Obhuchaama bho Merikiseteeki
7
Merikiseteeki uyo naare omutëmi o Sareemu.
Wiiki naare omuchaama o Ryobha Omokoro o Bhyose.
Merikiseteeki aghatëmëërana na Abhurahamu hano Abhurahamu are araru mwihë.
Abhurahamu naare arööniri na abhatëmi bhane akabhahicha,
Merikiseteeki akamwitabheri.
2 Iwe Abhurahamu akaruusi imu ghwi ikomi mo‑bheghiro bhino ahökiri abhatëmi bhaare mwihë na komuha Merikiseteeki.
a Eriina re Merikiseteeki egheteemoro keeche,
“Omutëmi uno anyi no obhuhëënë,”
wiiki eriina re “Omutëmi o Sareemu” egheteemoro keeche,
“Omutëmi o murëmbë.”
3 Nekorighibhu kubha abhiibhori bha Merikiseteeki bhatamënyuru,
no orwibhoro rooche rotamënyuru,
kwibhoru na ghoku kooche ghotamënyuru.
Iwe n‑kinya Omoona o Ryobha,
gho kubha n‑omuchaama o miishe ghyose.
4 Mööhi kebhuno Merikiseteeki are omokoro!
Koru sookoro wiito Abhurahamu ꞉naamoheere imu ghwi ikomi e bheghiro bhino ahökiri abhatëmi bhaare mwihë.
5 Kurëngʼaana ne emeghiro ghe Musa,
abhaato bhoose koru mo‑rwibhoro ro Bharaawi bhano ꞉bhaare abhachaama,
꞉mbeendiiru ghosongʼaana imu ghwi ikomi koru mo‑Bhiisiraeri abhaghëndi bhaabho.
꞉Mbëëndiiru ghuköra hangʼu nangabha bhoose ꞉bhaare bha mo‑rwibhoro ro Abhurahamu.b
6 Nangabha Merikiseteeki taruure mo‑rwibhoro ro Bharaawi,
koru hangʼu ꞉niimokiri imu ghwi ikomi koru kwo Abhurahamu.
Merikiseteeki ꞉naamwitabhiiri Abhurahamu uno Eryobha ꞉riiraghiri komwitabheri.
7 M‑mahëënë kubha,
omokoro niwe ahamwitabheri omosuuhu.
8 Wiiki abhachaama bhayo koru mo‑rwibhoro ro Bharaawi bhano bhakubhöna imu ghwi ikomi,
n‑abhaato bhano bhaaghoku,
amare Merikiseteeki uno ahaabhuru imu ghwi ikomi koru kwo Abhurahamu,
naghughambu kubha muhöru anyi.
9 Mbe,
ntoghotora kobhugha kubha,
koru Raawi uno abhaato bha rwibhoro rooche bhabhwine imu ghwi ikomi,
woose ꞉naaruusiri imu ghwi ikomi kohetera kwo Abhurahamu.
10 Nekobhugha hangʼu gho kubha,
eriibhagha rino Merikiseteeki ꞉atëmëriine na Abhurahamu,
Raawi naare akeere kwibhoru,
mo‑mobhere o Abhurahamu are.
Obhuchaama bho Yesu n‑kinya bho Merikiseteeki
11 Abhiisiraeri ꞉mbaahaabhuru emeghiro ghe Musa gho kohetera mo‑bhuchaama bho Bharaawi.
Amare koru hangʼu obhuchaama bhuyo bhotahikeriine.
Gho ghiri iyo,
mboore bhörëëndëru obhuchaama obhonde kinya bho Merikiseteeki bhuno bhotaanyi kinya bho Haruuni.
12 Mbe,
erabha obhuchaama bhoragharoru,
ngekwëndëru ne emeghiro ghyose ghigharoru.
13 Omooto uno aghughambu hano,
n‑Omutëmi wiito Yesu uno ataare Omuraawi.
Taare‑ho omooto wowoose koru mo‑ritöngö reeche uno are araköra emeremo ghe bhuchaama.
