi che ghosireekereri gho ghiri e masari gha bhaato.
Hangʼu hangʼu Omuchaama wiito uyo Omokoro,
nakwëndëru kubha woose abhe ne egheghiro ghe koruusi kwo Waryobha.
4 Aribha Yesu angëndëriire ghwikara mo‑se ino,
tangabheere Omuchaama Omokoro naabha,
gho kubha mo‑se ino mbaanyi‑ho abhachaama bhano bhakoruusi amaruusi kurëngʼaana ne emeghiro ghe Musa.
5 Ghaare abhachaama bhayo bhaghuköra Ahaghiro Ahatööbhiyu n‑eghetuubhaani ne ekiriiri ke ghaare ghaanyi Ahaghiro Ahatööbhiyu iyo Mwishaaro.
Nikyo ꞉ghiighëriri Eryobha rekamobhoorera Musa hano are arisëëmi kwabhëka eriibhurua re ghusëngëra Eryobha kubha,
“Ukörë amangʼana ghoose kinya bhuno nekwërëkiri mo‑gheghoro kiire ghe Sinaayi.”b
6 Amare Eryobha ndemoheere Yesu emeremo ghe bhuchaama ghino gheenyi no obhwëra chwee ghokera ghiire ghe bhachaama a bhambërë.
Yesu niwe aghutëmëërani abhaato ne Eryobha gho kohetera Eriiraghano rino reenyi no obhwëra ghokera riire e rimbërë.
Wiiki Eriiraghano riyo ndyabhëkuru mo‑bhoroso obhuchömu,
ekebhune keeche n‑kubha,
ndyabhëkuru ighoro e riiraghano ichömu chwee ghokera riire re Riiraghano re Kare.
7 Aribha Eriiraghano e rimbërë rengabheere no obhwëra,
omweya o Riiraghano re kabhere tongatabhiiru.
8 Amare hano Eryobha rerooche obhobhe bho bhaato bhaache,
reghasiikëra rerabhugha,
“Mutëghëërërë,
eriibhagha ndekuucha,
hano neghotoora Eriiraghano Eriihë
na abhaato bha Isiraeri na abhaato bha Yuuta.
9 Eriiraghano Eriihë rino retaakubha
kinya riire e rimbërë,
rino ꞉neetooriri na bhasookoro bhaabho,
eriibhagha riire hano neere nerabhakangata bhoheene
koru mo‑se e Miisiri.
Ibho bhataare abhahëënë kwo Riiraghano reene
re hayo ekimbërë.
Kino nikyo ꞉ghiighëriri nekabhatigha
kinya bhuno ꞉bhaare.
Hangʼu nibhu Omutëmi Waryobha akobhugha.
10 Eriiraghano Eriihë rino nekoretoora na Abhiisiraeri
mo‑chaasiko chino chekuucha niryo rino.
Neghotoora emeghiro gheene mo‑bhongo bhoobho,
na neghoghyandëka mo‑metema gheebho.
Eni neekubha Eryobha reebho
nabho mbaakubha abhaato bhaane.
11 Taakubha‑ho omooto wowoose
uno akubha areeghi omughëndi,
hamu o komobhoorera omughëndi waache kubha,
‘Omumënyë Omutëmi Waryobha.’
Omooto woose korwera omosuuhu mbagha omokoro
mbakuumënya eni.
12 Neekubha hangʼu,
gho kubha nteekobhabharera obhobhe bhoobho,
wiiki nteekohiita amasari ghaabho.”c
13 Eryobha hano rekobhugha kubha eriiraghano rino n‑ihë,
꞉ndiiköriri eriiraghano e rimbërë kubha re kare.
Mbe,
egheghiro ghyokyose kino kibheere ghe kare ngekunguhiri,
ghetaanyi no omoremo wowoose,
haghuhe keenyi koru‑ho.