Kumanya kinya bhuno Eryobha rekwënda
5
Mbe,
gho kubha inyu n‑abhaana bha Ryobha moonyi bhano resiighiri,
mweghe asughara na amaköri ghaache.
2 Mumanye eriimanya re bhosiighi,
kinya bhuure Kirisito ꞉atosiighiri itu,
akiiruusi aghaku gho ghiri yiito,
akabha kinya eriruusi re keneeso ghichömu kino ghekoretegheri Eryobha.
3 Ibheere inyu motaköra obhutaari,
koru obhoghonchu bhobhoose bhuure hamu obhwighombi bho bheghiro,
gho kubha amangʼana ghanga ghayo ghataakwëndëru mo‑bhaato abhatööbhiyu.
4 Motasiikëra amangʼana gha chaasoni,
na amangʼana gha ghighëëghë hamu kuhakaana,
ghayo ghataakwëndëru ghokoonyu.
Amare amangʼana ghano ghakwëndëru,
n‑gha koriitabheri Eryobha.a
5 Mumënyë kubha obhwighombi bho bheghiro m‑bhonga ghusëngëra emisambu taanyi Eryobha.
b Mumanye kwo bhuhëënë kubha bhano bhaghwighomba ebheghiro,
na abhataari na abhaghonchu,
bhataaghusöha koru bhataaghughabha ghyokyose mo‑bhutëmi bho Kirisito na bho Ryobha.c
6 Amangʼana ghanga ghayo,
nigho ghaghughëri Eryobha rebharöönë abhaato bhano bhataakoresooka.
Motiishereri omooto wowoose abhangʼiine kwo mangʼana ghano ghataanyi gha mahëënë kubha momutambane.
7 Gho ghayo,
motaghöötana na abhaato kinya bhayo.
8 Ekeenyuma hayo,
inyu moore mo‑kengʼuuri,
amare ibheere,
gho ghughöötana koonyu no Omutëmi Yesu mumanyiri mo‑bhwero.
Mbe,
ibheere,
mumanye kinya abhaato bhano bhaanyi mo‑bhwero!
9 Ghano ghakwërëki kubha mumanyiri mo‑bhwero n‑ghuköra amangʼana amachömu,
na ghano Eryobha rekwënda,
na gha bhuhëënë.
10 Mwiköngʼi kumanya na ghuköra amangʼana ghano ghakomotegheri Omutëmi.
11 Motabha moraghöötana na abhaato bhano bhaghuköra amangʼana amabhe gha mo‑kengʼuuri.
Amare mubhe moraghatoora haheero.
12 Amangʼana ghano ghaghuköru na abhaato abhabhe gho kebhisere,
n‑gha chaasoni koru ghoghaghamba.
13 Amare aribha gharabha mo‑bhwero,
ngakorighibhu haheero,
gho kubha obhwero mboghogharëngaari.
Aribha obhwero bhorarëngaari,
kino keenyi mo‑kengʼuuri ghetaaghusaagha hangʼu hangʼu kyose ngeekubha no obhwero.
14 Nikyo eghughambu kubha,
“Bhooka iye uno osundaghiire!
Oryoke koru mo‑bhaku,
na Kirisito nakuucha ghokurëngaareri.”d
15 Gho ghayo,
mubhe bhangʼiini mo‑riimanya reenyu.
Motamanya kinya abhaghëëghë,
amare mumanye kinya abhaato abhangʼiini.
16 Muhökëri bhoheene eriibhagha rino,
gho kubha chaasiko chino n‑che mabhe.
17 Gho ghayo,
motabha bhaghëëghë,
amare mwiköngʼi ghoghamënya amiigha gha Mutëmi Yesu.
18 Wiiki motarëëwu,
e gho kubha okurëëwu ngoghughëri omooto akörë amangʼana gha chaasoni.
Amare inyu mwichoribhu na Akörö Ahörëëru.
19 Gho ghayo,
mubhe moreemberana gho Sabhuri,
na kwo myembo na gho chatensi che mo‑motema.
Mubhe moramwembera na komuchaghanera Omutëmi Yesu,
kwo metema gheenyu ghyose.
20 Wiiki,
eriibhagha ryose mubhe moramwitabheri Taata Waryobha,
gho ghiri e bhaato bhoose,
gho kohetera eriina re Mutëmi wiito Yesu Kirisito.
21 Mubhe morasookana inyu bheene kwo bheene,
gho kubha mokomosooka Kirisito.
Ameeghi ighoro e bhakari na abhasubhe
22 Inyu abhakari,
mubhe morabhasooka abhasubhe bhaanyu,
kinya bhuure mokomosooka Omutëmi Yesu.f
23 Mokwëndëru ghuköra hangʼu,
gho kubha omosubhe naanyi no obhotoro ighoro e mukari waache.
N‑kinya bhuno Kirisito anyi no obhotoro ighoro e riikanisa.
Iwe omwene niwe Omotoori o riikanisa,
rino reenyi omobhere waache.
24 Mbe,
kinya bhuure eriikanisa reghosooka Kirisito,
hangʼu hangʼu abhakari bhoose mbakwëndëru bhabhasooke abhasubhe bhaabho kwo mangʼana ghoose.
25 Na niinyu abhasubhe,
mubhe morabhasiigha abhakari bhaanyu,
g kinya Kirisito ꞉aresiighiri eriikanisa,
akiiruusi omwene gho ghiri e riikanisa.
26 ꞉Naaköriri hangʼu,
kubha amuse eriikanisa,
gho koryeghi kwo manche gha bhubhatiiso,
na kwo ngʼana e Ryobha.h
27 ꞉Nëëndiri ibhönërë eriikanisa eritööbhiyu,
rino retaanyi ne eriisari koru obhoghonchu bhobhoose.i
28 Hangʼu hangʼu,
abhasubhe mbakwëndëru bhabhasiighe abhakari bhaabho kinya emebhere gheebho abheene.
Omosubhe uno asiighiri omukari waache,
nisiighiri omwene.
29 Taanyi‑ho omooto uno arëghiri omobhere waache,
ange kowuraagheri na kowobheeki bhoheene.
Hangʼu nibhu,
Kirisito ahaatugha eriikanisa reeche,
30 gho kubha itu abhakumi ne ebhyemo bhe mobhere waache toonyi.
31 N‑kinya bhuno Amandëkö Amatööbhiyu ghakobhugha kubha,
“Gho ghayo,
omosubhe nakobhatigha ishe na nyina,
na ghughöötana no omukari waache,
bhayo bhabhere mbaakubha omobhere umu.”j
32 N‑ghuköngʼu chwee kumënya ekebhisere kino.
Amare eni neghosiikërëra ighoro e Kirisito ne eriikanisa reeche.
33 Amare na niinyu bhoose ˆnekabhabhoorera kubha,
omooto woose amosiighe omukari waache kinya bhuno isiighiri omwene.
No omokari woose,
atatigha komosooka omosubhe waache.