6
Gho ghiri iyo,
totabha törëëndërëra ghusaagha mo‑ghaare tweghiri ighoro Kirisito hayo ekimbërë,
amare twiköngʼi kwegha mbagha tuköngʼëri mo‑bhokumi.
Totaabhëka wiiki obhoroso bho meeghi gha ghotuukuuna ighoro e maköri ghano ghaghughëri oroko na ghaare gha korekumi Eryobha.
2 Totabha toragharukera kwegha ameeghi gha bhubhatiiso,
na gha kobhatoorera amabhökö abhaato,
na gha koryoka kwo bhaku na gha ghoteneru ekiina ke miishe ghyose.
3 Aribha Eryobha rerasiigha,
ntokwëndërëra ghokora na ghuköngʼëri mo‑bhokumi.
4 Mbe,
mbaanyi‑ho abhaato bhano ꞉bhaatoriri kumënya obhuhëënë koru kwo Waryobha,
bhakabhöna atuho e Mwishaaro,
na kubha haghirohamu na bhaato bhano bhasongʼaaniri Akörö Ahörëëru.
5 Wiiki abhaato bhano mbeeche kubha ghaare Eryobha rebhughiri m‑machömu na kumënya changuru che bhotoro bho Ryobha mo‑se ino ekuucha.
6 Abhaato bhayo eriibhagha bhaghotigha korekumi Eryobha,
kana,
nibhu toghotora kobhagharoki kubha bhatuukuunere amasari ghaabho wiiki?
Abhaato bhayo mbakomumamba mo‑musarabha Omoona o Ryobha mara e kabhere na komukörëra chaasoni haheero.
7 Eriiröbhë rino rehaabhöna ambura mara kaaru na ghuchaami chambusuro chino cheenyi no obhwëra mo‑moremi,
eriiröbhë riyo ndeghwitabheru ne Eryobha.
8 Amare eriiröbhë rino rehaachaami amaho ne eghetoki,
retaakomusakeri ghyokyose omoremi,
Eryobha ndirariire koriihiima.
Antenero yaache n‑ghweku mo‑mororo.
9 Inyu abhasiighani bhaane,
nangabha nebhaandëkiire kwo mangʼana mahaari,
koru hangʼu eni neenyi no obhuhëënë kubha moghuköra amachömu ghano ghakwërëki kubha motooriibhu.
10 Mbe,
gho kubha Eryobha n‑ihëënë,
retaaghotora ghogheebhu amaköri amachömu ghano muköriri.
Wiiki retaaghotora kwebhu obhosiighi bhuure mwërëkiri ghokooche gho nchëra e kobhatoori abhakumi abhaghëndi bhaanyu korwera hano musëëmiri mbagha ibheere.
11 Neghwighomba chwee kubha,
omooto woose iköngʼi ghuköra amangʼana ghayo mbagha mo‑ntenero kubha moghasongʼaane ghaare ghoose moghwitëngʼëra.
12 Motabha abhatöbhu,
amare mweghe gho nchëra e ghokumi na ghoghumereri,
koru kwo bhano bhasongʼaaniri ghano Eryobha ꞉riiraghiri kobhaha.
Eriiraghano re Ryobha n‑de hëënë
13 Mbe,
hano Eryobha riraghiri Abhurahamu,
꞉ndiirahiiri kwo riina reeche eryene gho kubha taare‑ho wowoose uno are omokoro korekera.
14 Eryobha ꞉ndiirahiiri kwo Abhurahamu rerabhugha,
“Hëënë neghoghwitabheri na koruköra orwibhoro roocho kubha rwaru.”a
15 Mbe,
Abhurahamu ꞉naaghanyiri na ghoghumereri mbagha akabhöna kino Eryobha reere remuraghiire.
16 Aribha abhaato bhakuraheri,
mbakuraheri kwo riina rino reenyi ikoro ghokera ibho.
Wiiki okuraheri kuyo ngokwërëki kubha,
ghoose ghano bhaghughamba n‑gha mahëënë.
Ghuköra hangʼu ngokumara ashangʼaano.
17 Hangʼu hangʼu,
Eryobha ryose ꞉ndiihëënëhiri eriiraghano reeche gho nchëra e kuraheri,
gho kubha ndeere rërëënda kwërëki haheero kwo bhaato bhano bhaghosongʼaana ghaare ꞉riiraghiri kubha,
retaaghoghagharura.
18 Erabha Eryobha ndirahiiri na komuraghera,
retaaghugharura naabha gho kubha iryo retaanyi ibhiihi.
Iryo ꞉ndiiköriri ebheghiro bhibhere hangʼu,
kuraheri na kuragha,
kubha retuhë omukörö itu bhano tungʼösiire ghokooche,
tubhe na amiitëngʼërö gho ghaare ghakuucha ambërë yiito.
19 Ntoonyi ne eriitëngʼërö mo‑metema ghiito,
rino reenyi kinya ananga,
ino ehaaghöötërëra ameeri etahiru no obhukama.
b Amiitëngʼërö ghayo ꞉ngaasöhiri Ahatööbhiyu ha Hatööbhiyu iyo Mwishaaro gho kohetera hano omwando ore oteniini.
20 Yesu nakangatiri na ghusöha ahaghiro hayo gho ghiri yiito.
Nawe akabha Omuchaama Omokoro o miishe ghyose,
kinya bhuno Merikiseteeki are.