Bhawuro ˆakamotoma Timotewo Tesaronike
3
Tokamara toghakeyu ghoghumereri,
gho kubha totaamanyiri ghano ghaghuköru iyo.
Niho tokarighi kubha,
itu tusaaghe mo‑moghya o Atene,
2 tomotome Timotewo mohiiri wiito,
kubha ache abhaköngʼi na kobhatoora omukörö mo‑bhokumi bhoonyu.
Iwe n‑omutamishi mughëndi wiito o Ryobha gho kuraghani Angʼana Anchömu ighoro e Kirisito.
3 ꞉Ntuuköriri hangʼu kubha omooto wowoose ataku omukörö gho ghiri e nyaako iyo.
Inyu mweche kubha,
ntokwëndëru kohetera nyaako iyo.
4 Mweche ghayo,
gho kubha hano toore haghirohamu na niinyu,
ntoore torabhabhoorera kubha ntokunyaakibhu,
na hangʼu ghabheere.
5 Hano nekeyuru ghoghumereri,
nekamotoma Timotewo bhowaanyu,
kubha nimënyë amangʼana gha bhokumi bhoonyu.
꞉Niiköriri hangʼu,
gho kubha ꞉niituuriri kubha hande abhe Omoseeghereri wuure nabhasakiri na kobharumeeri.
Ne emeremo ghiito ghyose ghino ꞉tuuköriri bhowaanyu,
ghibhe ghe bhoowa.
Amangʼana amachömu koru kwo Bhatesaronike
6 Ibheere Timotewo hano ichiri koru bhowaanyu,
aghatobhoorera amangʼana amachömu gha bhokumi no obhosiighi bhoonyu.
Aghatobhoorera kubha ˆmoghotohiita chwee gho chaasiko choose,
wiiki mubheere na amiigha gha ghotorighi,
kinya bhuure itu tubheere na amiigha gha kobharighi.
7 Bhahiiri bhiito,
amangʼana gha bhokumi bhoonyu,
ngatoheere omukörö mo‑nyaako yiito yoose.
8 Ibheere tokahëëchëra,
gho kubha inyu mwimeeriire muköngʼiiri mo‑Mutëmi Yesu.
9 Ibheere ntoghotora korereha Eryobha gheghiro ke kubha toriitabheri gho ghiri e bhokumi bhoonyu?
Koru gho ghuchömëru kwaru kuno toonyi nako ambërë e Ryobha gho ghiri yaanyu?
10 Obhotiko na omwishe ntokorisabha Eryobha gho ghwiköngʼi chwee,
kubha totore korighani na niinyu,
na ghuköra ghano mosuuhiiru ighoro e bhokumi bhoonyu.
11 Ntokomusabha Waryobha,
Taata wiito omwene,
na Yesu Omutëmi wiito,
atusëëmërë anchëra e kuucha bhowaanyu.
12 Omutëmi abhëëngërë obhosiighi na köbhëëngërëërëri ghosiighana inyu bheene na kobhasiigha abhande bhoose,
kinya itu tobhasiighiri inyu.
13 Wiiki aköngʼi emetema gheenyu,
kubha mubhe abhatööbhiyu,
motabha ni isörö ambërë e Waryobha Taata wiito,
eriibhagha akuucha Omutëmi wiito Yesu haghirohamu na abhatööbhiyua bhaache bhoose.