7
Ibheere,
abhasiighani bhaane,
Eryobha ndeturaghiri amangʼana ghayo ghoose,
gho ghayo twiyeri mo‑ghoose ghano ghaghotuköra kubha abhaghonchu mo‑mebhere na mo‑metema ghiito.
Tubhe abhatööbhiyu kwo mangʼana ghoose gho nchëra e koresooka Eryobha.
Ghuchömëru kwo Bhawuro
2 Motuhë omweya mo‑metema gheenyu,
gho kubha taanyi‑ho uno tomutasiiri,
na taanyi‑ho uno tomunyahaariri mo‑mangʼana nyarebhe,
hamu uno tomongʼiiniri.
3 Nteeghosiikëra amangʼana ghano,
kubha nebhatenere ekiina,
gho kubha,
kinya bhuno ꞉niimariri ghosiikëra kubha,
inyu moonyi mo‑metema ghiito,
koru ntoonyi haghirohamu na niinyu ibhe mo‑bhuhöru,
hamu oroko.
4 Neenyi no obhosubhesubhe chwee hano neghosiikëra na niinyu,
wiiki nekwihacha chwee gho ghiri yaanyu.
Mungambisiini chwee na muköriri nibhe na ghuchömëru kwaru,
nangabha tokunyaaka mo‑maaru.
5 Hano tohikiri Maketoniya,
totaabhwine omweya o koweera,
gho kubha ntoore na anyaako chambaara choose.
Anche ꞉haare ne eriihë,
moose mo‑metema ghiito ꞉haare na ahaho.
6 Amare Eryobha rino rekobhaghambisani bhano bhaanyi na nyaako mo‑metema gheebho,
꞉reeghatughambisani hano Tiito ichiri.
7 Nteekobhugha kubha ꞉ntuughambisiinu gho kuucha gho Tiito okwene,
amare na kinya bhuno momughambisiini iwe omwene.
꞉Naatobhooriire kinya bhuno moonyi na amiigha gha kondighi,
na kebhuno ꞉mwitumatiri na kunyaaka gho ghiri yaane.
Ghayo ngaghëriri nichömëru chwee.
8 Nangabha anyaarubha ino ꞉neebhaandëkiire nebhaheere amacheeche,
nteeghwitëma amasörö.
Nangabha ꞉niitëmiri amasörö masuuhu ekimbërë,
anyaarubha iyo nebhaheere amacheeche kwo riibhagha ighuhe hangʼu.
9 Ibheere neghuchömëru,
taanyi gho kubha moore na amacheeche,
tiyaanyi!
Neghuchömëru gho kubha amacheeche ghaanyu ngabhaköriri motuukuunere obhobhe bhoonyu.
Mubheere na amacheeche kinya bhuno Eryobha ꞉ryëëndiri,
gho ghayo totabhanyahaariri gho nchëra yoyoose yiire.
10 Amacheeche ghano ghakuucha gho ghiri e mënda gha Ryobha ngaghughëri otuukuune.
Oghotuukuuna kinya kuyo taanyi gho ghwitema amasörö,
gho kubha ngokurëëta obhotoori.
Amare amacheeche ghano ghakuucha gho ghiri e amangʼana gha mo‑se,
ngakurëëta oroko.
11 Mööhi!
Amacheeche ghano ghakuucha gho ghiri e mënda gha Ryobha ngakobharëëtëra obhwëra obhokoro.
Amacheeche ghayo ngabhaköriri kubha na amiigha makoro gha ghuköra ghano ghakwëndëru,
na ngabhaköriri ˆmoghiitachura kubha ghano moghuköra n‑gha mahëënë.
Wiiki ngabhaköriri kobhurëgha obhobhe,
na koresooka Eryobha,
na kubha na amiigha gha kondighi,
na korighi kubha uno asariri nasongʼaaniri amareho ghaache.
Mo‑ghayo ghoose mokwërëki kubha motaanyi ne eriisari mo‑ngʼana ino.
12 Mbe,
nangabha ꞉neebhaandëkiire anyaarubha yiire,
ntyandëkiri gho ghiri e mooto uno amuköriire kobhe owonde,
hamu gho ghiri e uno aköriiru kobhe.
Amare neere nërëënda mumënyë inyu abheene ambërë e Ryobha kebhuno mwiköngʼiri kwiruusi ighoro yiito.
13 Mo‑riyo motughambisiini chwee.
Haghirohamu na riyo,
꞉ntuuchömiiru chwee hano tomorooche Tiito kebhuno are achömiiru,
gho kubha ꞉muusambaarokiri omotema waache.
14 Eni ꞉neebhaghongiri chwee ambërë yaache,
na niinyu motanköriire chaasoni.
Ghoose ghano toore torabhabhoorera ngaare gha hëënë.
Hangʼu hangʼu,
na ghano ꞉toobhaghongiiri inyu gho Tiito,
ghoose ꞉ngaarighiibhu kubha n‑gha mahëënë.
15 Obhosiighi bho Tiito ghokoonyu mbokwëndërëra kwëngëra,
hano akohiita obhosooku bhoonyu bhoose na kinya bhuno momosongʼaaniri gho sooko na gho ghosingisa.
16 Neghuchömëru chwee gho ghiri yaanyu,
gho kubha ibheere neghotora kobhiitëngʼëra inkongʼorimu.