Yesu n‑omokoro ghokera Musa
3
Gho ghayo,
inyu abhakumi abhaghëndi bhaane,
bhano Eryobha rebherekiire kubha abhaato bhaache,
mwituuri ighoro e Yesu,
uno anyi Omotomu o Ryobha wiiki n‑Omuchaama Omokoro uno tokomokumi.
2 Yesu uyo naare omuhëënë kwo Waryobha uno amwahwire kinya bhuno Musa woose are omukangati omuhëënë mo‑bhaato bhoose bha nyumba e Ryobha,
Abhiisiraeri.a
3 Omwabhëki nahaasooku ghokera anyumba ino abhëkiri,
hangʼu hangʼu Yesu woose nakwëndëru ghosooku chwee ghokera Musa.
4 Kira anyumba nehaabhëku no omwabhëki nyarebhe,
amare Eryobha niryo Eryabhëki Eriikoro re bheghiro bhyose.
5 Musa naare omutamishi omuhëënë ghateghate e bhaato bha nyumba e Ryobha.
Emeremo gheeche ngeere kwërëki ghano Eryobha rekuucha ghosiikëra.
6 Amare Kirisito m‑muhëënë kinya Omoona uno akwimeererera abhaato bha mo‑nyumba e Ryobha.
Na niitu n‑anyumba iyo,
aribha tokwëndërëra ghwiköngʼi na kubha bhasubhesubhe na kwihachera mo‑ghaare toghwitëngʼëra.
Atöngërö ighoro e kwanga ghokumi
7 Gho ghayo mbe,
kinya Akörö Ahörëëru ekobhugha kubha,
“Reero,
aribha morooghu eriiraka re Ryobha,
8 motaghiköra emetema gheenyu kubha miköngʼu,
kinya bhuno bhasookoro bhaanyu
꞉bhaare bharaanga ghukangatu na neeni,
kwo riibhagha riire ꞉bhaare bharansaki iyo mwibhara.
9 Iyo mwibhara niho
bhasookoro bhaanyu ꞉bhaare bharansaki,
nangabha ꞉neebhaköriire ebhiraghe bhyaru,
kwo meeka miröngö ene.
10 Gho ghayo nebhakarariire abhaato bhayo,
nekabhugha kubha,
‘Abhaato bhano m‑bhabhe chaasiko choose,
n‑abhaato bhano bhataakwënda
ghutambana chanchëra cheene.’
11 Gho ghayo ꞉niikariire na kuraheri,
nekabhugha kubha,
‘Nteekobhiisherereri naabha abhaato bhayo
ghusöha ahaghiro haane ha koweera.’ ”b
12 Inyu abhahiiri bhaane,
mubhe miisho kubha ataacha kubhönëka omooto wowoose ghateghate yaanyu uno anyi no omukörö omobhe,
uno ataaghokumi,
uno akwiyaahura koru kwo Ryobha rino reenyi ihöru.
13 Amare mtöngërane inyu bheene kwo bheene kira rosiko runo rokobherekeru kubha “Reero,”
kubha ataacha kubhönëka omooto wowoose ghateghate yaanyu uno akongʼiinu na amasari na kwanga komokumi Waryobha.
14 Gho ghayo ntoghughöötana na Kirisito,
erabha tokwëndërëra komwitëngʼëra mbagha antenero e bhuhöru bhwito,
kinya bhuno ꞉tuusëëmiri ghokumi.
15 Mohiite ghano ghaandëkuru mo‑Mandëkö Amatööbhiyu kubha,
“Reero,
aribha morooghu eriiraka re Ryobha,
motaghiköra emetema gheenyu kubha miköngʼu,
kinya bhuno bhasookoro bhaanyu
꞉bhaare bharaanga ghukangatu na neeni.”c
16 Kana,
m‑bhaato ke bhano ꞉bhooghwire eriiraka re Ryobha bhakaanga ghukangatu naryo?
Kana,
taanyi Abhiisiraeri bhaare bhakangaturu na Musa koru mo‑se e Miisiri?
17 Wiiki,
kana n‑abhaato ke bhano Eryobha ꞉reebhakarariire kwo meeka miröngö ene?
Kana,
taanyi bhaare bhoose bhano ꞉bhaaköriri amasari na ghoku mwibhara?
18 Kana n‑abhaato ke bhano Eryobha ꞉riirahiiri kubha bhataaghwisherereru naabha ghusöha ahaghiro ha koweera hano riisëëmiri gho ghiri yaabho?
Kana,
taanyi bhoose bhano ꞉bhaangiri komosooka?
19 Mbe,
ntokorighi kubha abhaato bhayo bhataasöhiri ahaghiro hayo,
gho kubha ꞉mbaangiri korekumi Eryobha.