Atöngërö e ntenero
13
Ino neekubha mara e ghatato kuucha bhowaanyu.
Amandëkö Amatööbhiyu ngakobhugha kubha,
“Kira eriisari reteneru ekiina kwo bhwibhateri bho bhaato bhabhere hamu bhatato.”a
2 Hano niichiri bhowaanyu mara e kabhere,
꞉neebhabhooriire kubha,
hano nekuucha bhowaanyu wiiki,
nteekubha ne ebheghongi na abhaato bhano bhaköriri amasari.
Ibheere nangabha neenyi kurë,
ˆnekabhabhoorera riyo wiiki kubha,
nteekubha ne bheghongi ghokoobho na kwo bhande bhoose.
3 Neghuköra hangʼu,
gho kubha mokwënda ekyërëkërëri ghe kumënya kubha Kirisito naghosiikëra kohetera ghokoone.
Kirisito uyo taanyi mutöbhu,
amare naghuköra emeremo ghateghate yaanyu gho changuru.
4 M‑mahëënë kubha Kirisito ꞉naamamburu mo‑bhutöbhu,
amare ibheere m‑muhöru gho changuru che Ryobha.
Hangʼu hangʼu na niitu m‑bhatöbhu toonyi kinya iwe,
amare eriibhagha tokobhahökëri inyu,
ntookubha abhahöru haghirohamu na iwe gho changuru che Ryobha.
5 Ibheere mwirëngi inyu bheene,
kubha mumënyë aribha moonyi no obhokumi.
Mwimööhërëri inyu bheene.
Moteeche kubha Yesu Kirisito naanyi moose yaanyu?
Aribha moteeche,
hayo mokinduru kohikera ekirëngërë ke bhokumi.
6 Amare neghwitëngʼëra kubha inyu mokumënya kubha itu totakinduru.
7 Ntokorisabha Eryobha kubha motaköra angʼana yoyoose ambe,
taanyi gho kubha ntokwënda torighibhu kubha ntokindiri.
Amare ntokwënda mukörë amachömu,
koru nangabha itu tokorighibhu kubha ntokinduru.
8 Neghosiikëra hangʼu,
gho kubha totaanyi na changuru che kuhööchërëra obhuhëënë,
amare ntoonyi na changuru che kobhuhökëri obhuhëënë okwene.
9 Ntoghuchömëru hano tookubha abhatöbhu,
amare inyu moonyi na changuru.
Ntokorisabha Eryobha rebhatoori mubhe bhaghöröröku.
10 ˆNekabhaandëkëra amangʼana ghano eriibhagha nekeere kuucha,
kubha hano nekuucha bhowaanyu,
netagharighi ghano ghaghotora ghunköra nibhe muhaari ighoro e bhotoro bhuno aheere Omutëmi.
Neghosiikëra hangʼu,
gho kubha obhotoro bhuno,
m‑bho kobhaköngʼi inyu mo‑bhokumi,
taanyi bho kobharumeeri.
Amangʼana gha kuragha
11 Ibheere,
abhahiiri bhaane,
masaraamu!
b Mubhe bhaghöröröku,
na mwighambisani,
na mubhe no obhumu,
na mubhe no omurëmbë.
Eryobha ryose rino reenyi no obhosiighi no omurëmbë ndeekubha haghirohamu na niinyu.
12 Mukëërani kwo bhosiighani bho Kirisito.
Abhakumi bhoose bhano bhaanyi hano,
mbakobhakëëri.
13 Aghareeya e Mutëmi Yesu Kirisito,
no obhosiighi bho Waryobha,
no obhughöötani bho Körö Ahörëëru,
bhubhe haghirohamu na niinyu bhoose.