Ameeghi ighoro e bhaana na abhiibhori
6
Inyu abhaana,
gho kubha mughöötiine no Omutëmi Yesu,
mubhe morabhasooka abhiibhori bhaanyu.
Ghuköra hangʼu n‑ngʼana inchömu.
2 Hano Eryobha reruusiri emeghiro gheeche,
o mumbërë uno onyi ne eriiraghano nokobhugha kubha,
“Obhasooke iso na nyako.
3 Gho ghuköra hangʼu,
nokubhöna orubhango ne eriimanya re chaasiko chaaru mo‑se.”a
4 Na niinyu bhataata,
motabhanaaha abhaana bhaanyu.
Amare,
mobharere gho töngërö e Mutëmi Yesu na kobheeghi ameeghi ghaache.b
Ameeghi ighoro e bhasësë na abhatëmi bhaabho
5 Inyu abhasësë,
mubhe morabhasooka abhatëmi bhaanyu hano mo‑se,
gho körö imu na gho ghosingisa.
Mobhasooke kinya bhuno mokomosooka Kirisito.
6 Hano mookubha moraköra hangʼu,
etabha kwo riibhagha rino bhakobharighi,
kubha mwichömi ghokoobho.
Amare,
mobhasooke kinya abhasësë bha Kirisito,
mubhe moraköra amënda gha Ryobha gho körö imu.
7 Mukörë emeremo gheenyu kwo mukörö umu,
kinya bhano mokomukörëra Omutëmi Yesu,
etabha kinya moghukörëra abhaato hangʼu.
8 Mumënyë kubha,
omooto woose uno aghuköra amachömu,
abhe n‑omusësë hamu uno ataanyi omusësë,
Omutëmi Yesu nakomotuha kwo maköri ghaache amachömu.c
9 Na niinyu abhatëmi,
hangʼu hangʼu mubhe morabhakörëra abhasësë bhaanyu amachömu.
Motabhatiini,
gho kubha mweche kubha,
Omutëmi waabho no Omutëmi waanyu n‑umu,
Mwishaaro anyi,
na mweche kubha iwe taanyi no obhwingʼaheri.d
Muhökëri ebhiröönërö bhe Ryobha
10 Mbe,
nekwënda kobhugha kubha,
mughöötiine no Omutëmi Yesu,
gho ghayo,
mubhe morabhöna changuru koru mo‑bhotoro bhooche obhokoro.
11 Mwinate ebhiröönërö bhyose bhino Eryobha rebhaheere,
kubha motore kwanga obhuröngö bhoose bho Rishambu.
12 Nekobhugha hangʼu gho kubha,
eriihë riito retaanyi ghate yiito na abhaato.
Amare ntokurööna ne emisambu ghino gheenyi no obhotoro,
ghino gheghukangata ase ino e kengʼuuri,
ghyose ghino ngighöötëriire mo‑se ino etaakorighibhu.
13 Gho ghayo,
mwinate ebhiröönërö bhyose bhino Eryobha rebhaheere,
kubha orosiko ro bhobhe,
motore ghwitachura.
Moramara kurööna mbagha antenero,
mookubha mokeere muköngʼiiri.
14 Mbe,
mwisëëmi kwo riihë riyo.
Obhuhëënë bhubhe kinya oruköbha mo‑bheribhichi bheenyu,
amaköri ghaanyu ghano Eryobha rekwënda ghabhe kinya angubha e ghokengera mo‑ghekubha,
15 na ghwiköngʼi gho kuraghani Angʼana Anchömu e murëmbë,
ibhe kinya kobheeka ebhekwera mo‑maghoro ghaanyu.
16 Ghokera ghayo ghoose,
mughöötërërë obhokumi bhubhe kinya angubha mo‑mabhökö ghaanyu,
ebhatoori ghokengera emebhya ghyose ghe mororo ghe Mobhisa wuure,
na ghogherimi.
17 Obhotoori,
bhubhe kinya eriihima re kyoma mo‑mitu gheenyu,
na angʼana e Ryobha,
ibhe kinya ekinyamiino kino mokuhaabhu na Akörö Ahörëëru.
18 Mbe,
mubhe morasabha eriibhagha ryose kwo masabhi gha manga ghoose,
kurëngʼaana na kinya Akörö Ahörëëru ekobhakangata.
Mubhe miisho gho ghiri e ngʼana iyo,
na mwiköngʼi kobhasabhera abhatööbhiyu bhoose.
19 Mubhe moransabhera na neeni kubha,
Eryobha ribhe reraaha amangʼana gha ghosiikëra,
hano neekubha neraraghani ighoro e Yesu Kirisito,
kubha nibhe neraraghani kwo bhosubhesubhe obhuhëënë bhuno Eryobha rehunywire mo‑Ngʼana Anchömu.
20 Eni n‑omuraghani o Ngʼana Anchömu ighoro e Yesu Kirisito,
na iyo niyo ighëriri nibhe mo‑kibhöhö.
Mbe,
munsabhere kubha netore kuraghani kwo bhosubhesubhe kinya bhuno nekwëndëru.
Amakëërani gha kuragha
21 Tikiko,
omohiiri wiito omosiighani no omutamishi omuhëënë o Mutëmi Yesu,
nakobhabhoorera amangʼana ghoose,
kubha mumënyë kinya nekwëndërëra na kino neghuköra.e
22 ˆNekamotoma bhowaanyu,
kubha abhahë amangʼana ghiito na ghuköngʼi emetema gheenyu.