Kumanya kwo bhumu
4
Mbe,
eni uno nibhöhuru gho ghiri e komuhökëri Omutëmi,
nekobhasasaama mubhe na asughara ino ekurëngʼaana na amberekerera yaanyu ino Eryobha ꞉reebhabherekeriire.
2 Eriibhagha ryose mubhe bhanyööhu,
na abhahörëëru,
na abhaghumereri.
Moghumererani inyu bheene kwo bheene kwo bhosiighi.
3 Mwiköngʼi ghochonga obhumu bhuno bhokurëëtu na Akörö Ahörëëru gho kumanya haghirohamu kwo murëmbë.
4 Itu bhoose ntoonyi kinya omobhere umu na ꞉ntoobhwine Akörö Ahörëëru imu,
kinya bhuno eriitëngʼërö rino mobherekiiru ne Eryobha reenyi rimu.
5 Omutëmi wiito n‑umu,
no obhokumi m‑bhumu no obhubhatiiso bhwito m‑bhumu.
6 Ntoonyi ne Eryobha rimu hangʼu,
na n‑Taata o bhoose,
niryo reenyi ighoro e bhoose,
na ndeghuköra emeremo mo‑bhoose na ndeghwikara mo‑bhoose.
7 Amare ghate yiito Kirisito natwitabhiiri ekihaano kwo mooto woose,
kurëngʼaana na kinya iwe ꞉ëndiri koruusi.
8 Kinya bhuure Amandëkö Amatööbhiyu ghakobhugha,
“Hano atiiriri ighoro chwee,
꞉niimokiri bhano ꞉bhaare bhaghööturu mwihë,
akabhaha abhaato atuho.”a
9 Mbe,
Amandëkö hano ghakobhugha kubha,
“Hano atiiriri ighoro,”
egheteemoro keeche n‑neke?
Egheteemoro keeche n‑kubha,
꞉naashamiri singa aghiika mbagha hano mo‑se.
10 Gho ghayo,
uno ꞉ikiri hano haase e se niwe ꞉atiiriri ighoro chwee ghokera amashaaro ghoose atore kubha ahaghiro hoose.
11 Niwe ꞉aheere abhaato atuho,
abhande akabhaköra bhabhe abhatomu,
na abhande abharööti,
na abhande abharaghani bha Ngʼana Anchömu,
na abhande abhakangati bha riikanisa na abheeghi.
12 ꞉Naaköriri hangʼu atore ghusëëmi abhaato bha Ryobha mo‑meremo ghe bhutamishi,
na hayo mbakwabhëka eriikanisa,
rino reenyi omobhere o Kirisito.
13 Emeremo ghiyo ngekwëndërëra mbagha itu bhoose tohikere kubha bhamu mo‑bhokumi na komumënya bhoheene Omoona o Ryobha,
tubhe abhaato bhano tuköngʼiri gho kohikera ekirëngërë ke bhohikeerani bho Kirisito.
14 Mbe,
totaakubha wiiki ke bhaana,
torarëkëru na kohiru ino na ino no obhukama bho meeghi ghano ghakurëëtu na abhaato abhabhiihi,
kubha bhatongʼiine tutambane chanchëra cheebho.
15 Amare torabhoorerana obhuhëënë kwo bhosiighi,
ntoghuköngʼa mo‑mangʼana ghoose na kohikera kubha kinya Kirisito,
uno anyi omutu o riikanisa.b
16 Kirisito naghughöötani abhaato bhaache bhoose kubha bhamu,
kinya bhuno ebhyemo bhe mobhere bhehaghöötana haghirohamu,
na kubha omobhere umu.
Mbe,
kira kyemo keraköra omoremo waache kinya ghekwëndëru,
omobhere woose nokwiyëngëra na ghuköngʼëri mo‑bhosiighi.
Eriimanya re kare ne eriimanya eriihë
17 Mbe,
kwo riina re Mutëmi ˆnekabhatöngëra kubha,
motamanya wiiki kinya abhaato bhano bhataryeche Eryobha.
Ibho amiihëëbhö ghaabho ghataanyi no obhwëra,
18 ngakundekiiru ne ekengʼuuri.
Abhaato bhayo mbatooruru kurë no obhuhöru bho Ryobha gho ghiri e bhuraghaanu bhoobho no obhuköngʼu bho metema gheebho.
19 Mbataasiri na bhataanyi na chaasoni,
mbiisöhiri mo‑mangʼana amabhe gha chaasoni.
Wiiki mbaghwighomba kwëndërëra ghuköra amangʼana ghayo ghoose.
20 Amare inyu taanyi hangʼu mweghiri ighoro e Kirisito.
21 Aribha hangʼu keenyi,
inyu mooghwire amangʼana ghaache na kweghibhu,
kinya obhuhëënë bhoonyi ighoro e Yesu.
22 Mbe,
motighe ghano moore moraköra ekimbërë,
asughara e kare ino eghusarëka,
gho ghutambana amiigha ghano ghakobhangʼiina,
23 na muköru bhuhë mo‑metema na mo‑miihëëbhö ghaanyu.
24 Mwitoorere asughara ahë,
ino ꞉itëëmuru gho tëëmö e Ryobha.
Atëëmö iyo nekorighibhu gho ghuköra ghano iryo rekwënda na kubha no obhutööbhiyu.
25 Gho ghayo,
motighe obhuröngö.
Omooto woose nakwëndëru kobhoorera mughëndi waache obhuhëënë,
gho kubha itu bhoose n‑ebhyemo bhe mobhere o Kirisito toonyi.
26 Aribha morakarara,
motiishereri oghukarara koonyu ghughëri mukörë amasari,
na koru hangʼu eryobha retasikera mokeere mukariire,
27 na motariha Erishambu omweya.
28 Uno are ariibha atagharokeri kwibha wiiki,
amare akörë emeremo ghino ghiishereriiru kwo mabhökö ghaache omwene,
abhönë egheghiro ghe komuhööhi uno ataghöötë.
29 Emenu gheenyu ghetasiikëra amangʼana amabhe,
amare ghesiikërë amangʼana amachömu ghano ghaghusakeri abhaato abhande,
kubha ghabhahë aghareeya bhano bhaghoghooghu.
30 Motiitumati Akörö Ahörëëru e Ryobha,
gho kubha Akörö iyo n‑ekingʼöchö ke Ryobha ghokoonyu kubha inyu n‑abhaato bhaache moonyi,
mbagha orosiko runo Eryobha rekuucha kobhatingori.c
31 Mbe,
mutaane no obhororo,
na ghukarara,
ne eriireghe,
na amatoki na kobhiiherana.
Mutaane kurë no obhobhe bhoose!
32 Amare morigherani changori mubhe ne emetema myero kwo bhande.
Mubhe moraabhërana kinya bhuno Eryobha rebhaabhiire gho kohetera gho Kirisito.