Mwisëëmi kwo rosiko ro kuucha Omutëmi Yesu
5
Inyu bhahiiri bhiito,
ntokorighi kubha teekwëndëru ango tobhaandëkërë ighoro e miishe ne eriibhagha re kuucha kwo Mutëmi,
2 gho kubha inyu bheene mweche kubha orosiko ro kuucha Omutëmi,
ndookubha ro ghutakani kinya omwibhi ahaacha obhotiko.
3 Hano abhaato bhakobhugha kubha,
“Ntoonyi no omurëmbë,
wiiki m-bhoheene toonyi,”
hayo niho obhobhe bhohaabhatakaneri.
Obhobhe bhuyo mbokobhataakani,
kinya obhosongo bhohaamure omukari uno anyi inda.
Koru hangʼu,
abhaato bhataaghotora ghoghiisacha ghayo.
4 Mbe,
inyu bhahiiri bhiito,
orosiko ruyo rotaakobhataakani kinya omwibhi,
gho kubha motaanyi mo‑kengʼuuri kinya abhande.
5 Inyu bhoose n‑abhaato bha bhwero moonyi,
wiiki abhaana bha mwishe.
Itu bhoose totaanyi bha bhotiko hamu bha mo‑kengʼuuri.
6 Ibheere totamisi chandöörö ke bhaato abhande,
amare tubhe miisho na kubha ne ekirëngërë.
7 Bhano bhakomisi chandöörö,
mbahaamisi obhotiko.
Wiiki bhano bhakurëëwu,
mbahaarëëwu obhotiko.
8 Amare itu,
gho kubha ntoonyi abhaato bha mwishe,
tubhe ne ekirëngërë.
Tubhe no obhokumi no obhosiighi,
bhiyo mbeekubha kinya angubha mo‑ghekubha.
Wiiki toriitëngʼërë Eryobha ghototoori,
niho tookubha kinya tobheekiri eriihima re kyoma a‑mutu.
9 Eryobha retatwahwire itu kubha retosireekereri kwo bhororo bhooche,
amare ndetwahwire kubha tubhönë obhotoori gho nchëra e Mutëmi wiito Yesu Kirisito.
10 Uyo niwe akuure gho ghiri yiito,
kubha tumanye haghirohamu nawe,
ibhe toonyi abhahöru hamu tokuure.
11 Ibheere mwighambisani na ghwitoora omukörö,
mwëndërërë ghwiköngʼi kinya moghuköra.
Asughara ino ekwëndëru mo‑bhakumi
12 Ibheere bhahiiri bhiito,
ntokobhasabha mobhasooke bhano bhakobhatoori inyu,
na kobhakangata kwo bhukangati bho Mutëmi Yesu na kobhatöngëra.
13 Mobhasooke chwee na kobhasiigha kurëngʼaana ne emeremo gheebho.
Wiiki mubhe no omurëmbë ghate yaanyu.
14 Mbe,
bhahiiri bhiito,
ntokobhasasaama,
mubhe morabhashaangʼi abhatöbhu na kobhaköngʼi bhano bhakuure omukörö.
Wiiki mubhe morabhaköngʼëërëri bhano bhataamara bhaköngʼëri mo‑bhakumi na kobhaghumereri abhaato bhoose.
15 Mumööhi,
omooto wowoose atamoreha omughëndi waache amabhe kwo mabhe.
Amare eriibhagha ryose mubhe morakörërana amachömu inyu bheene na kobhakörëra abhande bhoose.
16 Mubhe morachömëru eriibhagha ryose,
17 wiiki mubhe morasabha motatigha naabha.
18 Mwitabheri Eryobha mo‑ghoose,
gho kubha ghayo nigho iryo rekwënda mubhe moraköra kinya bhuure Kirisito Yesu ꞉aköriri.
19 Motahööchërëra Akörö Ahörëëru.
20 Wiiki motabhutaraaha obhurööti,
21 amare moghasaki amangʼana ghoose gha bhurööti na ghughööta ghano ghaanyi machömu,
22 na mwibhareke amabhe ghoose.
23 Eryobha eryene niryo reghotuha omurëmbë,
rebhamuse inyu mo‑ghoose.
Reghechonge emetema gheenyu no obhuhöru bhoonyu ne emebhere gheenyu,
kubha mubhe motaanyi ni isörö mbagha kohikera eriibhagha re kuucha Omutëmi wiito Yesu Kirisito.
24 Eryobha eryene rino rebhabherekiire,
ndekobhakörëra ghayo ghoose,
gho kubha n‑ihëënë.
Amangʼana gha kuragha
25 Bhahiiri bhiito,
itu bhoose motusabhere kwo Waryobha.
26 Mobhakëëri bhahiiri bhiito bhoose kwo bhosiighani bho Kirisito.
27 ˆNekabhariishi ariingʼa kwo bhukangati bho Mutëmi Yesu kubha,
anyaarubha ino mobhasömërë abhahiiri bhiito bhoose.
28 Aghareeya e Mutëmi wiito Yesu Kirisito,
ibhe haghirohamu na niinyu.