14 Nimënyuru kubha iwe narweriire mwitöngö re Yuuta,
wiiki hano Musa are arasiikëra ighoro e bhachaama tasiikëriire eritöngö riyo.
15 Amangʼana ghano neghosiikëra ngaanyi haheero,
gho kubha Omuchaama owonde narweriire uno anyi kinya Merikiseteeki.
16 Iwe taare Omuchaama gho kubha nahikeriini emeghiro ghino ghekuraghereri kubha abhachaama bharwere mo‑rwibhoro ro Raawi,
amare nabheere Omuchaama gho changuru che bhuhöru bhooche bhuno bhotaanyi na antenero.
17 Yandëkuru mo‑Mandëkö Amatööbhiyu kubha,
“Iye niiye Omuchaama o miishe ghyose,
kinya bhuno Merikiseteeki are.”c
18 Mbe,
Eryobha ꞉ndeeruusiri eriiraghereri riire re simoka ighoro e bhachaama,
gho kubha retaare na changuru,
wiiki retaare ne emeremo ghyoghyose.
19 ꞉Ndeegheruusiri gho kubha emeghiro ghiyo ghetaare no obhotoro bho kohikeerani egheghiro ghyokyose,
amare ibheere Eryobha ndetoheere amiitëngʼërö aghande ghano ghaanyi no obhwëra bhokoro,
gho kohetera ghayo,
ntoghotora koriishukerera.
20 Eriibhagha rino Abharaawi ꞉bhaare bharatooru kubha abhachaama,
Eryobha retarahiiri ghyokyose ghokoobho.
Amare hano Eryobha remotooriri Yesu kubha Omuchaama,
꞉ndiirahiiri,
21 kinya bhuno yandëkuru mo‑Mandëkö Amatööbhiyu kubha,
“Omutëmi Waryobha narahiiri,
wiiki taaghugharura amiihëëbhö ghaache naabha.
‘Iye niiye Omuchaama o miishe ghyose.’”d
22 Mbe,
gho ghiri e kuraheri kuyo,
Yesu niwe ahëënëhiri eriiraghano rino reenyi no obhwëra bhokoro ghokera riire re riibhagha re Musa.
23 Eriibhagha riire re Riiraghano re Kare,
abhachaama mbaare bhaaru.
Bhatëëndëriire ghuköra emeremo gheebho gho kubha mbaare bharaku.
24 Yesu n‑Omuchaama emiishe ghyose gho kubha iwe m‑muhöru emiishe ghyose.
25 Gho ghiri iyo,
iwe naanyi na changuru che kobhatoori kimu kimu abhaato bhoose bhano bhaaghuye kwo Waryobha kohetera ghokooche,
gho kubha iwe muhöru emiishe ghyose,
nakobhasabhera kwo Waryobha eriibhagha ryose.
26 Omuchaama Omokoro anga uyo nakwëndëru chwee ghokwito gho kubha iwe m‑Mutööbhiyu,
na taanyi ni isörö,
wiiki taaköriri amasari ghoghoose ghaare.
Eryobha ndemwahwire koru mo‑bhaköri bha masari,
rekamotiiri ghuye Mwishaaro.
27 Abhachaama abhakoro mbaare bharëëndëru koruusi kira orosiko,
amaruusi gho ghiri e masari ghaabho.
Eriibhagha ꞉bhaaköriri hangʼu,
mbaare bhararuusi amaruusi aghande gho ghiri e masari gha bhaato abhande.
Wiiki mbaare bharaköra hangʼu mara kaaru.
Amare Yesu ꞉niiruusiri mo‑musarabha mara rimu hangʼu gho ghiri e masari gha bhaato bhoose.
28 Kurëngʼaana ne emeghiro ghe Musa,
abhaato mbaare bharatooru kubha abhachaama abhakoro,
nangabha ꞉bhaare bharataasi mo‑mangʼana maaru.
Amare hano eriibhagha irë rehetiri,
Eryobha ꞉ndiirahiiri hano remotooriri Omoona waache kubha Omuchaama uno ahikeriine emiishe ghyose.