Obhotoorereri kwo bhakumi bha Yerusareemu
9
Nteekwënda kobhaandëkëra maaru ighoro e bhotoorereri bhoonyu kwo bhakumi bha Yerusareemu,
2 gho kubha nyeeche omukörö waanyu o kobhatoori abhande.
Wiiki,
eni nekwihacha ighoro yaanyu kwo bhaato bha Maketoniya,
neghosiikëra kubha,
inyu abhaato bha riikanisa re mo‑mukööwa o Akaaya ꞉mwisëëmiri koruusi korwera omooka uno ohetiri.
Ghwiköngʼi koonyu kuyo,
ngughëriri abhaato bhaaru ghate yaabho kubha no omukörö o koruusi.
3 Ibheere nebhatomiri bha Tiito,
kubha motore kwërëki kubha hëënë ꞉mwisëëmiri koruusi,
kinya bhuno ꞉neebhabhooriire abhaato bha Maketoniya.
Nteekwënda kubha,
amangʼana ghano ꞉niighongiri ighoro yaanyu gharighibhu kubha ghataanyi no obhwëra.
4 Aribha neraacha iyo haghirohamu na Abhamaketoniya na kubhöna motaamara mwisëëmi,
hayo mookubha motuköriire chaasoni ighoro e miitëngʼërö ghiito ghokoonyu.
Wiiki na niinyu mookubha na chaasoni chino chetaaghughambu.
5 Gho ghayo,
nerooche m‑bhoheene nebhasabhe abhahiiri bhiito bhayo,
bhatukangate kuucha iyo bhowaanyu,
kubha bhasëëmi ebheghiro bhino ꞉mooturaghiire.
Gho nchëra iyo mookubha moruusiri gho kwënda koonyu,
taanyi gho kuhaamereru.
Koruusi amaruusi kwo mukörö o ghuchömëru
6 Mohiite amangʼana ghano kubha,
“Omooto uno akwemi bhirëngʼaaneru,
nahaaghësa bhirëngʼaaneru,
na uno akwemi bhyaru,
nahaaghësa bhyaru.”
7 Omooto woose aruusi kinya bhuno ꞉ëndiri mo‑körö yaache,
atighe koruusi kwo macheeche hamu gho kuhaamereru,
gho kubha Eryobha ndemosiighiri omooto uno akoruusi kwo mukörö mwero.
8 Eryobha ndeghotora kobhiitabheri ghokera bhuno mokwënda,
kubha eriibhagha ryose mubhe ne ebheghiro bhyose bhino mokwënda,
na mubhe abhaato bha ghuköra amachömu maaru gha kobhatoori abhande.
9 N‑kinya bhuno yandëkuru mo‑Mandëkö Amatööbhiyu kubha,
“Naruusiri kwo mukörö woose,
kobhaha abhahabhe,
changori cheeche n‑che miishe ghyose.”a
10 Eryobha niryo rekomuha omooto ambusuro e kwemi ne ekiinyakurë.
Hangʼu hangʼu,
ndekobhaha inyu ambusuro e kwemi na köyëngërëërëri.
Niko kobhugha kubha,
ndekobhaha na köbhëëngërëërëri omukörö o kobhasakeri abhande.
11 Ndeekubha rerabhaha obhwame mo‑ghoose,
kubha mubhe abhasambaroku eriibhagha ryose.
Hayo niho abhaato bhaakubha bharariitabheri Eryobha gho ghiri e bheghiro bhino tokobhahirera koru ghokoonyu.
12 Neekubha hangʼu,
gho kubha emeremo ghino moghuköra,
ghetaaghusakeri abhakumi bha Yerusareemu bhano bhasuuhiiru abheene,
amare ngeghuköra abhaato bhaaru bhariitabheri Eryobha chwee.
13 Emeremo ghiyo ngekwërëki kubha inyu n‑abhatamishi bhachömu,
na kohetera ghayo,
abhaato mbakoreghongi Eryobha.
Mbakoreghongi gho ghiri mbakorighi kebhuno mokoyesooka Angʼana Anchömu ighoro e Kirisito.
Wiiki mbakoreghongi hano bhakorighi obhusambaaroku bhoonyu gho nchëra e ghusanga ebheghiro bheenyu haghirohamu nabho na abhande bhoose.
14 Niho bhaakubha bharabhasabhera kwo Waryobha kwo mukörö woose,
gho ghiri e ghareeya ino etaanyi ne ekirëngërë ino Eryobha rebhaheere inyu.
15 Tubhe torariitabheri Eryobha gho ghiri e kihaano ghekoro ghe koroghoori,
kino retoheere.