Eriimanya rino reghuchömëri Eryobha
4
Ibheere bhahiiri bhiito,
mweghiri koru ghokwito bhuno mokwëndëru kumanya,
gho ghiri e korichömëri Eryobha.
Na mahëënë eriimanya reenyu hangʼu reenyi.
Ibheere,
ntokobhasabha na ntokobhasasaama kwo bhukangati bho Mutëmi Yesu kubha,
mubhe moraköra hangʼu na ghokera hayo.
2 Mweche bhoheene amaraghereri ghano ꞉toobharagheriiri kwo bhukangati bho Mutëmi Yesu.
3 Eryobha ndekwënda mubhe abhatööbhiyu,
motighe ghuköra obhutaari.
4 Inyu bhoose moghehiche emebhere gheenyu,
mo‑bhutööbhiyu na mwisooke.
5 Motabha na ghwighomba kobhe kinya abhaato bhano bhataryeche Eryobha.
6 Gho ghayo,
omooto wowoose atamutaaseri mughëndi waache,
koru komongʼiina.
Kinya bhuure ꞉toobhashaangʼiri na kobhabhoorera kubha,
bhano bhoose bhaghuköra ghayo,
Omutëmi nakobharööna.
7 Eryobha retatobherekiire ghuköra obhutaari,
amare ndetobherekiire kubha twikare mo‑bhutööbhiyu.
8 Gho ghayo,
omooto wowoose uno akwanga ameeghi ghano,
taakomwanga omooto,
amare nakoryanga Eryobha,
rino rekobhaha inyu Akörö yaache Antööbhiyu.
9 Ibheere,
teekwëndëru ango tobhaandëkërë wiiki amangʼana ighoro e ghosiighana,
gho kubha inyu bheene mweghuru ne Eryobha kinya mokwëndëru ghosiighana.
10 Mahëënë mubheere morabhakörëra hangʼu bhaghëndi bhaanyu bhoose bha mo‑mukööwa o Maketoniya.
Ibheere bhahiiri bhiito ntokobhasabha mosiighane hangʼu hangʼu na ghokera hayo.
11 Mwiköngʼi chwee kumanya eriimanya re murëmbë.
Omooto wowoose atiisöhi mo‑mangʼana gha bhande,
amare akörë omoremo waache omwene,
kinya bhuno tobharagheriiri.
12 Niho mookubha mwërëkiri orughëndö ruchömu ighoro e bhano bhataanyi Abhakirisito.
Wiiki motabha abhaato bhano bhaghwitëngʼëra bhe bhande kwo mënda ghaanyu.
Amiitëngʼërö kwo bhano bhakuure
13 Inyu bhahiiri bhiito,
ntokwënda mumënyë ghano ghakorwera mo‑Bhakirisito bhano bhakuure,
kubha motabha na amacheeche ke bhaato abhande bhano bhataanyi na amiitëngʼërö gha koryoka.
14 Itu,
ntweche kubha Yesu ꞉naakuure,
akaryoka.
Hangʼu hangʼu ntoghwitëngʼëra kubha Eryobha ndekobharyoki abhaato bhoose bhano bhakuure mo‑bhokumi,
mbakuucha haghirohamu nawe.
15 Mbe,
ghano tokobhabhoorera n‑ameeghi gha Mutëmi Yesu,
kubha itu bhano tookubha abhahöru hano akuucha ghugharuka,
totaakobhakangata bhano bhamariri ghoku.
16 Omutëmi omwene naghwika koru Mwishaaro.
Naghosiikëra kwo riiraka ikoro,
haghirohamu ne eriiraka re marayika omokoro ne eriiraka re ntaara e Ryobha.
Niho bhano bhakuure bharamokumi Kirisito,
mbakoryokibhu singa.
17 Niho itu bhano tookubha tusaaghiri toonyi abhahöru,
ntoghusaru haghirohamu nabho mo‑mashaaro,
kubha tomoturungʼanere Omutëmi mwighoro.
Niho tookubha nawe haghirohamu emiishe ghyose.
18 Ibheere mubhe morighambisani kwo mangʼana ghayo.