Akörö e ghusakeri abhande
8
Ibheere,
abhahiiri bhiito,
ntokwënda mumënyë aghareeya e Ryobha ino abhaato bha makanisa gha mukööwa o Maketoniyaa ꞉bhaabhwine.
2 Haghirohamu na kubha abhakumi bhayo mbaare abhahabhe chwee na ꞉mbaasakiibhu mo‑nyaako e manga maaru,
amare mbaare no oghuchömëru kwaru kuno ꞉ghuughëriri bhabhe abhasambaroku chwee koruusi ebheghiro bheebho.
3 Nekuhëënëhi kubha ꞉mbaaruusiri ebheghiro bhyaru,
koru ghokera obhotoro bhoobho.
Wiiki ꞉mbaaruusiri gho ghosiigha koobho abheene
4 na ꞉mbaatusasaamiri chwee kubha,
tobhahë omweya o ghusanga kobhatoori abhakumi bha Yerusareemu.
5 ꞉Mbaaköriri hangʼu ghokera kinya bhuno toore toriitëngʼëra.
꞉Mbiiruusiri ekimbërë kwo Mutëmi,
bhakamara bhakiruusi ghokwito.
꞉Mbaaköriri hangʼu kinya bhuno Eryobha rekwënda.
6 Gho ghayo,
tokamusasaama Tiito kubha ache abhatoori koru inyu kumara emeremo ghiyo ghe ghareeya,
gho kubha niwe asëëmiri emeremo ghiyo ghokoonyu.
7 Inyu moonyi ne ebheghiro bhyose.
Moonyi no obhokumi,
na moonyi ne ekihaano ghe ghosiikëra bhoheene,
no obhumënyi,
na ghwiköngʼi mo‑ghoose amachömu,
no obhosiighi bhoonyu ghokwito.
b Mbe,
hangʼu hangʼu,
mubhe moriiruusi mo‑meremo ghino ghe kobhatoori abhande.
8 Nteeghosiikëra ghano gho ghiri e kobhahatëka,
amare nekwënda korighi aribha obhosiighi bhoonyu m‑bho hëënë.
Neghuköra hangʼu gho nchëra e köbhëërëki kinya bhuno abhande bhaghwiköngʼi ghusakeri.
9 Ghokera ghayo,
mweche kinya bhuno Omutëmi wiito Yesu Kirisito abhaheere aghareeya yaache.
Nangabha are omwame,
aghiiköri kubha muhabhe gho ghiri yaanyu,
kubha gho nchëra e bhuhabhe bhooche,
inyu mubhe abhaame.
10 Ibheere,
ighoro e musörörö uno,
nekobhabhoorera rino reenyi re bhwëra ghokoonyu.
Nekwëndëru mumare ghano musëëmiri mo‑mooka uno ohetiri.
c Eriibhagha riyo,
moore a bhambërë kwërëki amiigha gha ghusöröra na a bhambërë ghusëëma ghuköra hangʼu.
11 Ibheere,
kinya bhuno moore moriighomba ghuköra riyo eriibhagha musëëmiri,
mumareereri emeremo ghiyo,
mwiruusi kurëngʼaana na kinya moonyi nabhyo.
12 Aribha omooto naanyi na akörö e ghusakeri,
Eryobha ndeghosongʼaana kino akoruusi,
kurëngʼaana na kino anyi nakyo,
taanyi kurëngʼaana na kino otaghöötë.
13 Ekebhune keene,
taanyi kubha inyu munyaake no omorigho o kobhatoori abhande,
kubha ibho bhabhe no obhohoho,
14 amare nekwënda murëngʼaane.
Kwi ibheere moonyi ne ebheghiro bhyaru,
gho ghayo,
mobhasakeri bhano bhataanyi nabhyo,
kubha bhoose eriibhagha bhaakubha ne ebheghiro bhyaru,
mbakobhasakeri na niinyu.
Gho ghuköra hangʼu mookubha murëngʼiine nabho,
15 kinya bhuno yandëkuru mo‑Mandëkö Amatööbhiyu kubha,
“Uno akomiri bhyaru,
bhetaamokeyiri,
uno akomiri bhesuuhu taasuuhiiru.”d
Tiito na abhaghëndi ˆbhaghatomu Korinto
16 Nekoriitabheri Eryobha gho kubha ndemoheere Tiito omukörö uno neenyi nawe eni o kobhasakeri inyu.
17 Neghosiikëra hangʼu,
gho kubha eriibhagha ꞉toomusabhiri ache bhowaanyu,
꞉niisheriiri.
Wiiki omwene naanyi na amiigha chwee gha kuucha kobhasakeri.
18 Tiito uyo,
ntomotomiri no omohiiri wiito owonde uno abhaato bha makanisa ghoose bhakomoghongi gho ghiri e meremo gheeche ghe kuraghani Angʼana Anchömu.
19 Ghokera ghayo,
amakanisa ngamwahwire omohiiri wiito uyo,
kubha abhe haghirohamu na niitu eriibhagha tokohira obhotoorereri mo‑bhaato.
Emeremo ghiyo ghe ghareeya ngekomoghongi Omutëmi,
wiiki ngekwërëki kebhuno toghwiköngʼi kobhasakeri abhande.
20 Totaakwënda tutëmu amasörö no omooto wowoose ighoro e bhwimeerereri bho kohira ebheghiro bhino abhaato bharuusiri kwo bhwaru.
21 Amënda ghiito n‑ghuköra ghano ghaanyi amachömu,
taanyi ambërë e Mutëmi okwene,
amare na ambërë e bhaato.
22 Ntomotomiri omohiiri wiito owonde abhe haghirohamu na bha Tiito.
Omohiiri uyo ntomorooche mara kaaru gho chanchëra haghare haghare kubha naanyi na amiigha gha ghuköra emeremo,
ni ibheere naanyi na amiigha makoro ghokera ekimbërë,
gho kubha naanyi ne eriitëngʼërö ikoro chwee ghokoonyu.
23 Ibheere aribha omooto akwënda kumënya amangʼana gha Tiito,
iwe m‑mughëndi waane,
uno aghuköra emeremo haghirohamu na neeni gho ghiri e kobhasakeri inyu.
Na aribha omooto akwënda kumënya amangʼana gha bhande bhano bhiichiri haghirohamu nawe,
bhayo n‑abhahiiri bhiito,
mbatomuru na amakanisa,
bhoose mbakomoghongi Kirisito.
24 Gho ghayo,
möbhëërëki abhaato bhayo obhosiighi bhoonyu,
kubha amakanisa ghamënyë kubha ntoonyi ne ekebhune ghe kwihacha ighoro yaanyu.