Emeremo ghe Bhawuro mo‑bhaato bha matöngö
3
Kurëngʼaana na amangʼana ghayo,
eni Bhawuro nekobhasabhera.
Eni nibhöhuru gho ghiri emeremo ghino Kirisito Yesu aheere nebharaghaneri inyu abhaato bha matöngö.
2 Neenyi no obhuhëënë mumariri kooghu kubha,
Eryobha ndeheere emeremo ghe kuraghani aghareeya yaache ghokoonyu.
3 ꞉Ndeembooriire gho nchëra e kohunyurera amangʼana ghaache ghano reere rebhisiri,
na nimariri kobhaandëkëra hasuuhu ighoro e mangʼana ghayo.a
4 Gho ghayo,
moraghasöma amangʼana ghayo,
moghotora kumënya bhuno nimënyiri amangʼana ghano ꞉ghaare ghabhisuru ighoro e Kirisito.
5 Ekebhisere kiyo retaabhamënyiri abhaato bha kare,
amare ibheere ndebhahunyuriire abhatööbhiyu bhaache abhatomu na abharööti gho nchëra e Körö yaache.
6 Ekebhisere ekyene nikyo kino,
gho nchëra e ghokumi Angʼana Anchömu abhaato bha matöngö mbakubhöna aghabho haghirohamu na Abhayahuuti.
Wiiki abhaato bhayo n‑kinya omobhere umu na Abhayahuuti,
na mbaghusanga haghirohamu eriiraghano riire riire rino Eryobha ꞉riiköriri gho nchëra e Kirisito Yesu.
7 Mbe,
eni ꞉niiköruru kubha omutamishi o kuraghani Angʼana Anchömu,
gho kihaano ghe ghareeya e Ryobha kino ꞉reeheere gho kurëngʼaana no obhotoro bhooche.
8 Eni m‑mosuuhu neenyib ghokera abhatööbhiyu bhoose bha Ryobha,
amare Eryobha ndinsakiiri aghareeya kubha nebharaghaneri abhaato bha matöngö obhwame bho rubhango ro Kirisito runo rotaanyi ne ekirëngërë.
9 Wiiki nebhatoorere haheero abhaato bhoose bharighi amangʼana gha Ryobha ghano ꞉ghaare ghabhisuru kinya ghakohikeeranibhu.
Eryobha rino ritëëmiri ebheghiro bhyose ꞉ndeebhisiri amangʼana ghayo korwera simoka.
10 Nebhatoorere haheero kubha,
gho nchëra e riikanisa,
abhakangati na bhano bhaanyi no obhotoro mo‑se ino etaakorighibhu,
bhamënyë amangʼiini gha Ryobha ghano ghaanyi gha manga maaru.
11 Eryobha ꞉ndiiköriri hangʼu kurëngʼaana na kinya reere kwënda emiishe ghyose.
Ndeghahikeriini gho kohetera emeremo ghino Omutëmi wiito Kirisito Yesu ꞉aköriri.
12 Mbe,
gho ghughöötana kwito na Kirisito gho nchëra e komokumi,
ntoonyi no obhosubhesubhe no obhotoro bho koriishukerera Eryobha kwo miitëngʼërö amakoro.
13 Gho ghayo,
nekobhasabha motaku omukörö kwo nyaako ino ekumböna gho ghiri yaanyu,
gho kubha anyaako iyo nekobharëëtëra obhwëra.
Obhosiighi bho Kirisito
14 Gho ghayo,
nekohighama ambërë e Taata Waryobha,
15 uno anyi simoka e bhyose bhino bheenyi mo‑se na Mwishaaro.
16 Nekorisabha,
kurëngʼaana no obhwaru bho bhokumi bhooche obhokoro,
gho nchëra e Körö yaache,
rebhahë changuru motore ghuköngʼëri mo‑metema gheenyu,
17 kubha gho nchëra e bhokumi,
Kirisito abhe ariikara mo‑metema gheenyu.
Hayo niho obhosiighi bhooche,
bhookubha bhorabhaha changuru che kwimeerera muköngʼiiri kinya omote uno osimiri emerya haase chwee,
hamu kinya anyumba ino yabhëkuru ighoro e bhoroso bhuchömu.
18 Hayo inyu haghirohamu na abhaato bhoose bha Ryobha,
moghotora kumënya kinya obhosiighi bho Kirisito bhoonyi bhokoro na bhotaanyi ne ekirëngërë.
19 Hëënë mokohikera kumënya obhosiighi bho Kirisito bhuno bhoghokera amangʼiini ghoose gha bhaato,
mwichoribhu mbagha mohikere obhohikeerani bhuno bhookoru kwo Waryobha.
20 Mbe,
reghongibhu Eryobha rino reghotora ghuköra amangʼana gha koroghoori chwee ghokera ghoose ghano toghotora ghusabha hamu kwihëëbha,
gho kirëngërë ghe changuru cheeche chino cheghuköra emeremo moose yiito.
21 Eryobha reghongibhu na abhaato kwo mabhagha ghoose emiishe ne emiishe,
kwo bhokoro bhooche bhuno bhokorighibhu mo‑riikanisa reeche na Kirisito Yesu!
Hawubhaabha.