2 Abhakorinto 11

Bhawuro na abhatomu bha bhuröngö

Koru nangabha neghosiikëra ke muraghaanu hasuuhu, neghusabha muntëghëërërë. Hee, muntëghëërërë! 2 Eni nekobharigheri eriihari. Eriihari riyo ndeekoru kwo Waryobha, gho kubha moonyi kinya omuukë uno ataamara amisi no omosubhe, uno nemwishereriiri ghokwiru no omosubhe umu hangʼu, omosubhe uyo n‑. 3 Amare ibheere neghotiina kubha, kinya bhuure Haawa angʼiinuru na anchöka yiire angʼiini, na niinyu motaacha kongʼiinu, motighe komosiigha Kirisito kwo bhughöröröku no obhwero. 4 Neghosiikëra hangʼu gho kubha inyu m‑bhango moonyi ghosongʼaana omooto uno akuucha kuraghani amangʼana ighoro e Yesu ghano ghaanyi mahaghare na ghaare itu tobharaghaniiri. Wiiki, moghosongʼaana akörö na angʼana ayende kwo bhwango, ino motaasongʼaaniri koru ghokwito.

5 Eni nteekwirighi kubha m‑mosuuhu neenyi kwo bhayo bhakwirighi kubha, n‑ abhakoro. 6 Koru nangabha nekorighibhu kubha ntyeche ghosiikëra bhoheene, obhumënyi bhoone m‑bhokoro. Ntwërëkiri riyo ghokoonyu eriibhagha ryose na ahaghiro hoose.

7 ꞉Niinyööhiri gho nchëra e kuraghani Angʼana Anchömu e Ryobha ghokoonyu ino ntaakorehu, kubha inyu moghongibhu. ꞉Niiköriri kobhe angʼana iyo? 8 Hano niköriri emeremo bhowaanyu, neere nerasongʼaana obhotoorereri bho chambiiri koru mo‑makanisa aghande. N‑kinya neere nerabhahöka ebheghiro bheebho, kubha nebhatoori inyu. 9 Eriibhagha neere haghirohamu na niinyu, nteere omorigho kwo mooto wowoose hano neere nerasuuheru, gho kubha abhakumi bhano ꞉bhaaruure Maketoniya mbaheere bhino neere nërëënda. Neere neriichonga netaacha kubha omorigho ghokoonyu koru hasuuhu, wiiki nekwëndërëra ghwichonga. 10 Kinya bhuno obhuhëënë bho Kirisito bhoonyi moose yaane, taanyi‑ho omooto koru umu hayo mo‑mukööwa woose o Akaaya, uno akuuhööchërëra kwihacha ighoro e ngʼana ino. 11 Nteeghosiikëra hangʼu gho kubha ntebhasiighiri, Eryobha ndyeche kubha nebhasiighiri.

12 Nekwëndërëra ghuköra emeremo kinya bhuno neghuköra ibheere, kubha bhano bhakwirighi kubha nibho abhatomu abhakoro, bhatabhöna omweya o kwihacha kubha mbaghuköra emeremo kinya itu. 13 Abhaato kinya bhayo n‑abhatomu bha bhuröngö. Ibho mbaghuköra emeremo ghe kobhangʼiina abhaato, mbaghwiköri kinya n‑abhatomu bha Kirisito. 14 Mo‑ghayo totaakoroghoora, gho kubha eryene ndehiiköri kinya o bhwero. 15 Gho ghayo, taanyi ngʼana e koroghoora korighi koru bhano bhakorihökëri, bhariiköri kinya abhatamishi bha hëënë. Antenero yaabho mbaghosongʼaana ghano gharëngʼiine na amaköri ghaabho.

