Obhotoori obhokoro bho Ryobha
2
Gho ghayo,
tubhe miisho chwee gho ghano tooghwire,
kubha totaacha ghoghatigha na ghughöötana na amangʼana aghande.
2 Ibheere,
ntweche kubha amangʼana gha meghiro ghe Ryobha ghino bhasookoro bhiito ꞉bhaasongʼaaniri gho nchëra e bhamarayika bha Ryobha ngaare no obhotoro.
Mbe,
abhaato bhoose bhano bhataare bharaghatambana koru ghoghasooka,
Eryobha ꞉ndeebhateniire ekiina kurëngʼaana na amasari ghaabho.
3 Aribha ꞉ghaaköruru hangʼu ghokoobho,
kana,
itu ntoghotora bhu kuhöna ghoteneru ekiina aribha totaaghotereera obhotoori obhokoro kinya bhuno?
Omutëmi Yesu niwe uno asëëmiri kuraghani obhotoori bhuyo na abhaato bhano ꞉bhooghwire,
꞉mbaahëënëhiri ghokwito kubha m‑mahëënë.
4 Eryobha ryose ndeere rerahëënëhi obhotoori bhuyo gho kobhaha abhaato bhayo obhotoro bho ghuköra ebhyërëkërëri ne ebhiraghe ne ebheroghooro bhe manga maaru.
Wiiki ꞉ndeebhahööhiri abhakumi ebhihaano bhe Körö Ahörëëru kurëngʼaana na amënda ghaache.
Kwinyööhi kwo Yesu
5 Ntweche kubha Eryobha retabhaheere bhamarayika bhaache obhotoro bho ghukangata ase ahë ino ekuucha,
ino toghosiikërëra amangʼana ghaache.
Amare omooto umu ꞉naasiikiire amangʼana ghano mo‑Mandëkö Amatööbhiyu kubha,
6 “Omooto n‑ghento ke koru omwihëëbhërë?
Kana,
omoona o mooto n‑niwe,
koru omotereere?
7 ꞉Noomoheere omooto changuru insuuhu
ghokera bhamarayika kwo riibhagha ighuhe.
Amare ibheere nomoheere uyo
obhokumi obhokoro na asooko,
8 na kobhetoora ebheghiro bhyose
haase e bhukangati bhooche.”
a
Mbe,
Eryobha ꞉ndeemotooriri omooto kubha abhe arakangata ebheghiro bhyose.
Ghetaare‑ho egheghiro ghyokyose kino ghetakangaturu no omooto. Amare kwi ibheere totaakomorighi arakangata ebheghiro bhiyo bhyose.
9 Amare ntokomorighi Yesu uno kwo riibhagha ighuhe hangʼu,
Eryobha ꞉ndeemuköriri abhe mosuuhu ghokera bhamarayika.
Uyo niwe uno Eryobha remoheere obhokumi obhokoro na asooko inkoro gho ghiri e kunyaakibhu na ghoku kooche.
Eryobha ꞉ndeemuköriri hangʼu,
kubha gho nchëra e ghareeya yaache,
Yesu aku gho ghiri e bhaato bhoose.
10 Eryobha niryo ꞉riitëëmiri ebheghiro bhyose na kobhetoora kinya bhuno bheenyi.
꞉Ndeesiighiri remohikeerani Yesu uno anyi simoka e bhotoori gho nchëra e kunyaakibhu,
kubha rebhasöhi abhakumi bhaaru mo‑bhokumi bhooche obhokoro.
11 Yesu haghirohamu na abhaato bhano akomusa amasari ghaabho,
Ishe waabho n‑umu.
Nikyo ghighëriri Yesu taanyi na chaasoni kobhabherekera kubha abhahiiri bhaache.
12 Yesu ꞉naabhughiri kubha,
“Oo Waryobha,
neghoghasiikëra
amaköri ghaacho amakoro kwo bhahiiri bhaane,
nekwemba emyembo ghe ghoghoghongi iye
ghateghate e rikinda reebho re bhakumi.”b
13 Wiiki nakobhugha kubha,
“Neekubha neramwitëngʼëra Waryobha.”
c
Wiiki ꞉naabhughiri kubha,
“Eni neenyi hano haghirohamu,
na abhaana bhano Eryobha reheere.”d
14 Mbe,
gho kubha abhaana bhano mbaanyi ne emebhere na amasaahë,
Yesu woose ꞉niichiri anyi no omobhere kinya emebhere gheebho.
꞉Naaköriri hangʼu kubha gho nchëra e roko rooche,
achekinde changuru che Rishambu rino reenyi no obhotoro bho ghughëri abhaato bhabhe bharaku.
15 Gho nchëra iyo,
Yesu ꞉naabhatooriri huuru abhaato bhano ꞉bhaare abhasësë gho ghiri e ghotiina oroko mo‑riimanya reebho.
16 Mbe,
m‑mahëënë kubha,
Yesu tiichiri kobhatoori bhamarayika,
amare ꞉niichiri kobhatoori abhaato bha rwibhoro ro Abhurahamu.
17 Gho ghiri iyo,
꞉niichiri anyi kinya bhuno abhahiiri bhaache toonyi mo‑ghoose,
kubha abhe Omuchaama Omokoro uno anyi o bheghongi no omuhëënë mo‑meremo gheeche ambërë e Ryobha.
Gho nchëra iyo ꞉niiruusiri amaruusi gha ghutëmëërani abhaato ne Eryobha,
kubha Eryobha rebhaabhërë abhaato amasari ghaabho.
18 Mbe,
gho kubha Yesu ꞉naanyaakiri na ghusakibhu,
naghotora ghototoori koru itu bhano toghusakibhu.