Amarighi gha Bhawuro no obhutöbhu bhooche
12
Nekwëndëru kwihacha nangabha etaaghunsakeri ghyokyose.
Ibheere nekwënda kwihacha ighoro e amarighi na amangʼana aghande ghano anyëërëkiri Omutëmi Yesu.
2 Nemweche omooto umu Omokirisito,
a uno mo‑meeka ikomi ne ene ghino ghehetiri,
꞉niimokiibhu mbagha Mwishaaro ri ighoro chwee.
b Ntyeche aribha are mo‑mobhere uno,
hamu aribha taare mo‑mobhere uno.
Eryobha niryo ryeche.
3 Wiiki ntyeche aribha ꞉imokiibhu mo‑mobhere uno,
hamu aribha taare mo‑mobhere.
Eryobha niryo ryeche.
Amare kino nyeeche n‑kubha,
omooto uyo
4 ꞉niimokiibhu mbagha kohika iyo mo‑Chaasare.
c Iyo akooghu amangʼana gha koroghoori chwee ghano omooto ataaghotora ghosiikëra,
wiiki taakurëngʼaanera ghoghasiikëra.
5 Ibheere nekwihacha ighoro e mooto uyo,
amare nteekwihacha kinya bhuno neenyi.
Nekwihacha hangʼu ighoro e bhutöbhu bhoone.
6 Koru nengabheere nërëënda kwihacha,
ntengabheere muraghaanu,
gho kubha nengabheere nerasiikëra gha mahëënë.
Amare nekwihööchërëra kwihacha,
kubha omooto wowoose ataacha kondighi kubha,
nirëngʼaaniire ghokera bhuno bhakondighi na kooghu koru ghokoone.
7 ꞉Niihaabhuru anyaako mo‑mobhere waane ino enyi kinya eriihö.
Anyaako iyo n‑omotomu o Rishambu uno atomuru kubha anyaaki,
kubha netighe ghwitiiri ighoro e maaru gha koroghoori ghano Omutëmi Yesu anyëërëkiri.
8 ꞉Neemusasaamiri Omutëmi mara ghatato antoori mo‑nyaako iyo.
9 Amare iwe akamboorera akabhugha,
“Aghareeya yaane neghoghwisha,
gho kubha mo‑bhutöbhu nimu muyo changuru cheene chehaarighibhu.”
Gho ghayo,
neekubha neriihacha gho ghuchömëru ghokoro ighoro e bhutöbhu bhoone,
kubha changuru che Kirisito chibhe haghirohamu na neeni.
10 Gho ghayo,
neghuchömëru chwee ighoro e bhutöbhu,
na ghotoku,
na kubha na anyööri,
na kubha mo‑nyaako na kwirighora ighoro e Kirisito.
Neenyi no oghuchömëru,
gho kubha eriibhagha neekubha mutöbhu,
niho neekubha na changuru.
Ahaho e Bhawuro ighoro e Bhakorinto
11 Mbe,
nesiikiire kinya omuraghaanu,
amare niinyu mughëriri nesiikërë hangʼu.
Inyu moore mörëëndëru ghuntöghösi,
gho kubha nangabha nekorighibhu kubha nteekurëngʼaanera,
eni taanyi omotomu omosuuhu ghokera bhano bhakwirighi kubha,
nibho abhatomu abhakoro.
12 Eriibhagha neere bhowaanyu ꞉niiyëërëkiri kubha m‑motomu neenyi,
gho kubha ꞉niiköriri ebhyërëkërëri,
ne ebhiraghe ne ebheroghooro kwo bhoghumereri bhoose.
13 Ghetaanyi‑ho ghyokyose kino ꞉niiköriri kwo makanisa aghande,
kino ntaköriri ghokoonyu.
Hamwabhe ꞉neebhatasiiri hano ntëëndiri kubha omorigho ghokoonyu.
Aribha bhuyo nibho obhobhe bhoone,
monyaabhërë!
14 Ibheere neghwisëëmi kuucha bhowaanyu mara e ghatato,
amare nteekubha omorigho ghokoonyu.
Ntesiighiri ebheghiro bheenyu,
amare n‑inyu nekwënda.
Neghosiikëra ghayo gho kubha abhaana abhasuuhu bhataakwëndëru ghotindëka ebheghiro kubha bhibhe bhe bhiibhori,
amare abhiibhori mbakwëndëru ghotindëka ebheghiro kubha bhibhe bhe bhaana.
15 Neghuchömëru koruusi ebheghiro bheene na kwiruusi eni mwene kobhatoori inyu.
Amare ibheere nekorighibhu kubha,
hano nekwëngëra kobhasiigha,
niho inyu moghosuuhi obhosiighi bhoonyu ghokoone.
16 Moghwishereri kubha nteere omorigho ghokoonyu,
amare koru hangʼu abhande ghate yaanyu mbakobhugha kubha,
“Bhawuro m‑mongʼiini,
natotebhiritebhiri kwo bhuröngö.”
17 Ibheere,
꞉neebhangʼiiniri kubha niimoki ghyokyose ghokoonyu kohetera kwo bhaato bhano ꞉neebhatomiri?
18 ꞉Neemusasaamiri Tiito nekamughöötani no omohiiri wiito owonde kubha ache bhowaanyu haghirohamu nawe.
Ibheere,
Tiito ꞉niimokiri ghyokyose koru ghokoonyu?
Motaakorighi kubha eni na we ntoonyi egheghiro kimu mo‑moremo ghino?
Wiiki motaakorighi kubha koru atëëmö yiito yoose n‑imu?
19 Ghasi moghwituuri kubha eriibhagha rino ryose,
ntoghwitachura ambërë yaanyu.
Amare itu ntoghosiikëra ghano ambërë e Ryobha,
gho kubha n‑abhatamishi bha Kirisito toonyi.
Abhasiighani bhiito,
ghano ghoose ntoghuköra gho ghiri e kobhatoori muköngʼëri mo‑bhokumi.
20 Ibheere neghotiina kubha,
eriibhagha rino nekuucha bhowaanyu,
nekobhabhöna moonyi na atëëmö ino etaaghunchömëri eni.
Riyo ndeghughëri nikörë ghano ghataakobhachömëri inyu.
Neghotiina kubha neghotora kobhabhöna moonyi ne eriireghe,
no obhusööhu,
no oghukarara,
no obhunyawumu,
no obhori bho bhaato,
na kwibhora amangʼana,
no obhwihachi na amahë.
21 Neghotiina kubha eriibhagha nekuucha bhowaanyu wiiki,
Eryobha reene ndeghuköra nerighi chaasoni ambërë yaanyu.
Neekubha na amacheeche korighi abhaato bhaaru ghate yaanyu bhano ꞉bhaaköriri amasari ekeenyuma,
bhakeere ghotuukuuna.
Bhakeere bhaanyi na atëëmö imbe e bhutaari,
no obhoghonchu na amangʼana aghande gha chaasoni ghano ꞉bhaare nagho.