6
Ibheere,
gho kubha ntokuhöki emeremo haghirohamu ne Eryobha,
ntokobhasasaama kubha aghareeya e Ryobha ino mosongʼaaniri,
motayetigha ebhore bhoowa.
2 Nekobhabhoorera hangʼu,
gho kubha Eryobha ndekobhugha mo‑Mandëkö Amatööbhiyu kubha,
“Eriibhagha rino ꞉ryëëndiiru,
꞉neekooghwire,
no orosiko ro ghotooribhu,
꞉neeghusakiiri.”
a
Mutëghëërërë,
eriibhagha rino ꞉ryëëndiiru niryo rino, no orosiko ro ghotooribhu n‑ibheere!
Ghoghumereri mo‑meremo ghe Mutëmi
3 Totamuköriire omooto wowoose angʼana ino eghotora komuköra atukararere,
kubha obhutamishi bhwito bhotaacha ghughambu kobhe.
4 Amare mo‑ghoose,
ntokwërëki kubha itu n‑abhatamishi bha Ryobha toonyi.
Ntokwërëki riyo gho nchëra e ghoghumereri chwee mo‑nyaako,
na mo‑nyööri na mo‑mangʼana amaköngʼu.
5 Ntutëmuru,
na ntubhöhuru mo‑maghërëcha,
na ntuchëëruru na amakinda gha bhaato,
na ntuköriri emeremo miköngʼu,
na ntobhoriri chandöörö ne ebhiinyakurë.
6 Wiiki ntokwërëki kubha itu n‑abhatamishi bha Ryobha mo‑bhughöröröku,
na mo‑bhumënyi,
na mo‑bhoghumereri,
na mo‑bhuhöriicho,
na gho nchëra e ghukangatu na Akörö Ahörëëru,
na mo‑bhosiighi bho hëënë,
7 wiiki gho nchëra e kuraghani amangʼana gha mahëënë.
Ntohaaköra ghayo ghoose gho changuru che Ryobha.
Obhuhëënë nibho ebhiröönërö bhiito,
eribhaara re kwiro na re kumosi.b
8 Itu ntokwiruusi gho ghiri e Ryobha,
abhaato bhatoghongi hamu bhatutaraahe,
bhatokumi hamu bhatughambe kobhe.
Ntokorighibhu kubha m‑bharöngö toonyi,
amare ntoghosiikëra gha mahëënë.
9 Ntokorighibhu ke bhano totamënyëkiine,
amare mbatweche bhoheene.
Ntokorighibhu ke bhano tokuure,
amare m‑bhahöru toonyi!
Nturöönuru chwee,
amare totakuure.
10 Wiiki ntokorighibhu kinya ntwitumatiri,
amare eriibhagha ryose ntoghuchömëru.
Ntokorighibhu kubha m‑bhahabhe toonyi,
amare abhaaru ntobhaamihiri.
Ntokorighibhu kubha totaanyi na ghyokyose,
amare ntoonyi ne ebheghiro bhyose.
11 Inyu Abhakorinto,
ntosiikiire na niinyu totabhabhisiri ghyokyose.
Wiiki ntobhasiighiri kwo metema ghiito ghyose.
12 Itu totaamara totigha kobhasiigha inyu,
amare inyu,
motighiri ghotosiigha itu.
13 Ibheere neghosiikëra na niinyu kinya abhaana bhaane,
motosiighe kwo metema gheenyu ghyose,
kinya bhuno itu tobhasiighiri.
Obhughöötani na abhaato bhano bhataanyi abhakumi
14 Motabha no obhumu na abhaato bhano bhataanyi abhakumi.
Kana,
obhuhëënë na amasari mbeghotora kubha no obhusaani?
Hamu obhwero ne ekengʼuuri mbeghotora kubha no obhumu?
15 Wiiki Kirisito ne Erishambuc mbaghotora kubha no obhoghwani?
Hamu omokumi na uno ataanyi omokumi,
mbaghotora kubha no obhumu?
16 Erisëngërö re Ryobha ndeghotora kubha no obhumu na chasanaamu che misambu?
Itu n‑Erisëngërö re Ryobha rino reenyi ihöru!
d N‑kinya bhuno Eryobha eryene ꞉reebhughiri kubha,
“Neghwikara ghokoobho
na ghughënda haghirohamu nabho.
Neekubha Eryobha reebho,
nabho mbaakubha abhaato bhaane.”e
17 Gho ghayo Omutëmi Waryobha ꞉naabhughiri wiiki kubha,
“Moru ghateghate yaabho,
mwiyaahukani nabho.
Motaturi egheghiro egheghonchu,
niho na neeni nekobhaghënëhi.f
18 Neekubha Iso waanyu,
na niinyu mookubha abhaana bhaane
bha ghesubhe na bha ghikari.
Hangʼu nibhu Omutëmi Waryobha o Bhotoro Bhoose,
akobhugha!”g