Koweera kwo bhaato bha Ryobha
4
Mbe,
eriiraghano re Ryobha re bhaato ghusöha ahaghiro ha koweera rekeere reenyi‑ho.
Gho ghayo twichonge,
kubha umu ghate yaanyu ataacha ghokindu ghusöha ahaghiro hayo.
2 Na niitu nturaghaniiru Angʼana Anchömu kinya bhuno bhasookoro bhiito bhoose ꞉bhooghwire.
Amare ibho eriibhagha ꞉bhooghwire amangʼana ghayo,
ghatabhatooriri ghyokyose gho kubha bhataaghakumiri.a
3 Kurëngʼaana na ghayo,
Eryobha ꞉ndeebhughiri kubha,
“꞉Niikariire na kuraheri,
nekabhugha kubha,
‘Nteekobhiisherereri naabha abhaato bhayo
ghusöha ahaghiro haane ha koweera.’ ”
b
Amare itu bhano tokomokumi Waryobha,
nibho toghusöha ahaghiro hayo ha koweera. Eryobha ꞉ndeesiikiire hangʼu nangabha reere rehikeriini emeremo gheeche ghyose korwera ghutëëmu gho se.
4 Nekobhugha hangʼu gho kubha,
ahaghiro nyarebhe mo‑Mandëkö Amatööbhiyu haandëkuru ighoro e rosiko ro mohungate kubha,
“Mo‑rosiko ro mohungate,
Eryobha ꞉ndeeweeriri reghatigha emeremo gheeche ghyose.”c
5 Amangʼana gha koweera ngaandëkuru wiiki hano kinya bhuno ꞉ghaasiikiiru anyuma hayo kubha,
“Nteekobhiisherereri naabha abhaato bhayo
ghusöha ahaghiro haane ha koweera.”d
6 Nangabha bhasookoro bhiito ꞉bhaare a bhambërë kooghu angʼana anchömu e koweera,
koru hangʼu bhataatoriri ghusöha ahaghiro hayo gho kubha bhataare bharaghakumi ghano Eryobha reere rerabhugha.
Kurëngʼaana na amangʼana ghayo,
noonyi‑ho omweya o bhaato abhande ghusöha ahaghiro hayo ha koweera.
7 Eryobha ꞉ndeetooriri orosiko oronde runo rokobherekeru,
“Reero.”
Mbe,
chaasiko chaaru chino chehetiri,
Eryobha ꞉ndeesiikiire wiiki ighoro ahaghiro hayo gho kohetera o‑Tawuti kinya bhuno yandëkuru mo‑Mandëkö Amatööbhiyu kubha,
“Reero,
aribha morooghu eriiraka re Ryobha,
motaghiköra emetema gheenyu kubha miköngʼu.”e
8 Aribha Yoshuwa nangatoriri kobhaha abhaato orosiko ro koweera,
Eryobha retangabhughiri wiiki ighoro e rosiko oronde ro koweera.f
9 Gho ghayo,
rokeere roonyi‑ho orosiko ro koweera kwo bhaato bha Ryobha.
10 Omooto wowoose uno aghusöha ahaghiro hayo ha koweera,
nakoweera ghuköra emeremo gheeche ghyose kinya bhuno Eryobha ꞉riiweeriri eriibhagha rimariri ghutëëma ase.
11 Gho ghayo,
ntwiköngʼi ghusöha ahaghiro hayo ha koweera.
Tubhe toraköra hangʼu kubha ataacha kubha‑ho omooto wowoose uno aghokindu ghusöha gho ghiri e kwanga ghokumi kinya bhuno bhasookoro bhiito ꞉bhaaköriri.
12 Angʼana e Ryobha n‑ihöru wiiki neenyi na changuru ghokera ekinyamiino ekyeghi.
Angʼana iyo,
nehaangʼuuta omooto ehikera mo‑maghuha,
nehaataani ebhyemo na amaghuta ghano ghaanyi‑mu.
Wiiki nehaangohi kumënya amiihëëbhö gha mo‑motema o mooto,
na kino akwënda.
13 Wiiki ghetaanyi‑ho eghetyenyi ghyokyose kino kiibhisiri ambërë e Ryobha.
Ebheghiro bhyose mbeenyi haheero ambërë yaache,
iwe niwe tokomobhoorera emeremo ghiito ghyose ghino toore toraköra.
Yesu niwe Omuchaama Omokoro
14 Mbe,
ntoonyi nawe Omuchaama Omokoro,
Yesu,
Omoona o Ryobha uno aghiire na ghusöha Mwishaaro.
Gho ghiri iyo,
ntughöötërërë ghano toghokumi.
15 Omuchaama Omokoro uyo niwe abhweche obhutöbhu bhwito,
gho kubha woose Erishambu ꞉ndeemusakiri gho chanchëra haghare haghare kinya itu,
amare iwe taaköriri amasari.
16 Gho ghayo,
tubhe abhasubhesubhe ghwishuka ambërë e Ryobha re ghareeya kubha retorigheri changori na ghototoori gho ghareeya yaache hano tookubha mo‑nyaako.