Bhawuro ˆakabhagharokeri bhano bhakomutaraaha
10
Mbe,
abhande mbakobhugha kubha,
eni Bhawuro m‑muhörëëru neenyi hano neekubha haghirohamu na niinyu,
na kubha muhaari neenyi hano neekubha kurë na niinyu.
Amare eni ˆnekabhasasaama kwo bhunyööhu na kwo bhuhörëëru bho Kirisito.
2 ˆNekabhasasaama kubha,
hano nekuucha iyo bhowaanyu,
motanköra kubha muhaari.
Neghosiikëra hangʼu,
gho kubha nyeeche neghotora kubha muhaari kwo bhaato bhoose bhano bhaghwituuri kubha itu n‑gha mo‑se ino toghutabhara.
3 Nangabha itu tumanyiri mo‑se,
totaakurööna eriihë kinya abhaato bha mo‑se.
4 Ebhiröönërö bhino tokuröönëra eriihë riyo bhetaanyi bhe mo‑se,
amare mbeenyi na changuru chino cheekoru kwo Waryobha,
na ncheghusari charwakyo choose che mobhisa.
5 Ntoghusari amangʼana ghoose gha bhuröngö,
na gha kwihacha ghano ghakuhööchërëra abhaato bhatarimënya Eryobha.
Wiiki ntoghugharura amiihëëbhö ghoose amabhe,
kubha ghamosooke Kirisito.
6 Hano mookubha momosookiri inkongʼorimu,
itu ntookubha tumariri ghwisëëma ghutëma anchagho amangʼana ghoose ghano ghataanyi gha sooko.
7 Mumööhërëri amangʼana ghano ghaanyi ambërë e miisho ghaanyu.
Omooto wowoose uno akwirighi kubha iwe n‑o Kirisito,
amënyë kubha itu bhoose n‑abhaato bha Kirisito toonyi,
kinya iwe.
8 Hamwabhe mokorighi kubha,
nekwihacha ghokera ekirëngërë ighoro e bhotoro bhuno Omutëmi atoheere.
Amare koru hangʼu,
nteekorighi chaasoni,
gho kubha obhotoro bhuyo bhotaakobhasari,
amare mbokobhaköngʼi mo‑bhokumi.
9 Nteekwënda mwituuri kubha nekwënda kobhatiini mo‑chanyaarubha chino nekobhaandëkëra.
10 Neghosiikëra hangʼu,
gho kubha abhande mbakobhugha,
“Chanyaarubha che Bhawuro ncheenyi na amangʼana mahaari,
wiiki ncheenyi na amangʼana amaköngʼu.
Amare eriibhagha anyi haghirohamu na niitu abha ataanyi ni inguru,
wiiki amangʼana ghaache ghano aghosiikëra ghabha ghataanyi na gheghiro.”
11 Omooto uno aghosiikëra amangʼana ghayo amënyë kubha,
ghano tokobhaandëkëra eriibhagha toonyi kurë,
nigho ghano toghuköra eriibhagha toonyi haghirohamu na niinyu.
12 Itu totaaghotora kwibhara hamu kwirëngʼaani na abhaato bhano bhakwihacha abheene.
Ibho bhateeche ghyokyose,
gho kubha mbaghwiköri ekirëngërë ghe kwirëngi abheene kwo bheene,
na mbakwirëngʼaani abheene kwo bheene.
13 Amare itu totaakwihacha ghokera ekirëngërë ke meremo ghino tuhaabhuru.
Ntokwihacha ighoro e meremo ghino Eryobha retoheere okwene.
Emeremo ghiyo nighyo ghino tokuhöki koru iyo bhowaanyu.
14 Totaakwihacha koheta ekirëngërë ke meremo ghiito kinya bhuno tongaköriri aribha totangahikiri bhowaanyu.
Amare n‑itu toore a bhambërë kobharëëtëra Angʼana Anchömu ighoro e Kirisito.
15 Wiiki totaakwihachera emeremo ghe bhaato abhande ghino totahaabhuru.
Amare ntoghwitëngʼëra kubha,
kinya bhuno obhokumi bhoonyu bhokwëndërëra kwiyëngëra chwee,
nibhu emeremo ghiito ghateghate yaanyu gheekubha gheriyëngëra.
16 Hayo niho tokuraghani Angʼana Anchömu mo‑chaase echende chino angʼana iyo ekeere kuraghanibhu.
Ntoghuköra hangʼu,
gho kubha totaakwënda kwihacha ighoro e meremo ghino abhaato abhande bhaköriri mo‑chaase echende.
17 Amandëkö Amatööbhiyu ngakobhugha,
“Omooto wowoose uno akwihacha,
ihache gho ghiri e Mutëmi.”a
18 Ino nekwërëki kubha,
omooto wowoose uno akwihacha omwene taaghwisherereru,
amare uno aghoghongibhu no Omutëmi,
uyo niwe aghwisherereru.