Bhawuro ˆakiihachera nyaako yaache

16 Wiiki ˆnekabhabhoorera kubha, omooto atiihëëbha kubha eni m‑muraghaanu neenyi! Amare koru nangabha mokwihëëbha kubha eni m‑muraghaanu neenyi, nekobhasabha muntëghëërërë mo‑bhuraghaanu bhuyo, kubha na neeni niihache hasuuhu. 17 Amangʼana ghano neghosiikëra ibheere gha kwihacha, ntiragheriiru no Omutëmi Yesu, amare neghosiikëra kinya omooto omuraghaanu. 18 Bhaaru mbakwihacha gho ghiri e mangʼana ghano bhaköriri, mbe, na neeni tigha niihache. 19 Inyu mokwirighi kubha moonyi no obhongo, nikyo gheghughëri moraghumereri koru abhaato abharaghaanu gho ghuchömëru. 20 Moghoghumereri koru omooto uno akobhatoora mo‑bhusësë, na kobhiibhera na kobhahöka ebheghiro bheenyu, wiiki uno akobhataraaha na kobhatëma mo‑bhosho. 21 Itu totabhaköriire amangʼana ghayo, gho kubha itu m‑bhahörëëru toonyi chwee. Kwo riyo totaakorighi chaasoni!

Ibheere neghosiikëra kinya muraghaanu kubha, aribha anyi‑ho omooto uno akurëngʼaanera kwihacha ighoro e ghyokyose, na neeni nirëngʼaaniire kwihachera kiyo kiyo. 22 Aribha ibho n‑Abheebhuraaniya, na neeni n‑Omwibhuraaniya neenyi. Aribha ibho n‑Abhiisiraeri, na neeni n‑Omwisiraeri neenyi. Aribha ibho m‑bha mo‑rwibhoro ro Abhurahamu, na neeni n‑o mo‑rwibhoro ro neenyi. 23 Ibheere nesiikërë kinya nechuuriri kubha, aribha ibho n‑abhatamishi bha Kirisito, eni n‑omutamishi o Kirisito ghokera ibho. Eni ꞉niiköngʼiri ghuköra emeremo miköngʼu chwee, mara kaaru nibhöhuru mwighërëcha, mara kaaru niröönuru chwee, wiiki neere mo‑bhobhe bho ghoku. 24 Nitëmuru na Abhayahuuti chasaanyi miröngö etato na kende, mara ghataano. 25 Nitëmuru chahimbo na Abharuumi mara ghatato, nirasuru na amabhohe mara rimu, ameeri ninsarëkiire mara ghatato mo‑nyancha, wiiki ꞉niikeere mo‑nyancha obhotiko no omwishe. 26 Mara kaaru mo‑rughëndö roone, neere mo‑bhobhe bho kohiru ne ebhitaaro, na ghughöötu na amanyangara, no obhobhe koru mo‑Bhayahuuti bhaghëndi bhaane na mo‑bhaato bha matöngö. Neere mo‑bhobhe mo‑meghya, na mo‑materegho, na mo‑nyancha. Neere mo‑bhobhe koru mo‑bhano bhaghwiköri kubha abhakumi bhaghëndi bhiito. 27 Niköriri emeremo emiköngʼu na kunyaaka, na mara kaaru nebhoriri chandöörö, na nitëmuru na anchëra na anyööta, mara kaaru ntebhwine ekiinyakurë, na niikeere mo‑nyighita netaanyi na changibho che mbeho. 28 Haghirohamu na ghayo ghoose, kira rosiko neghokeyu ne emeremo ghino nekwëndëru ghuköra gho ghiri e makanisa ghoose. 29 Aribha omokumi wowoose abhoriri changuru, na neeni nekwiyoghu kobhori changuru. Aribha omokumi wowoose bhamorumeeriri, na neeni nekunyahaarëka.

30 Aribha ekwëndëru kwihacha, nekwihacha ighoro e bhutöbhu bhoone. 31 Waryobha, Taata o Mutëmi Yesu, uno akurëngʼaanera ghoghongibhu emiishe ghyose, neeche kubha nteeghosiikëra obhuröngö. 32 Eriibhagha neere mo‑moghya o Tamaasiko, omukangati o mukööwa uno are haase e mutëmi Areeta, ꞉naatooriri abhachongi mo‑bhehita bhe moghya uyo, kubha bhangöötë. 33 Amare abhaato nyarebhe bhakanyiikeri mo‑ghetonga kohetera mwibhanga rino reere mwibhendo re moghya, neghatabhaabhukera ro kinyonyi.